00:00:00 IGIHE NETWORK KN KINYARWANDA EN ENGLISH FR FRANCAIS

Ikibazo cy’abana bata amashuri cyongeye kugarukwaho nk’igiteye inkeke

Yanditswe na

Ezechiel Mbananabo

Kuya 20 April 2016 saa 11:07
Yasuwe :

Leta y’u Rwanda yakoze ibishoboka ngo abana b’Abanyarwanda bose bige cyane ko mu burezi bw’ibanze bigira ubuntu ariko haracyagaragara ikibazo cy’abana bata amashuri hirya no hino mu gihugu.

Ubwo yasuraga abaturage b’akarere ka Rubavu taliki ya 27 Werurwe 2016, Perezida Kagame yavuze ko ababyeyi bohereza abana babo mu mirimo itabakwiye ndetse abarezi n’abandi bayobozi batagira icyo bakora ngo abana bataye ishuri barigarukemo bose bazabihanirwa. Icyo gihe yabajije abayobozi b’akarere impamvu amashuri yubakwa ariko abana ntibayajyemo.

Yagize ati “Mfite imibare hano kandi irasa nabi, imibare y’abana batajya mu ishuri, ibisobanuriro abayobozi bampa sinabyumva; ni imikorere mibi, abayobozi ndabasa bisuzume bafashe abaturage kohereza abana ku ishuri.”

Umukuru w’Igihugu yabajije ikibitera kandi ibyangombwa byose bihari, abaza niba bituruka ku kuba akamaro ko kwiga katarumvikana cyangwa niba ari ikindi.

Ubuyobozi bw’akarere bwavuze ko biterwa n’uko hari ababyeyi bashyira imbere kubashyira mu mirimo y’ubuhinzi n’ubucuruzi.

Imibare ya Minisiteri y’Uburezi yo muri 2014 yagaragazaga ko abanyeshyuri bangana na 12,4% bata amashuri mu cyiciro cy’abanza. Naho abangana na 14,7% bagata amashuri mu cyiciro cy’ayisumbuye.

Aba bana usanga bakoreshwa mu mirimo ivunanye irimo gusoroma icyayi, kwahirira amatungo,gucukura amabuye mu birombe, gutunda amatafari n’ibindi. Mu biganiro bitandukanye n’aba bana, bahuriza ku bukene bwo mu miryango nka nyirabayazana yo guta amashuri.

Gukaza umurego mu gushyira mu bikorwa ingamba zo kubungabunga uburenganzira bw’abana no gukumira impamvu zituma abana bajya mu mihanda cyangwa bata amashuri, ni umwe mu myanzuro yafatiwe mu mwiherero w’abayobozi bakuru wa 13 uheruka kubera i Gabiro mu kigo cya gisirikare muri Werurwe 2016.

Mu biganiro imiryango itegamiye kuri Leta ‘Save the Children’ na ‘Vision Media Organisation’ yagiranye n’abanyamakuru ku bibazo bitandukanye bikigaragara mu bana, hagaragajwe ko mu mpamvu zituma abana bata amashuri harimo ubukene bw’ababyeyi, imyumvire ikiri hasi, kutita ku bana, amakimbirane yo mu miryango, gutandukana kw’abashakanye , kunanirana kw’abana n’ibindi.

Mu kiganiro na IGIHE, Sibomana Marcel, ukuriye porogaramu ishinzwe guteza imbere uburenganzira bw’umwana muri Save the Children, yasobanuye intege nke zikigaragara mu nzego zose ari ko zituma ikibazo cy’abana bata amashuru kidakemuka burundu.”

Yagize ati “Turashishikariza buri muntu wese kubigiramo uruhare kuko mu bana hari ahari intege nke aho bamwe batajya ku ishuri, ababyeyi batabakurikirana cyangwa ngo babohereza ku ishuri n’inzego zitandukanye zidakurikirana ikibazo. Birasaba ko mu nzego zose harebwa ikibura,ndetse buri wese akagira uruhare mu gukemura ikibazo cy’abana bata ishuri.”

Sibomana Marcel, ukuriye porogaramu ishinzwe guteza imbere uburenganzira bw’umwana muri Save the Children

Itangazamakuru rifatwa nk’ubutegetsi bwa kane. Marcel avuga ko rifite uruhare rukomeye mu kumenyekanisha uburenganzira bw’umwana binyuze mu makuru atangazwa.

Ati “Itangazamakuru ni ijwi ry’abantu batagira kivugira.Igihe cyose rikoreshejwe neza ni umusingi w’iterambere kuko rishobora gukora ubuvugizi ku kibazo runaka nyuma yo kugicukumbura kikagaragarizwa abashinzwe kugikurikirana.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .