ICDL yahize gukemura ikibazo cy’ubumenyi buke mu gukoresha ikoranabuhanga

Yanditswe na Habimana James
Kuya 22 Ukwakira 2019 saa 06:01
Yasuwe :
0 0

Ikigo cyigisha kikanatanga impamyabushozi mu masomo y’Ikoranabuhanga ‘International Computer Driving Licence (ICDL)’, kivuga ko kubera ubumenyi buke mu by’ikoranabuhanga, usanga bamwe mu bakozi mu bigo bitandukanye batakaza umwanya munini barwana no gukemura ibibazo bigendanye n’ubumenyi buke mu gukoresha mudasobwa aho kuwukoresha mu kazi bashinzwe.

Byagarutsweho mu nama ya ICDL Africa Forum 2019, yabereye i Kigali igahuza abasaga 200 barimo abashoramari bakomeye n’abayobora inzego zifatirwamo ibyemezo bo hirya no hino ku Isi.

Abari muri iyi nama barebeye hamwe ku kamaro k’ikoranabuhanga muri Afurika, mu kuziba icyuho cy’ubumenyi bukiri buke ku isoko ry’umurimo no gushyiraho ingamba zo kuzamura ikoranabuhanga kuri uwo mugabane.

Kuva mu 2015 nibwo iki kigo cyatangiye gukorana na leta y’u Rwanda mu guhugura abantu uko baryifashisha kugira ngo barusheho gutanga umusaruro.

ICDL ikarishya ubumenyi mu gukoresha mudasobwa (Computer essentials), gukoresha neza murandasi (online collaboration), ubwirinzi mu ikoranabuhanga (IT Security), gutegura inyandiko zifashishwa mu gihe cy’imbwirwaruhame n’andi masomo.

Umwe mu bayobozi muri ICDL, Peter Maina Njagi, yavuze ko ikibazo cy’ikoreshwa ry’ikoranabuhanga ugisanga no mu bakozi ba leta n’ahandi, aho usanga imirimo yakihutishijwe n’ikoranabuhanga izaririjwe n’uko abayishinzwe badafite ubumenyi buhagije mu kurikoresha.

Yagize ati "uyu munsi uragera mu kigo ugasanga gukora nka raporo bitwaye umuntu iminsi myinshi atari uko abuze amakuru ahubwo ari uko imikoreshereze ye ya Word Processing iri hasi. Turashaka ko ibyo bintu bihinduka ku buryo koko umuntu aba afite mudasobwa ashobora no kuyibyaza umusaruro, ibi byakorwa gusa mu gihe abakozi bafite ubumenyi mu ikoranabuhanga.”

Yabwiye IGIHE ko mu myaka bamaze mu Rwanda bamaze guhugura ibigo bikomeye birimo Minisiteri y’Ingabo, Polisi y’igihugu, Ikigo cy’imisoro n’amahoro, Ikigo cy’Ubwiteganyirize mu Rwanda (RSSB), Kaminuza y’Ubukerarugendo, Ubucuruzi n’Ikoranabuhanga (UTB) n’ibindi, hagamijwe ko abakozi babyo banoza ibyo bakora biciye mu ikoranabuhanga.

Ati ‘‘Mu myaka itanu iri imbere u Rwanda ruzaba ari igihugu kimeze nka Singapore ya Afurika, kubera uburyo rwashyize imbere gukoresha ikoranabuhanga, ubu iyo ugiye mu bihugu nka Tanzania, Kenya n’ahandi batangira kukubaza ibyo u Rwanda rurimo gukora mu ikoranabuhanga, icyo nasaba Abanyafurika ni uko bagomba gushyira imbaraga muri ibi bintu by’ikoranabuhanga kuko niwo musemburo w’iterambere.’’

Singapore ivugwa ni igihugu giherereye muri Aziya ariko kikaba cyarashyize ingufu mu ikoranabuhanga mu nzego zose.

Muri iki gihugu hari ibigo birenga ibihumbi 150 bizobere mu ikoranabuhanga. Raporo yasohowe n’ikigo cyitwa Manpower mu 2015, yagaragaje ko mu 2014 iki gihugu cyabonye amadorali arenga miliyari 167 z’amadorali ya Amerika cyavanye mu ikoranabuhanga.

Umunyamabanga uhoraho muri Ministeri y’Ikoranabuhanga no guhanga udushya, Irere Claudette, yashimiye uruhare rwa ICDL mu bufatanye n’u Rwanda.

Yavuze ko mu Rwanda abanyarwanda barenga 60% bari munsi y’imyaka 35, aba ukaba wabasanga bakora muri leta cyangwa bikorera, ibi bikaba bisobanuye ko hakwiye gushyirwamo imbaraga ku buryo urubyiruko koko rutanga umusaruro.

Yagize ati ‘Uyu munsi ushobora gusanga umwana afite telefoni y’umubyeyi we arimo gukinaho imikino na mbere y’uko amenya kwandika, ibi ni ibigaragaza ko tugomba guhangana na byo.’’

Umuyobozi wa ICDL Foundation, Damien O’Sullivan, yavuze ko icyo bashyize imbere atari ikoranabuhanga ahubwo ko icyo bakeneye ari ikiri mu muntu.

Yagize ati ‘‘ICDL Africa ishyira ubushobozi mu kwigisha abantu kugira ubumenyi, ICDL kandi si ikigo cy’Abanyaburayi bazanye ku banyafurika ahubwo ni ikigo mpuzamahanga, uko gikora muri Afurika ni nako gikora muri Aziya n’ahandi ku isi. ‘’

Umuyobozi Mukuru wungirije ushinzwe Amasomo, Ubushakashatsi n’Imyigire muri UTB, Prof Dr. Tombola Gustave, yavuze ko iki kigo gifasha iri shuri guhugura abanyeshuri, ku buryo nta munyeshuri wo muri UTB usoza adafite impamyabushobozi yacyo.

Yagize ati ‘Ubwo abanyeshuri bacu basozaga Kaminuza tariki 7 Gicurasi uyu mwaka, hasoje abarenga ibihumbi bibiri kandi bose bari bafite izo mpamyabushobozi, tuzabikomeza ku buryo abanyeshuri bacu bazajya bagera ku isoko ry’umurimo bafite ubumenyi bw’ikoranabuhanga kuko iki ni ikintu bagomba gukoresha.’’

Mu 2015, ubwo ICDL yasinyanaga amasezerano y’ubufatanye n’u Rwanda binyuze mu yari Minisiteri y’Urubyiruko n’Ikoranabuhanga, intego yari uguhugura abakozi ba leta 85,000 bitarenze 2020.

Inama ya ICDL Africa Forum 2019 yabereye i Kigali
Abitabiriye inama barebeye hamwe ku kamaro k’ikoranabuhanga muri Afurika
Umuyobozi wa ICDL Foundation, Damien O’Sullivan (iburyo) na Nicholas Gatete ushinzwe iterambere ry'isoko muri ICDL
Solange Umulisa, uyobora ICDL Africa avuga ko ari ngombwa ko abakozi bita ku ikoranabuhanga kandi bakaribyaza umusaruro
Umunyamabanga uhoraho muri Ministeri y’Ikoranabuhanga no guhanga udushya, Irere Claudette, yashimiye uruhare rwa ICDL mu bufatanye n’u Rwanda
Nicholas Gatete ushinzwe iterambere ry’isoko muri ICDL ubwo yari mu nama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza