Imodoka zikoresha Gaz Méthane zishobora kwinjira ku isoko ry’u Rwanda

Yanditswe na Julien Niyingabira Mahoro
Kuya 2 Ugushyingo 2018 saa 05:30
Yasuwe :
0 0

Abacuruza imodoka zikoresha Gaz Méthane mu Burusiya, barifuza kwagurira ibikorwa byabo mu Rwanda nka kimwe mu bihugu bifite iyo Gaz mu kiyaga cya Kivu, kandi cyatangiye no kuyibyaza umusaruro.

Kompanyi yitwa IPS (Integrated Project Solutions), yamaze kugaragariza Ambasaderi w’u Rwanda mu Burusiya, Dr Mujawamariya Jeanne d’Arc, ubushobozi n’ubwiza bw’izo modoka zishobora kuzafasha u Rwanda gukemura ikibazo cy’ubwikorezi rusange bw’abantu.

Imodoka (Bus) abo bakozi bitwaje kugira ngo berekane ireme ry’izo bifuza gushyira ku isoko ry’u Rwanda, iri mu bwoko bwa Vihr (Вихрь) ikaba ifite intebe 24, umwanya w’abagenzi bagenda bahagaze bagera kuri 57 ndetse n’umwanya ushobora kugendamo umuntu ufite ubumuga umwe uri mu kagare.

Ifite ibyuma (amortisseurs) zituma yigira hasi kugira ngo ufite ubumuga abashe kwinjizwa no kugezwa mu mwanya wamugenewe bitagoranye.

Ifite kandi ikigega itwaramo gaz kiyibashisha kunywa igera kuri litiro 1300, bityo iyo yuzuye ikaba ishobora gukora ibilometero biri hagati ya 450 na 520 itarakenera kunywesha indi.

Zifite kandi ubushobozi bwo kugenda mu misozi, dore ko uruganda ruzikora rwakoze inyigo y’imihanda yo mu Rwanda rukaba ruhamya ko izi modoka zayishobora. Ubusanzwe zikoreshwa mu bice bimwe na bimwe by’u Burusiya, zikaba zifite umwihariko wo kudasohora imyuka ihumanya ikirere nk’izikoresha ibikomoka kuri peteroli.

Igihe izi modoka zizaba zinjiye ku isoko ry’u Rwanda, abazikora bizabasaba kubaka sitasiyo za Gaz methane, aho izi modoka zizajya zinywesha. Biteguye kuzubaka muri Rusizi, Rubavu na Kigali bafatiye ku burebure bw’umuhanda uhuza iyo mijyi uko ari itatu.

Ambasaderi Mujawamariya yashimye uko izi modoka zikozwe ndetse n’ibisobanuro yazihaweho cyane cyane agaciro kahawe abazigendamo hatibagiranye abafite ubumuga. Ibi bikaba biri mu murongo w’u Rwanda wo kwita no kurengera abafite ubumuga.

U Rwanda ruri ku isonga mu kurwanya imyuka ihumanya ikirere, kurinda abaturage barwo indwara ziterwa n’ihumana ry’ikirere no kubungabunga ibidukikije.

Abikorera baramutse bayobotse ubwo buryo bwo gukoresha Gaz méthane mu gutwara abantu n’ibintu, bishobora kubyara igisubizo gikomatanye mu kurwanya ikwirakwizwa ry’imyuka ihumanya ikirere ndetse no kubona umuti w’ikibazo cy’ubwikorezi rusange cyane cyane mu Mujyi wa Kigali.

Izi modoka kandi zaba ziyongera kuri moto zikoresha amashanyarazi mu mwanya w’ibikomoka kuri peteroli, zatangiye zatangiye kugeragerezwa mu Rwanda.

Ifite intebe 24, umwanya w’abagenzi bagenda bahagaze bagera kuri 57 ndetse n’umwanya ushobora kugendamo umuntu ufite ubumuga
Ifite ibyuma (amortisseurs) zituma yigira hasi kugira ngo ufite ubumuga abashe kwinjizwa no kugezwa mu mwanya wamugenewe bitagoranye
Ambasaderi Mujawamariya yeretswe iyi modoka yitezweho gukemura ikibazo cy'ubwikorezi rusange bw'abantu no gutanga umusanzu mu kurengera ibidukikije
Iyo yuzuye Gaz Méthane ishobora gukora ibilometero biri hagati ya 450 na 520 itarakenera kunywesha indi
Iyi modoka ikoresha Gaz Méthane ishobora kwinjira ku isoko ry'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza