Ingingo z’ingenzi zihariye ameza y’ibiganiro hagati y’u Rwanda na Uganda

Yanditswe na Philbert Girinema
Kuya 14 Ukuboza 2019 saa 05:37
Yasuwe :
0 0

Amasura y’abayobozi b’u Rwanda nyuma y’ibiganiro byabahuje na Uganda byiga ku ishyirwa mu bikorwa ry’amasezerano ya Luanda, atanga ishusho y’ibyaganiriweho n’uburyo byagenze mu buryo bubiri: Gutenguhwa no kutanyurwa.

Mu gitondo cya kare ku wa Gatanu, uhereye ku baminisitiri bane bagiye muri Uganda kugera ku bandi bayobozi mu nzego zitandukanye bari babagaragiye, bari bafite ibakwe, bakereye urugendo rugamije impinduramatwara mu mibereho y’Abanyarwanda by’umwihariko gushyira iherezo ku mpamvu zose zituma bafatwa bagatabwa muri yombi.

Itsinda ry’u Rwanda yageze i Kampala ahagana saa sita z’amanywa ku isaha y’i Kigali, yakirwa abayobozi ba Ambasade y’u Rwanda muri Uganda bayobowe na Rtd Gen Maj Frank Mugambage; ndetse hari abayobozi ba Ambasade ya Uganda mu Rwanda barimo Ambasaderi Oliver Wonekha na Anne Katusiime, Charge’ d’Affaires muri Ambasade ya Uganda mu Rwanda.

Bavuye ku kibuga cy’indege berekeza kuri Munyonyo Speke Resort, bafata ifunguro rya saa sita hanyuma bajya mu cyumba cy’inama cy’iyi hoteli aho ibiganiro byagombaga kubera.

Abanyamakuru bakimazemo iminota itarenze 15 bahita basohorwa hatangira ibiganiro mu muhezo. Nta muntu n’umwe ku ruhande rw’u Rwanda wigeze asohoka mu cyumba cy’ibiganiro muri uwo mwanya wose.

-  Abagabye igitero mu Kinigi bahawe karibu muri Uganda

Ibiganiro byibanze ku kureba aho inama y’ubushize yari yasubikiye, u Rwanda rugaragaza ko rwabonye Uganda ifite umuhate muke mu gushyira mu bikorwa amasezerano ya Luanda n’itangazo ryashyiriweho umukono i Kigali.

Umunyamabanga wa Leta muri Minisiteri y’Ububanyi n’amahanga, Amb. Nduhungirehe Olivier ati “Twabonye ahubwo gututumba kw’ibibazo u Rwanda rutahwemye kugaragariza bagenzi bacu muri Uganda ndetse n’abahuza.”

Yakomeje avuga ko “Gushyigikira imitwe yitwaje intwaro igamije guhungabanya umutekano w’u Rwanda no guta muri yombi Abanyarwanda muri Uganda ntibyigeze bihagarara. Abarwanyi n’abayobozi b’iyi mitwe bakomeje guhabwa ubufasha no koroherezwa kunyura muri Uganda bafashijwe n’abarimo abayobozi bakuru muri Guverinoma.”

Yatanze urugero rw’ijoro ryo ku wa 3 rishyira ku wa 4 Ukwakira 2019, ku gitero cyagabwe mu Murenge wa Kinigi mu Karere ka Musanze mu Ntara y’Amajyaruguru bigizwemo uruhare n’Umutwe w’abarwanyi wa RUD-Urunana.

Iki gitero cyaturutse mu Burasirazuba bwa Repubulika Iharanira Demokarasi ya Congo, hafi y’umupaka wa Uganda na Pariki y’Igihugu y’Ibirunga.

Benshi muri abo barwanyi barishwe, abandi bafatwa mpiri ari bazima. Nyuma yaho, yavuze ko ibimenyetso bifatika byakusanyijwe, bivuye kuri telefoni zabo ndetse n’ubuhamya bw’abafashwe.

Ati “Hari nimero ya telefoni yo muri Uganda byagaragaye ko yakoreshwaga mu kuvugana n’abo barwanyi mbere no mu gihe igitero cyagabwemo. Iyo nimero byaje kugaragara ko ari iy’Umunyamabanga wa Leta ya Uganda ushinzwe Imibanire n’Akarere, Philemon Mateke.”

Yabwiye abari bitabiriye ko nyuma y’igitero, “batatu muri abo barwanyi bahungiye mu Karere ka Kisoro muri Uganda, aho bamaze igihe gito bakahakurwa boherezwa mu Kigo cya gisirikare cya Makenke mu Karere ka Mbarara mbere yo gukomereza ku Cyicaro cy’Urwego rw’Ubutasi rwa Uganda (CMI) kiri i Mbuya mu Mujyi wa Kampala.”

Ambasade y’u Rwanda muri Uganda yohereje inyandiko (notes verbales) kuri icyo kibazo ku wa 14 Ukwakira 2019. Kugeza magingo aya ntirasubizwa.

-  Gufunga Abanyarwanda

Itabwa muri yombi no gufunga Abanyarwanda binyuranye n’amategeko yavuze ko bitigeze bihagarara nyuma y’amasezerano ya Luanda mu gihe ubwo yajyagaho Abanyarwanda bayakirije yombi bumva ko agiye gukemura ibibazo.

Ati “Mu by’ukuri, urebye kuva twasinya amasezerano mu mezi ashize, haracyari Abanyarwanda benshi bari muri gereza za CMI binyuranye n’amategeko n’abari mu nzu zitazwi zifungirwamo abantu muri Uganda ndetse n’abandi baracyafatwa bagashimutwa.”

“Dufashe urugero, mu byumweru bibiri bishize, ku wa Mbere tariki 25 Ugushyingo 2019, Abanyarwanda barenga 150 babaga n’abakorera muri Uganda bakusanyirijwe mu Karere ka Kisoro, hanyuma abagera kuri 33 bajugunywa ku mupaka. Impamvu nkuko byahoze n’ubundi ni uko aba bantu ari Abanyarwanda.”

Yavuze ko usibye ubufasha bukomeje guhabwa imitwe yitwaje intwaro, guta muri yombi no gutoteza Abanyarwanda hakomeje n’ibikorwa by’icengezamatwara rinyuzwa mu itangazamakuru bya Uganda.

Ati “Twababajwe no kongera kubona ko mu mezi ashize, itangazamakuru rya Uganda ririmo n’irya Leta ryarakomeje gusakaza ibihuha byerekeye igihugu cyacu, perezida wacu n’abaminisitiri bacu, baha ikuzo abanzi bacu. Ibi binyuranye n’inyandiko y’itangazo rya Kigali ndetse n’amasezerano ya Luanda.”

Yasabye kandi Uganda kugabanya kuvuga ko ikibazo ifitanye n’u Rwanda gishingiye ku ‘ifungwa ry’umupaka’ mu gihe ari ikibazo gishingiye ku busugire bw’igihugu n’umutekano ndetse no guturana neza.

-  Ubucuruzi bwarahazahariye

Ingaruka z’uyu mubano utameze neza zibangamiye ubucuruzi hagati y’ibihugu byombi.

Amb Nduhungirehe yibajije uko wakora ubucuruzi mu gihe abashoramari b’Abanyarwanda banyura ku mupaka byemewe n’amategeko bagafatwa mu buryo buhoraho, bagatotezwa, ibicuruzwa, amaduka n’imitungo byabo bigafatirwa.

Ati “Ni gute twavuga ko urujya n’uruza rw’abantu n’ibintu na serivisi byubahirizwa mu gihe imigenderanire yakomwe mu nkokora? Ifungwa ry’umupaka ni yo mpamvu. Ni itabwa muri yombi n’ifungwa ry’abantu bakora ubucuruzi.”

Gusa yashimangiye ko u Rwanda rufite icyizere ko ibi bibazo bizagera igihe bigakemuka burundu. Ati “Hari icyizere ko abatuye mu Majyaruguru, Iburasirazuba no ku mupaka w’u Rwanda mu Majyepfo bazabaho batekanye, nta bwoba bwo guterwa n’imitwe y’iterabwoba, yisuganyirije ndetse igafashwa n’igihugu cy’igituranyi.”

“Hari icyizere ko urubyiruko rw’u Rwanda rutazongera gufatwa no gukorerwa iyicarubozo mu gihe rwambutse umupaka rugana muri Uganda rwatashye ubukwe, rwasuye inshuti n’abavandimwe, ruri mu bucuruzi nkuko byakorwaga mu bihe bitandukanye.”

-  Ikibazo cy’umubyeyi wibwe umwana cyagarutsweho

Kayirere Julienne ni Umunyarwandakazi wamburiwe umwana we muri Uganda nyuma inzego z’umutekano muri icyo gihugu zikamubwira ko yapfuye.

Kayirere ukomoka mu Karere ka Ruhango, ku wa 5 Kanama 2017 nibwo yagiye muri Uganda agiye gushaka akazi, aho yagezeyo agatangira ubucuruzi bw’imyenda yakoreraga mu gace ka Mubende.

Muri icyo gihe, yari amaze ukwezi abyaye umwana w’umukobwa, amujyana muri Uganda. Yagezeyo, umunsi umwe aza gufatwa arafungwa ashinjwa kutagira ibyangombwa. Yatandukanyijwe n’umwana aho arekuriwe abwirwa ko we yapfuye mu gihe azi neza ko akiriho.

Ati “Mu gihe twahuye, twizeye ko umubyeyi wibwe umwana we kuko ari Umunyarwanda, azongera akamubona.”

Kuva muri Mutarama 2018, Abanyarwanda 1438 bajugunywe ku mipaka nyuma y’igiye bafungiwe muri kasho z’Urwego Rushinzwe Iperereza rya Gisirikare (CMI) n’Urwego Rushinzwe Iperereza mu gihugu (ISO) bakorerwa iyicarubozo.

Umunyamabanga wa Leta muri Minisiteri y’Ububanyi n’Amahanga, Nduhungirehe Olivier, yagaragaje ko hakiri ibikibangamiye Abanyarwanda muri Uganda ndetse umutekano wabo utizewe
Minisitiri w’Ububanyi n’Amahanga wa Uganda, Sam Kutesa, ni we wari uyoboye Intumwa za Uganda mu biganiro byabereye muri icyo gihugu
Minisitiri w’Umutekano Gen Patrick Nyamvumba ari mu bitabiriye ibi biganiro ku ruhande rw'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza