Ishimwe n’imihigo by’abayobozi bashyizwe muri Guverinoma

Yanditswe na Habimana James
Kuya 5 Ugushyingo 2019 saa 01:30
Yasuwe :
0 0

Perezida Kagame ku mugoroba wo ku wa 4 Ugushyingo 2019 yatangaje impinduka muri Guverinoma yinjijwemo abaminisitiri batanu bashya mu gihe abagera kuri babiri bahinduriwe inshingano.

Ni inshingano nshya kuri bamwe, mu gihe abandi Minisiteri zabo zongereweho indi mirimo.

Mu butumwa bamwe banyujije ku mbuga nkoranyambaga zirimo Twitter bashimye icyizere bagiriwe na Perezida Paul Kagame.

Mu bayobozi bashyizweho barimo Dr Vincent Biruta wagizwe Minisitiri w’Ububanyi n’Amahanga n’Ubutwereran; Dr Mujawamariya Jeanne d’Arc agirwa Minisitiri w’Ibidukikije; Minisitiri w’Umutekano mu Gihugu yabaye Gen Patrick Nyamvumba; Minisitiri wa Siporo ni Aurore Mimosa Munyangaju naho Minisitiri w’Urubyiruko n’Umuco ni Mbabazi Rosemary.

Uretse aba, Perezida Kagame kandi yashyizeho abanyamabanga ba leta muri za minisiteri, barimo Umunyamabanga wa Leta muri Minisiteri y’Urubyiruko n’Umuco, Bamporiki Edouard; Umunyamabanga wa Leta muri Minisiteri y’Ubutegetsi bw’Igihugu ushinzwe Imibereho myiza y’Abaturage yagizwe Nyirarukundo Ignatienne.

Mu bandi bahawe imyanya harimo Umunyamabanga uhoraho wa Minisiteri y’Uburinganire n’Iterambere ry’Umuryango, Ingabire Assoumpta; Umunyamabanga uhoraho wa Minisiteri ya Siporo, Didier Shema Maboko n’Umunyamabanga uhoraho wa Minisiteri y’ubutegetsi bw’igihugu Samuel Dusengimana.

Perezida Kagame kandi yanashyizeho Dr Rose Mukankomeje ku mwanya w’Umuyobozi Mukuru w’Inama Nkuru y’Amashuri Makuru na za Kaminuza; Tito Rutaremara yagizwe Umuyobozi Mukuru w’Urwego rw’Igihugu Ngishwanama rw’Inararibonye mu gihe Marc Kabandana ari umwe mu bagize urwo rwego.

Nyuma yo guhabwa izi nshingano, bamwe mu bayobozi bagaragaje akanyamuneza ko gushingwa imirimo ikomeye yo gukorera igihugu cyabibarutse.

Minisitiri w’Urubyiruko n’Umuco, Mbabazi Rosemary, yanditse kuri Twitter ashimira Perezida Kagame wamugiriye icyizere, anizeza kunoza inshingano ze.

Yagize ati “Mfashe uyu mwanya nshimira Perezida Paul Kagame ku bw’ubuyobozi bwe bufite icyerekezo no kuduha inshingano zo gukorera igihugu cyacu. Ndizeza gukoresha umurava n’ubushishozi bwanjye bwose.’’

Umunyamabanga wa Leta muri Minisiteri y’Urubyiruko n’Umuco, Bamporiki Edouard, na we yashimangiye ko yiteguye gukomeza gukorera igihugu.

Yagize ati “Witaba kare ugatumwa kure, watumwa n’Umukuru ugashima ushingura ugana iyo utumwe, ubutumwa mumpaye Nyakubahwa Mutoza w’Ikirenga nzabusohoza bwemye, nzaharanira kutaruta ubutumwa kuko buruta intumwa, nzaba mudahusha ku ruhembe muntumye kurasaniraho. U Rwanda nirweme.”

Ishimwe ry’aba bayobozi no kwemera gukorana umurava inshingano nshya aba bayobozi muri Guverinoma y’u Rwanda barihuriyemo n’abahawe indi myanya.

Tito Rutaremara wahoze ari Umusenateri, akaba yagizwe Umuyobozi Mukuru w’Urwego rw’Igihugu Ngishwanama rw’Inararibonye, mu magambo make yabwiye IGIHE ati “Nishimiye inshingano nshya nahawe.”

Umuyobozi Mukuru wa HEC, Dr Mukankomeje Rose, yakomeje avuga ko yishimiye umwanya yahawe.

Yagize ati “Mbikuye ku mutima, ndashimira Perezida wa Repubulika y’u Rwanda icyizere yangiriye akanshinga kuyobora HEC. Mwijeje kuzakorana umurava imirimo yanshinze.”

Dr Mujawamariya Jeanne d’Arc wagizwe Minisitiri w’Ibidukikije, abinyujije kuri Twitter yashimiye Perezida Kagame wamugiriye icyizere, yizeza abanyarwanda kutazabatenguha.

Ati "Ndashimira byimazeyo Perezida wa Repubulika akaba n’Umugaba w’Ikirenga w’ingabo z’igihugu, Intore izirusha intambwe, ku cyizere yongeye kungirira anshinga kuyobora Minisitere y’ibidukikije. Sinzamutererana, sinzatetereza abanyarwanda, nzakomeza gukorana umurava imirimo nshinzwe."

Munyangaju Aurore Mimosa winjiye bwa mbere muri Guverinoma yashimye inshingano yahawe zo kuba Minisitiri wa Siporo.

Abinyujije kuri Twitter ye yagize ati “Mbikuye ku mutima nshimiye Nyakubahwa Perezida wa Repubulika y’u Rwanda ku cyizere yangiriye akanshinga kuyobora Minisiteri ya Siporo. Nishimiye inshingano mwampaye mbizeza ko ntazabatenguha kandi ko nzakorana umurava kugira ngo ntange umusaruro.’’

Munyangaju yari asanzwe ari Umuyobozi Mukuru mu Kigo cy’Ubwishingizi, SONARWA, ashinzwe Ishami ry’Ubuzima (SONARWA Life). Mu yindi mirimo yakoze harimo ko yabaye Umuyobozi ushinzwe ubugenzuzi mu Nama y’Ubutegetsi y’Ikigo cy’Imari “Copedu Plc’’.

Dr. Rose Mukankomeje yavuze ko azakoresha imbaraga mu kazi yahawe
Minisitiri w’Urubyiruko n’Umuco, Rosemary Mbabazi, yavuze ko yiteguye kunoza inshingano ze
Tito Rutaremara wagizwe Umuyobozi Mukuru w’Urwego rw’Igihugu Ngishwanama rw’Inararibonye yavuze ko yishimiye imirimo mishya
Umunyamabanga wa Leta muri Minisiteri y’Urubyiruko n’Umuco, Bamporiki Edouard, yavuze ko azaharanira kutaruta ubutumwa yahawe
Dr Mujawamariya Jeanne d’Arc wagizwe Minisitiri w’Ibidukikije, abinyujije kuri Twitter yashimiye Perezida Kagame wamugiriye icyizere, yizeza abanyarwanda kutazabatenguha
Minisitiri wa Siporo, Aurore Mimosa Munyangaju, yavuze ko azitangira akazi yahawe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza