Umusaruro w’imyaka 15 y’ubukangurambaga mu burezi bw’umwana w’umukobwa

Yanditswe na Iradukunda Serge
Kuya 29 Ukwakira 2020 saa 09:21
Yasuwe :
0 0

Uyu munsi iyo umuntu arebye aho u Rwanda rugeze mu guteza imbere uburezi n’uburere bw’umwana w’umukobwa, biragoye kwemera ko hari igihe kinini cyashize atemerewe kugera ku ntebe y’ishuri nka musaza we, kuko umuryango wamubonaga nk’uwo gukora imirimo yo mu rugo no kubyarira igihugu gusa, iby’amasomo akabirekera abahungu.

Nyuma ye Jenoside yakorewe Abatutsi mu 1994, Leta y’u Rwanda yahuye n’ikibazo gikomeye kirimo kurinda umutekano w’abaturage washoboraga kongera guhungabanywa isaha iyo ariyo yose, kubunga no kubafasha kwiteza imbere.

Ibi byose Leta yagombaga kubikora itirengagije urwego rw’uburezi rwari mu byashegeshwe cyane, by’umwihariko ikita ku burezi bw’umwana w’umukobwa wari waragiye yirengagizwa n’amateka.

Minisiteri y’uburezi igaragaza ko hashingiwe ku buryo abana bagana amashuri abanza, abahungu bitabiraga ishuri ku kigero cya 93.3% mu 2008, bagera kuri 97.3% mu 2016. Abakobwa bo mu 2008 bari ku gipimo cya 95.1%, mu 2016 bagera kuri 98.0%.

Imibare y’abakobwa mu mashuri yagiye izamuka kuko nko mu 2011, abigaga mu mashuri abanza bari 50.9%; abiga mu mashuri yisumbuye bari 51.5%; mu gihe urebye abigaga mu mashami ya siyansi bari 48.7% mu gihe abigaga imyuga bari 38.8%.

Mu 2011 kandi mu bigaga kaminuza, abakobwa bari 43.2%; wareba ku byo bigaga, muri koleji y’Ikoranabuhanga bari 17.4%, mu burezi ari 29.0% naho mu buforomo n’ububyaza ari 82.2%.

Iyo urebye mu mibare ya vuba, abakobwa bigaga muri kaminuza mu 2015 bari 42.4%, ariko ugendeye ku byo bigaga, muri siyansi bari 50.8% mu 2012 bagera kuri 55.2% mu 2016. Mu ndimi naho bavuye kuri 48.7% mu 2012, bagera kuri 56.6% mu 2016.

Minisiteri y’Uburezi igaragaza ko muri kaminuza za leta, umubare w’abakobwa hagati ya 2012 na 2016 iri hasi y’iy’abahungu, kuko aho babaye benshi hari mu 2013 bangana na 34.1%.

Ni mu gihe muri kaminuza zigenga, mu myaka itanu ishize usanga abakobwa biharira hejuru ya kimwe cya kabiri, mu mwaka ushize bakaba bari 51.8%. Uhurije hamwe kaminuza zose, kugera mu 2017 abagore barimo ni 42.4%.

Kugera kuri ibi byari urugamba rukomeye Leta yafatanyijemo n’imiryango y’abafatanyabikorwa itandukanye.

Umubare w'abana b'abakobwa bagana ishuri ugenda wiyongera

Imbuto Foundation yarahabaye

Imwe mu miryango yagize uruhare rukomeye mu kuzamura uburezi bw’umwana w’umukobwa ni Imbuto Foundation, dore ko uri no kwizihiza imyaka 15 ishize utangije gahunda y’ubukangurambaga mu guteza imbere uburezi bw’umwana w’umukobwa.

Umuyobozi mukuru wungirije wa Imbuto Foundation, Geraldine Umutesi, mu kiganiro yagiranye na RBA cyagarutse kuri uru rugendo rw’imyaka 15, yavuze ko rutari rworoshye iyo hataza kuba aha abafatanyabikorwa batandukanye.

Umutesi yavuze ko Imbuto Foundation yafashe umwanzuro wo gutangiza ubukangurambaga ku burezi bw’umwana w’umukobwa bigizwemo uruhare na Madamu Jeannette Kagame wawushinze, nyuma yo kubona ko hari abana baturuka mu miryango itifashije batabasha kwiga batagize ubafasha.

Umuryango Imbuto Foundation watangiye mu 2001 witwa PACFA, aho wafashaga abanduye agakoko gatera Sida, ariko uza kwinjira mu burezi nyuma yo kubona ko bikenewe.

Muri icyo gihe hari impungenge z’uko abana bose bazabasha kujya ku ishuri, cyane ko hari hashize igihe gito igihugu kivuye muri Jenoside yakorewe Abatutsi mu 1994 ndetse n’ingaruka zayo zirimo n’ubukene zikiri zose.

Umutesi avuga ko kuba n’ubundi uburezi bw’umwana w’umukobwa bwari busanzwe bujegajega, biri mu byatumye Madamu Jeannette Kagame atekereza ko hakorwa ubukangurambaga bugamije kubuzamura.

Ati “Nibwo Madamu Jeannette Kagame yetekereje ko dushobora gukora ubukangurambaga cyane cyane bushingiye ku guhera mu muryango, kuko ishingiro ry’ikibazo cyari umuryango, n’ubungubu ishingiro ry’ibibazo ni mu muryango.”

“Niko rero ubukangurambaga bwatangiye, bwo gukangurira ababyeyi, abayobozi, ibigo by’amashuri ndetse n’abakobwa ubwabo kujya mu ishuri ariko bajya no mu ishuri bakarigumamo bakarangiza ibyiciro byose, banarangiza ibyiciro byose ntibabirangize gusa ngo bumve ko barangije umokoro.”

Ubu bukangurambaga bwatangiye mu 2005 ndetse hahita hatangizwa na guhunda yo kurihirira no guhemba abana b’abakobwa baba batsinze neza ibizamini bya leta bazwi nk’Inkubito z’Icyeza.

Kugeza ubu binyuze muri iyi gahunda hamaze guhembwa abana b’abakobwa 5,088 banafite ihuriro ribafasha gukora ibikorwa byo gukangurira abandi bana b’abakobwa kugana ishuri kandi bagatsinda neza.

Umutesi avuga ko ubu bukangurambaga babutangiye bafite intego yo kugera ku bana b’abakobwa bose.

Ati “Dutangira ubu bukangurambaga icyerekezo cya mbere twahawe n’umuyobozi wacu ni ugutekereza buri mwana wese, ntabwo twari kuvuga ngo tuzageza kuri 80% ngo 20% basigare. Icyerekezo cyacu muri ubu bukangurambaga ni uko abana bose bajya mu ishuri bakagumamo, bakarangiza ibyiciro byose kandi bagatsinda ari indashyikirwa.”

Batsinda neza

Izi gahunda zigamije kuzamura uburere n’uburezi bw’umwana w’umukobwa za Leta na Imbuto Foundation zatanze umusaruro, ndetse zituma umubare w’abana b’abakobwa bagana ishuri wiyongera ndetse bagaragaza n’ubushobozi mu mitsindire.

Umuyobozi mukuru ushinzwe ibizamini bya Leta n’isuzumabumenyi mu Kigo cy’Igihugu cy’Uburezi (REB) Dr Alphonse Sebaganwa, avuga ko imibare y’abatsinda ibizamini bya Leta igaragaza ko abana b’abakobwa nabo bashoboye.

Ati “Iyo turebye mu bizamini bya Leta by’amashuri abanza nko mu myaka itanu ishize, ubona umubare w’abana b’abakobwa waragiye uzamuka. Ugereranyije no muri 2008, umubare w’abana b’abakobwa bakoze ibizamini bya Leta bavuye kuri 40% ubu bakaba bageze 55%, abahungu ari 45%, habayeho kujya mbere kugaragara cyane cyane mu mubare.”

Sebaganwa akomeza avuga ko n’umubare w’abana bitabira kujya mu masomo ajyanye n’ubumenyi wiyongereye.

Ati “Iyo ugereranyije imibare y’uyu munsi n’iyo mu 2016 abana b’abakobwa barangije mu mwaka wa gatandatu w’amashuri yisumbuye muri ibyo byiciro by’ubumenyi bari hagati ya 53% na 55% by’abana barangije bose, abagiye mu mashuri y’inderaburezi bagera kuri 60% ugereranyije n’abahungu bagera kuri 40%, haba muri ayo masomo ajyanye n’ubumenyi n’ay’inderaburezi, usanga abana b’abakobwa bari hejuru.”

Uretse aya masomo, Sebaganwa avuga ko n’umubare w’abana b’abakobwa abagana amashuri y’imyuga utangiye kuzamuka, kandi ntibibe mu mibare gusa kuko banatsinda neza.

Ati “Ikindi navuga ni uko atari umubare uzamuka gusa, ahubwo abana b’abakobwa basigaye bagaragara mu bana ba mbere haba muri siyansi ndetse no mu yandi masomo […] ntabwo ari ikibazo cy’imibare gusa, ahubwo n’abana b’abakobwa basigaye baza imbere cyane no mu manota.”

Kuba umubare w’abana b’abakobwa bagana ishuri by’umwihariko mu masomo ya siyansi ugenda wiyongera kando bagatsinda neza, Dr Sebaganwa abihuriyeho n’Umuyobozi wa Ecole des Sciences Byimana, Crescent Karerangabo.

Yavuze ko muri iri shuri ayoboye, abana b’abakobwa bitabira kwiga amasomo ya siyansi ku bwinshi kandi bagatsinda neza.

Ati “Abana b’abakobwa badusanga mu mashuri yigisha amasomo ya siyansi bagenda biyongera ku buryo bushimishije […] mu by’ukuri ubu nta gitandukanya abana b’abakobwa n’abana b’abahungu mu guhitamo, ahubwo imyanya ihari igabanywa kimwe kuri bose.”

“Muri Ecole des Sciences Byimana abana bitabira kwiga siyansi bageze ku kigero cya 47% […] ibi ndabivuga mbyishimiye kuko iri shuri kera ryari iry’abana b’abahungu gusa, nyuma rero abarishinzwe bahisemo ko twigisha ibya siyansi, ni nabwo twatangiye kwakira abana b’abakobwa. Ubu ishuri ryakira abana basaga 1000 ryaratangiye hinjiramo umwana w’umukobwa bwa mbere ubu tukaba tugeze ku kigero cya 47%, ni intambwe ishimishije.”

Karerangabo yakomeje avuga ko abakobwa batsinda neza.

Ati “Iyo ndebye nk’umusaruro twabonye umwaka ushize mu kizamini cya Leta, mu bagikoze bose 45% ni abakobwa kandi batsinze neza pe barimo n’abujuje.”

Abana b'abakobwa batinyutse n'amasomo ya siyansi
No mu mashuri abanza n'ayisumbuye hagaragara umubare munini w'abakobwa
Imbuto Foundation yagize uruhare rukomeye mu kuzamura uburezi n'uburere bw'umukobwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .