Inteko yemeje umushinga wemerera RwandAir gutangiza ingendo mu byerekezo bitanu bishya

Yanditswe na Uwimana Abraham
Kuya 20 Ugushyingo 2020 saa 09:16
Yasuwe :
0 0

Inteko Ishinga Amategeko yemeje amasezerano y’ubufatanye mu bwikorezi bw’indege Sosiyete ya RwandAir yasinyanye n’ibihugu bitanu, ayemerera gutangira ingendo mu byerekezo bitanu bishya.

Aya masezerano aheruka, u Rwanda rwayasinyanye na Brazil, Repubulika ya Demokarasi ya Kongo, Namibia, Somalia na Tunisia. Ibi byatumye ibihugu byose byasinyanye aya masezerano n’u Rwanda bigera kuri 52, hakaba hanitegurwa gusinyana amasezerano na Koreya y’Epfo na Malta.

Gahunda yo kwagura ibikorwa bya RwandAir yakomwe mu nkokora na Coronavirus, gusa Minisitiri w’Ibikorwa remezo, Claver Gatete, yavuze ko amasezerano azafasha mu kwagura ibikorwa, bizanatuma sosiyete zindi zo muri ibyo bihugu zigirana amasezerano n’u Rwanda yo gutwara abantu n’ibintu.

U Rwanda rumaze gushora agera muri miliyari $2 yo gufasha RwandAir kuzanzamuka ndetse ruherutse no gusinyana amasezerano na Qatar azafasha mu guteza imbere serivisi z’ubwikorezi.

Minisitiri Gatete yabwiye Inteko Ishinga Amategeko ko u Rwanda nk’igihugu kidakora ku nyanja, ubwikorezi bwo mu kirere ari cyo gisubizo.

Yagize ati “Nk’igihugu kidakora ku nyanja, nta buryo dufite bwo gukora ubucuruzi bwambukiranya imipaka tudakoresheje ikirere ndetse tunatera inkunga RwandAir ngo yerekeze mu byerekezo byinshi bitandukanye, kugira ngo igaragaze isura nziza y’igihugu, inakuze dipolomasi.’’

Umuyobozi Mukuru wa Rwandair, Manzi Makolo Yvonne, yavuze ko amasezerano y’ubufatanye mu bwikorezi bw’indege abafitiye akamaro, akaba azanafasha mu gutangira ingendo zigana mu byerekezo bishya.

Yagize ati “Mu by’ukuri kubera imbogamizi zatewe n’icyorezo, bizadusaba kongera kubaka imigenderanire, dutangire kwerekeza mu byerekezo bishya twendaga gutangiza, gusa ibi nibirangira tuzanerekeza no mu bindi byerekezo.”

Mu Ukwakira u Rwanda rwabaye igihugu cya 13 cyasinye ku masezerano ya AFCAC (African country to ratify the revised African Civil Aviation Commission) agamije guteza imbere ubugenzuzi, imikoreshereze myiza n’iterambere rirambye rya serivisi z’ubwikorezi bwo mu kirere muri Afurika.

Inteko Ishinga Amategeko yemeje umushinga wemerera RwandAir gutangiza ingendo mu byerekezo bitanu bishya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .