Ibibazo bishamikiye ku mirire mibi bihombya u Rwanda 11.5% by’umusaruro mbumbe buri mwaka

Yanditswe na Bukuru JC
Kuya 26 Nyakanga 2019 saa 12:41
Yasuwe :
0 0

Guverinoma y’u Rwanda ikomeje gukoresha imbaraga nyinshi mu guhangana n’ikibazo cy’imirire mibi ndetse no kugwingira mu bana, kigira ingaruka ku miryango ubwayo ariko zikagera no ku gihugu mu buryo by’umwihariko.

U Rwanda ni igihugu cyakoze ibishoboka mu guteza imbere ubuzima bw’umubyeyi n’umwana, ariko imibare y’imibereho y’ingo yo mu 2015, yagaragaje ko abana 38% bari munsi y’imyaka itanu bagwingiye.

Abahanga bagaragaza ko kugwingira bigira ingaruka ku mwana mu bijyanye n’umubiri n’ubwenge, aho umusaruro we amaze gukura ugabanukaho 10%.

Nk’uko Banki y’Isi ibitangaza, “umwana bimwongerera ibyago byo kuzabaho mu bukene kubera ko atabasha kwitwara neza mu ishuri, yibasirwa n’indwara ndetse bikazatuma ahembwa umushahara muto mu buzima bwe bwose. Ukugwingira kw’abana kunagira ingaruka ku bukungu. Igihombo gituruka ku mirire mibi ku Rwanda kibarirwa kuri 11.5 ku ijana by’umusaruro mbumbe w’igihugu ku mwaka.”

Binyuze mu bigo nka Africa Improved Foods (AIF), u Rwanda rwakoze ishoramari ritandukanye, aho icyo kigo cyiyemeje ko ibyo gikora bizagera ku bana miliyoni imwe bafite imirire mibi, abagore batwite cyangwa ababyeyi bonsa bitarenze umwaka wa 2031.

AIF yashinzwe ku bufatanye bwa Guverinoma y’u Rwanda, Ikigo cy’Abaholandi cyita ku Buzima (Royal DSM), Banki y’Iterambere y’Abaholandi (FMO), Ikigega Nterankunga cy’Abongereza (DFID) n’ishami rya Banki y’Isi ryita ku ishoramari, IFC.

Uru ruganda rwatangiranye ishoramari rya miliyoni 60 z’amadolari, intego ari uko rukora ifu ibasha kurwanya imirire mibi muri Afurika y’Iburasirazuba, ikunganira abahinzi kandi igatanga ifu ikungahaye ku ntungamubiri ku giciro gito.

Imiryango irenga 80 irwanya imirire mibi ihuriye mu Ihuriro Sun Alliance iheruka kwiyemeza kugenzura imikoreshereze y’inkunga ibona kugira ngo igere ku cyerekezo yihaye cyo kurandura burundu ibibazo byose bifitanye isano n’imirire mibi mu Rwanda bitarenze umwaka wa 2030.

Mu mwaka ushize Guverinoma y’u Rwanda na Banki y’Isi bashyize umukono ku masezerano ya miliyoni 23 z’amadolari ya Amerika, ni ukuvuga hafi miliyari 19 Frw z’inyongera mu mushinga ugamije kurwanya imirire mibi mu bana.

Ni amafaranga yiyongeraga ku zindi miliyoni 55 z’amadolari y’Amerika (miliyari 47.25 Frw) yatanzwe mu ntangiro z’umwaka ushize, agenewe guhangana n’ikibazo cy’imirire mibi no kugwingira kw’abana bari munsi y’imyaka itanu mu turere 13 dufite ikibazo kurusha utundi.

Mu mwiherero w’abayobozi wabaye ku wa 26 Gashyantare kugeza ku wa 1 Werurwe 2018, Perezida Kagame ntiyoroheye abayobozi ababaza impamvu ikibazo cy’imirire mibi nk’imwe mu mpamvu zituma abana bagwingira kidakemurwa, yibaza icyabuze.

Yagize ati “Ibyo tubivuze inshuro nyinshi ugasanga twavuze ibindi, umutekano, ibiki, ahantu hose turi imbere. Kuki mu mirire twajya mu ba nyuma? Kubera iki? Mu mirire, mu migaburire y’abana bacu noneho ikajya no mu bakuru habuze iki?”

Umunyamabanga wa Leta muri Minisiteri y’Ubutegetsi bw’Igihugu ushinzwe Imibereho Myiza y’Abaturage, Dr. Mukabaramba Alvera, yavuze ko bikwiye ko umwana arindwa imirire mibi mbere y’imyaka ibiri, ndetse hari gahunda zatangiye zitegerejweho umusanzu muri urwo rugamba.

Yagize ati “Hatangiye gahunda zo kumurinda (umwana) akiri no munda, hari ibiryo ubu dusigaye duha ababyeyi batwite bari mu cyiciro cya mbere (batishoboye) ndetse n’abana guhera ku mezi atandatu kugeza ku myaka ibiri. Hari amafaranga menshi leta y’u Rwanda itanga, nk’ubwo ibyo biryo bidutwara miliyari esheshatu buri mwaka.”

“Hari n’amata duha abana nayo adutwara amafaranga menshi, adutwara miliyari eshatu buri mwaka nayo, bariya bana Minisiteri y’Ubuzima iba yerekanye ko bafite imirire mibi, bari mu mutuku cyangwa mu muhondo.”

Yavuze ko indi gahunda iri gushyirwamo imbaraga ari iy’amarerero (ECD) ari kubakwa kuri buri Kagali ku buryo nibishoboka azagezwa no kuri buri mudugudu.

Abana bakomeje kwitabwaho mu kurwanya imirire mibi binyuze mu marerero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza