Icyogajuru RWASAT-1 cy’u Rwanda cyujuje umunsi wa gatanu mu isanzure

Yanditswe na Rabbi Malo Umucunguzi
Kuya 1 Ukwakira 2019 saa 10:04
Yasuwe :
0 0

Icyogajuru cy’u Rwanda, RWASAT-1, cyujuje umunsi wa gatanu mu isanzure kuko cyoherejwe ku wa 25 Nzeri 2019, gihagurukira muri Tanegashima Space Center mu majyepfo y’u Buyapani.

Muri Gicurasi uyu mwaka nibwo u Buyapani bwashyikirije u Rwanda icyogajuru RWASAT-1 cyakozwe na Kaminuza ya Tokyo ifatanyije n’itsinda ry’Abanyarwanda 15, abo byitezwe ko kizatanga umusanzu mu iterambere ry’ubuhinzi mu Rwanda.

Umushinga w’icyogajuru cya RWASAT-1 umaze imyaka ibiri utangijwe, aho kizajya cyifashishwa mu gufata amashusho y’ubutaka bw’u Rwanda cyifashishije camera ebyiri zacyo.

Gikoranye akuma gato gafite ubushobozi buhambaye bwatuma kibasha gupima ingano y’amazi mu butaka, ubushyuhe, ubuhehere n’ibindi bipimo bijyanye n’imiterere y’ibihe. Kireshya na cm 30 z’uburebure na 10 z’ubugari, gipima 3.8 kg.

IGIHE yabonye amakuru ko ibikorwa byo kucyohereza mu isanzure cyagenze neza, kizamurwa na rockette ya H-2B muri Tanegashima mu Buyapani, ku wa 25 Nzeri 2019 ku isaha yo mu Buyapani. Ni ku wa Kabiri tariki 24 Nzeri ku masaha y’i Kigali.

Biteganyijwe ko mu cyumweru gitaha Minisiteri y’Ikoranabuhanga na Inovasiyo, Urwego Ngenzuramikorere, RURA na Ambasade y’u Buyapani mu Rwanda, bazagirana ikiganiro n’abanyamakuru hasobanurwa byimbutse iby’urugendo rwa RWASAT-1 mu isanzure.

Umuyobozi muri Komisiyo y’Igihugu Ishinzwe Ubumenyi n’Ikoranabuhanga (NCST), ushinzwe gusangiza abandi Ubumenyi n’Ikoranabuhanga, Twagirayezu Gaspard, wari mu Buyapani mu ikorwa ry’iki cyogajuru, muri Gicurasi yabwiye itangazamakuru ko intumbero ari uko ibindi bizakorerwa mu Rwanda.

Ati “Ibice byinshi by’icyogajuru bishobora gukorerwa mu Rwanda ariko harimo ibice bijyanye no gukora igererageza ryacyo aho bisaba inganda na laboratoire tudafite hano mu Rwanda naho ibindi bishobora gukorerwa hano mu Rwanda.”

“Ni nacyo turi kurebaho mu minsi iri imbere mu zindi RWASAT ku buryo ibice binini byazajya bikorerwa mu Rwanda hanyuma igeragezwa tudafitiye ubushobozi tukaba twarikorera hanze.”

Ashingiye ku bunararibonye we na bagenzi be bakuye mu Buyapani, Twagirayezu yavuze ko mu gihe kiri imbere abanyarwanda bashobora kuzicara bagahera kuri 0 bakikorera icyogajuru cyabo.

Umujyanama muri Komite y’u Buyapani ishinzwe iby’isanzure, Takayoshi Fukuyo, yavuze ko hari ubufatanye Kaminuza ya Tokyo ifitanye n’Ishuri Rikuru ry’Imyuga n’Ubumenyingiro rya Tumba, aho abanyarwanda bazahugurwa mu kugenzura amakuru atangwa n’ibyogajuru.

Ati “Igitekerezo cyacu ntikigarukira ku gukora icyogajuru gusa, ni ingenzi guha ubushobozi abantu bashobora kugenzura, gukoresha iri koranabuhanga.”

Itsinda ry’abanyarwanda 15 nibo bagize uruhare mu gukora RWASAT-1, bamwe bari mu Rwanda, batatu mu Buyapani abandi bari muri Leta Zunze Ubumwe za Amerika.

Icyogajuru RWASAT-1 cyazamukanye na NARSScube-1 ya Misiri, ari nacyo cyogajuru cya munani icyo gihugu cyohereje mu isanzure.

Uyu mushinga ubayeho nyuma y’uko muri Gashyantare uyu mwaka, ku bufatanye bwa Leta y’u Rwanda n’ikigo mpuzamahanga mu by’itumanaho, OneWeb, hoherejwe mu isanzure icyogajuru cyiswe ‘Icyerekezo’, izina cyahawe n’abanyeshuri bo ku Rwunge rw’Amashuri rwitiriwe Mutagatifu Petero ku Nkombo, cyitezweho kugeza interineti mu bice birimo iri shuri.

Ni umushinga w’ikigo OneWeb gifite gahunda yo kohereza mu isanzure ibyogajuru 650 mu myaka ibiri, bizakwirakwiza internet icika gake cyane ugereranyije n’isanzwe. Ibi byogajuru byakozwe ku bufatanye n’ikigo Airbus Defence and Space.

Byitezwe ko iri shuri ryo ku Nkombo rizanabona internet muri uyu mushinga ku buntu, mu gihe cy’imyaka 10.

Inkuru wasoma:

- U Rwanda rwashyikirijwe icyogajuru cyarwo cyakorewe mu Buyapani

- U Rwanda rwohereje mu isanzure icyogajuru kizahaza internet ibice by’icyaro

Icyogajuru RWASAT-1 cyakozwe ku bufatanye na Kaminuza ya Tokyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .