Ikinyoma cyemejwe: Uko Paul Rusesabagina yahinduwe intwari rugwizangeso

Yanditswe na IGIHE
Kuya 5 Gashyantare 2019 saa 10:57
Yasuwe :
0 0

Mbere ya Jenoside yakorewe Abatutsi mu 1994, Paul Rusesabagina yari umuntu usanzwe, uko iminsi yagendaga ishira aza kubonwa nk’umugabo wazamukanye inyota y’ubutegetsi, agera aho ashaka kurisha ubuhamya bufifitse anavugwa mu ishingwa ry’umutwe ugamije guhungabanya umudendezo w’u Rwanda.

Rusesabagina yavukiye i Murama ya Gitarama ku wa 15 Kamena 1954, ariko nyuma yagiye gutura i Bruxelles mu Bubiligi na Leta Zunze Ubumwe za Amerika.

Uburyo abantu bamuzi bwahinduwe cyane na filimi Hotel Rwanda yamukinweho nk’uwarokoye abantu 1268 muri Hôtel des Mille Collines, abayobejwe nayo batangira kumuhundagazaho ibihembo kugeza kuri ‘Presidential Medal Award of Freedom’, yahawe na Perezida George W. Bush wa Amerika mu Ugushyingo 2005.

Nyiramirimo baziranye kuva kera

Dr Odette Nyiramirimo wahoze ahagarariye u Rwanda mu Nteko Ishinga Amategeko y’Umuryango wa Afurika y’Iburasirazuba, EALA, avuga ko mbere umuryango we n’uwa Rusesabagina bari inshuti cyane.

Nyiramirimo yakoranye n’umugore wa Rusesabagina, Thacienne Mukangamije muri CHUK, mbere y’uko we n’umugabo we Dr Gasasira Jean Baptiste bashinga ivuriro ‘Le Bon Samaritain’.

Mu kiganiro yigeze kugirana na IGIHE, yagarutse ku buzima bwabo mbere Jenoside ubwo bari batuye i Nyamirambo, ariko umunsi umwe bataha bagasanga Interahamwe zashinze bariyeri mu nzira.

Basabye Rusesabagina wayoboraga Hotel des Diplomates yari yubatse ahari Serena Hotel y’ubu, abagabanyiriza ibiciro bahaguma amezi abiri.

Ubwo indege ya Perezida Habyarima yahanurwaga mu ijoro ryo ku wa 6 Mata 1994 ndetse Abatutsi bagatangira kwicwa, Rusesabagina ngo yahamagaye kwa Dr Gasasira abura uwitaba, bose bahavuye.

Uretse Abanyarwanda bari mu gihugu, abanyamahanga na bo bari bahiye ubwoba ku buryo ku wa 10- 16 Mata Ingabo z’Ababiligi zakoze ‘Opération Silver Back’, ku rundi ruhande Abafaransa bakora ‘Opération Amaryllis’ (ku wa 8-14 Mata) mu gucyura bene wabo bari mu Rwanda rwari rwamaze gucura umwijima.

Guverinoma yariho ngo yaje kubwira Rusesabagina ko ikeneye Hotel des Diplomates kuko hari abagombaga kuyikoreramo kandi bakayiraramo, bityo abantu basanzwe bategekwa kuhava.

Nyiramirimo ati “Nkurikije uko yatubwiye (Rusesabagina), ni uko yagiye muri Milles Collines, ahita afata ubuyobozi bwaho.” Hotel des Diplomates na Hôtel des Mille Collines zari iz’ikigo cy’indege cya Sabena cy’Ababiligi.

Kimwe n’abandi bantu batandukanye, Nyiramirimo yahungiye muri Hôtel des Mille Collines ku wa 27 Mata 1994, umugabo we n’abana bahagera ku munsi ukurikiyeho bafashijwe na Nzaramba François wari Lieutenant mu ngabo z’icyo gihe, ubu ni umuganga mu bitaro bya gisirikare.

Rusesabagina yari umucuruzi si umugiraneza

Muri iyo hoteli hari hahungiye abantu benshi, si Rusesabagina bose wabazanye ngo abahe ubuhungiro kuko ‘nawe ntiyigeraga asohoka, yari afite ubwoba ko bashobora kumwica’.

Nyiramirimo avuga ko babaga mu cyumba bari abantu nka 27, bakarya ibiryo byo mu bikombe, nyuma MINUAR iza gusaba ibiryo muri Croix Rouge babaha ibigori n’ibishyimbo.

Ati “Abafite amafaranga barishyuraga, abatayafite bagasinya, natwe niko twabigenje ntayo twari dufite, ahubwo nasanze nari mfite n’agasheki mu mufuka, nagasinyeho k’amadolari $400, bayankuyeho hariya muri BCR nyuma ya Jenoside, Hôtel des Mille Collines.”

Abadafite amafaranga ngo basinye mu gitabo bemera umwenda, nubwo ngo bigoranye kumenya niba uko basinye bose nyuma barishyuye.

Abandi bahungiye muri Hôtel des Mille Collines barimo abakomeye nka Rubangura, Bernard Makuza (Perezida wa Sena), Makuza Bertin wari umunyenganda, Ambroise Murindangabo, Habiyakare wabaye Minisitiri n’abandi.

Ubwo muri Werurwe 2008 hamurikwaga igitabo ‘Hotel Rwanda – or the Tutsi Genocide as seen by Hollywood’, cyanditswe na Dr Alfred Ndahiro afatanyije Privat Rutazibwa; Bernard Makuza wari Minisitiri w’Intebe yashimangiye ko nta muntu Rusesabagina yarokoye ku bwe.

Ni igitabo kivuga neza amateka y’abarokokeye muri Hôtel des Mille Collines, bitandukanye na filimi ‘Hotel Rwanda’ yashyizwemo umunyu ikagira Rusesabagina intwari ku bikorwa bitigeze bibaho.

Makuza ati “Twese twishyuye amafaranga ngo tugume muri iyi hotel kandi nta muntu yagiye hanze kurokora. Abantu barazaga bakaguma hano kuko bishyuye amafaranga.”

Icyo gihe yanibukije ko ubwo yahuraga na Rusesabagina muri iyo hoteli, ati “yantunze urutoki avuga ko nka njye wari umujyanama wa Agathe Uwilingiyimana ndi mu bantu bazanye ibibazo.”

Makuza yabaye Umujyanama mu by’amategeko wa Uwilingiyimana wari Minisitiri w’Intebe wabaye umwe mu bantu bishwe Jenoside igitangira.

Gasamagera Wellars wageze muri iyi Hoteli iminsi ibiri mbere y’uko Rusesabagina ahagera, ubwo yari senateri mu 2011 ni umwe mu bashimangiye uko batswe amafaranga kugira ngo bahabwe icumbi.

Yagize ati “Nishyuye amafaranga y’u Rwanda ibihumbi 180 y’iminsi ine, ariko kuko nari mfite amafaranga macye nyuma y’ibyumweru bibiri bahise bankura muri icyo cyumba.”

Hari n’uwitwa Pascal we anahamya ko yari yarasigiwe imfunguzo z’iyi hoteli n’Ababiligi ubwo Jenoside yatangiraga, ndetse anavugwa muri filimi Hotel Rwanda yitwa Gregoire.

Yemeza ko Rusesabagina nta gahunda yari afite yo kuguma kuri Hotel Mille Collines, ko ahubwo yahanyuze yishakira Essence akaza kubona nta muyobozi uhari niko kumwambura imfunguzo zose.

Uyu mugabo anavuga ko yatangajwe n’uburyo muri filimi bamwerekana asahura icyumba cya mbere gihenze muri Mille Collines mu gihe abandi bahungiyemo hoteli barimo Makuza bemeza ko ariwe wabafashije mu minsi ya mbere Rusesabagina atarahagera.

Icyo gihe ngo ibikorwa bya Rusesabagina byari ubucuruzi kurusha ubutabazi, ari nayo mpamvu abamuzi bahamya ko ibyo yakoze atari ibyo kwirata.

Nyiramirimo yibuka ko yavuye muri Hôtel des Mille Collines ku wa 27 Gicurasi, ubwo Inkotanyi zari zimaze gufata igice kinini cy’Umujyi wa Kigali, zemeranya na leta yariho kugurana abantu, baguranirwa kuri Rond Point ya Kimihurura, imodoka zimwe zireba epfo izindi ruguru.

Nyiramirimo ati “Turenze aha ku Nteko Ishinga Amategeko twararize kubera ibyishimo tuti tubayeho, ariko tukanarizwa n’agahinda k’ibyo dusize inyuma.”

George W. Bush wari Perezida wa Amerika, mu Ugushyingo 2005 yambitse Rusesabagina umudali uzwi nka ‘Presidential Medal Award of Freedom’

Inkomoko y’ikinyoma muri Hotel Rwanda

Umunyamerika Philip Gourevitch yanditse igitabo yise “We Wish to Inform You That Tomorrow We Will Be Killed with Our Families” cyasohotse mu 1998, ndetse Nyiramirimo yashyizemo ubuhamya bumugarukaho kuva ku buto bwe.

Umunyamerika Terry George utunganya amafilimi muri Hollywood yaje kugisoma asanga cyavamo filimi nziza, anyura kuri Rusesabagina ngo abone abakinankuru nyabo, hari mu 2003.

Abanyamerika bageze kuri Nyiramirimo bakora inyandiko ya filimi, ariko basaba ko yazakinirwa muri Afurika y’Epfo kuko mu Rwanda hari hataragera hoteli zakwakira ibyamamare ku rwego rwa Don Cheadle uyigaragaramo.

Nyiramirimo wari senateri, yasabye uruhushya rwo kujya muri Afurika y’Epfo nyuma yo kwinginga abo banyamerika ko bayikinira mu Rwanda ariko bakabyanga.

Ati “Ubwo tujya Afurika y’Epfo gusobanurira abo bakinnyi ya mateka yose n’uburyo badukina kuko inyandiko yayo yari yararangiye twaranayisomye, ariko tukajya tubabwira tuti aha ntabwo ariko byagenze, nabo bati iyi ntabwo ari filimi mbarankuru, ni filimi irimo ibihimbano, ntutekereze ko uko byagenze ariko turi bubivuge.”

“Ndabyibuka twajyaga tubiganira kuko bashyizemo n’ibintu by’urukundo berekana ukuntu ngo ba Rusesabagina bagiye kwicara hejuru ya hoteli baganira, umugore amushima cyane uko yakijije inshuti ze (twebwe), ndetse hakaba n’aho yerekana Rusesabagina asa n’uwanga gufasha abantu, umugore we akaba ariwe ubimwingingira. Tuti ibyo se ko atari ko byagenze? Bati nta kibazo. Nyuma filimi barayikinnye.”

Yashutswe n’amahanga atera umugongo amavuko

Rusesabagina yatangiye kwandikwaho ibitaho ahagana mu 2000, icyo gihe akaba yari yaragiye i Burayi ariko agisurana n’umuryango wa Nyiramirimo na Gasasira.

Ubwo mu 2000 yari agiye guhabwa igihembo ‘Immortal Chaplains Prize for Humanity’ ni bo ba mbere yabimenyesheje.

Nyiramirimo ati “Icyo gihe Rusesabagina araduterefona ati baravuga ngo nakijije abantu ndetse bibanza no kudusetsa, tuti ese ni bangahe wakijije ku buryo baguhereye igikombe? Ati ‘ibyo aribyo byose iyo abantu bashatse kuguha inka, uri umuvandimwe, nawe ujya kureba iyo nka’.”

Nyiramirimo n’umugabo we bagiye kwifatanya na Rusesabagina, ariko nawe ubwe yemeraga ko ibikorwa bye abazungu babikabiriza, ariko ngo akumva ntacyo bimutwaye.

Ubwo mu matariki ya mbere Mata 2004 hari imyiteguro yo kwerekana bwa mbere filimi ‘Hotel Rwanda’, imyiteguro yarakozwe ndetse Nyiramirimo na Minisitiri w’urubyiruko, umuco na Siporo, Joseph Habineza babimenyesha inzego nkuru z’igihugu.

Filimi yari yarangiye, Terry George yemera kuyereka Abanyarwanda muri Stade Amahoro ku buntu.

Nyiramirimo ati “Terry George yaturutse muri Amerika aca i Bruxelles ngo azane na Rusesabagina kuko ari we mukinnyi w’imena wa Hotel Rwanda. Ari mu nzira, Rusesabagina yaramuhamagaye ati ‘ntabwo nkigiye mu Rwanda urajyana n’umugore wanjye, njye sinjya mu Rwanda’.”

“Naho Rusesabagina yavuganye n’Abafaransa bamubwiye bati urajya mu Rwanda kugirayo ute? Baranamuhamagara ahubwo ajya i Paris gutangayo ikiganiro n’abanyamakuru, atuka leta, avuga ko ari abicanyi, ko yagiye ahunze adashobora gukoza ikirenge mu Rwanda kandi hari hashize nk’amezi abiri avuye kwishyuza amafaranga ye muri ORTPN.”

Icyo gihe ngo byaratunguranye, ndetse ba Nyiramirimo batangira guhamagarwa babazwa ibyo inshuti yabo yavuze, bo babimubaza akabahakanira.

Dr Odette Nyiramirimo ni umwe mu bamenye byinshi kuri Rusesabagina mbere y'uko ava mu Rwanda

Ihinduka rye ntiryahutiyeho

Nyiramirimo yibuka umunsi umwe Rusesabagina yagiye mu Nteko Rusange y’ishyaka PL (Nyiramirimo aribereye Umunyamabanga Mukuru) i Nyamirambo, yerura ko ashaka kujya muri guverinoma ndetse abatwerera miliyoni y’amafaranga y’u Rwanda, avuga ko ashaka kuba minisitiri.

Ubushobozi bwe ariko bwarakemangwaga, bityo ngo atabonye uwo mwanya, nyuma y’ibikekwa ko hari abafite inyungu mu guhungabanya u Rwanda bamuhaye amafaranga, ahita ahindura imvugo.

Nyiramirimo ati “Hari nubwo yavuze ku Ijwi rya Amerika, nanjye nsaba ijambo ndamubwira nti ariko Paul (Rusesabagina) wagiye ureka kubeshya! Ejo bundi ntiwari aha? Kuki uvuga ngo ntabwo ushobora kugera mu Rwanda? Ko wari aha ko wararaga n’iwacu kuki ubeshya abantu? Nk’ubwo icyo gihe bahita bankupa ariko nari nabivuze.”

“Yari inshuti yacu, ariko iyo umuntu atannye, nk’umugabo wanjye yaramuterefonnye aramubwira ati rero Paul wari inshuti yanjye none wiyemeje kurwanya leta twebwe twemera, ni ukuvuga ko wafashe iyawe nzira, urabeho nkusezeyeho, arakupa. Ni iryo jambo rya nyuma twavuganye na Rusesabagina, ubwo hari mu ntangiriro za 2005.”

Rusesabagina mu nzira zirwanya leta

Nyiramirimo yakomeje agira ati “Kubera ko twamuvuze neza (Rusesabagina), bakamukina muri filimi, yumvise yabaye icyatwa, yumva yabaye igihangange, noneho ashaka uburyo yazabigeraho, akumva agomba guhirika leta, ariko birumvikana nta mbaraga afite. Icya kabiri ni Abafaransa bamuguze. Iyo abantu baguhaye amafaranga bati kora iki ukayakira, utanabikoze baguhitana.”

Uwo Rusesabagina wahoze ashimwa ko hari abo yagize uruhare mu kurokora, yaje guta inzira yahozemo ajya mu bikorwa byanagarutsweho mu rubanza rwa Ingabire Victoire, ko yagiranye ibiganiro na Habiyaremye Noël witandukanyije na FDLR, bagamije gushinga umutwe w’ingabo wundi bagamije gutera u Rwanda.

Rusesabagina wayoboraga ishyaka rya PDR/Ihumure rivuga ko rirwanya Leta, ngo yamusabye gushaka abasirikare bo muri FDLR kugira ngo abakangurire kwitandukanya nayo maze bagashinga ingabo z’umutwe wa PDR Ihumure.

Hanagaragaramo uburyo Habiyaremye yagiye n’i Burundi aherekeje uwitwa Lt Col Nditurende Tharcisse mu rwego rwo gushaka inkunga ariko akaba atarashoboye kugera kuri uwo mugambi kuko yafashwe uwo mutwe utarashingwa.

Habiyaremye yasobanuye ko umugambi wa Rusesabagina wari ugushaka ingabo zo gushyigikira umutwe wa politiki, kugira ngo nibaramuka bashyize igitutu ku mahanga agategeka u Rwanda kujya mu mishyikirano, nabo bazayereke ko bafite ingabo.

Uwo mugambi ngo warimo ibice bibiri: Icya mbere ni uko haramutse habayeho imishyikirano, izo ngabo zaba izo gutiza umurindi umutwe wa PDR/Ihumure nk’umutwe wa Politiki; icya kabiri kikaba ko igihe iyo mishyikirano yanze izo ngabo zafasha gutuma ibaho mu rwego rwo gushoza imirwano yatuma Leta yemera iyo mishyikirano.

Ni ibyo bikorwa byakomeje, kugeza ubwo umwaka ushize Rusesabagina yavuzwe hamwena Sankara Callixte mu mugambi w’ibitero byagabye ku baturage mu Ntara y’Amajyepfo, bigahitana inzirakarengane.

Ubu Rusesabagina yashyiriweho impapuro zisaba ko batabwa muri yombi kimwe na Kayumba Nyamwasa washinze RNC.

Rusesabagina yahawe ibihembo bitandukanye kubera filime yamugize igitangaza
Paul Rusesabagina (ibumoso) hamwe na Don Cheadle wakinnye ibikorwa bye muri filime Hotel Rwanda
Sophie Okonedo nawe akina muri filime Hotel Rwanda nka Tatiana Rusesabagina, umugore wa Rusesabagina ubwe
Mu kwerekana bwa mbere Hotel Rwanda, Rusesabagina yahuye n'abakomeye barimo icyamamare muri sinema, Angelina Jolie
Rusesabagina afatwa nk'intwari ku batamuzi, ariko abamenye ibikorwa bye babyamaganira kure
Hôtel des Mille Collines yabaye ihuriro ry'abantu batandukanye kuva kera kugeza ubu
Ku marembo ya Hôtel des Mille Collines mu Mujyi wa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza