Kigali: Ikibazo cy’amazi yahagarikaga ingendo kuri Nyabarongo cyahawe amezi atatu

Yanditswe na Habimana James
Kuya 29 Mutarama 2019 saa 02:04
Yasuwe :
0 0

Minisiteri y’Ibikorwaremezo (Mininfra) yemeje ko imvura yo muri Mata uyu mwaka izasanga hamaze kubakwa igice cy’umuhanda uva ku kiraro cya Nyabarongo ugana ku karere ka Kamonyi, gikunze kurengerwa n’amazi bikabangamira urujya n’uruzwa rw’abantu n’ibinyabiziga.

Mininfra yatangaje inyigo yo kubaka aka gace igomba kurangirana na Mutarama uyu mwaka, ubundi hagatangira kubakwa aka gace, ibintu bizatwara miliyari 2.5 Frw.

Byari bimaze kumenyerwa ko mu mezi agwamo imvura nyinshi cyane, umugezi wa Nyabarongo ari nawo muremure cyane mu gihugu, wuzura ukarenga ikiraro, bikagira ingaruka ku ngendo zikorwa mu mihanda irimo uwa Ngororero-Muhanga n’uhuza Kigali n’Intara y’Amajyepfo.

Mu 2016 uyu mugezi waruzuye hashira iminsi igera muri itatu abakora ingendo bava i Kigali berekeza mu Ntara y’Amajyepfo n’abahava bajya i Kigali zihagarara. Iki kibazo cyongeye kugaragara mu mpera za Mata 2017 ubwo wuzuraga ugahagarika zimwe mu ngendo amasaha atari make.

Mu kiganiro yahaye IGIHE, Umuyobozi w’ishami rishinzwe ubwikorezi muri Minisiteri y’ibikorwaremezo, Byiringiro Alfred, yavuze ko harimo gukorwa inyigo kuko ngo byagaragaye ko kiriya kiraro cya Nyabarongo ataricyo kirengerwa ahubwo harengerwa igice cy’ubutaka uvuye ku kiraro usubira ahitwa Kamuhanda muri Kamonyi.

Yavuze ko aho hantu hamanutse hasi mu gihe amazi aje mu muhanda agasa nk’atemba agaruka ku kiraro.

Ati “Ubu igisubizo dufite ni uko harimo gukorwa inyigo n’ikigo cy’Abashinwa yitwa China Road and Bridge Corporation kugira ngo tuzamure ubwo butaka bwo hirya. Iyo nyigo irimo kurangira uretse ka raporo ntiraboneka ariko byari biteganyijwe ko yaba irangiye bitarenze ukwezi kwa Mbere, amafaranga yo yamaze kuboneka yo kuhazamura.”

“Ikibazo gihari ni uko munsi ya buriya butaka hari inzira z’amazi, icyo tuzakora zizavugururwa zihabwe ubunini buhagije ku buryo amazi aza agashobora guhita. Twasanze ko igihe cyagiye gishira hagiye hazamo ibyondo bikagenda bigabanya bwa bushobozi bwa ya mateme aca munsi ya bwa butaka, imvura yagwa amazi ntabone aho anyura munsi y’umuhanda.”

Uyu muyobozi yavuze ko uyu muhanda uzazamurwaho santimetero 75 ariko inyigo ngo niyo izabyemeza.

Ati “Gahunda ihari ni uko imvura y’ukwezi kwa Kane izasasnga byose byararangiye kandi twumva bizatanga umuti urambye.”

Muzindi gahunda zihari zo gukemura ikibazo, Minisiteri y’ibikorwaremezo yatangaje ko kubera ko leta y’u Rwanda ifite gahunda yo gusana umuhanda Kigali-Muhanga-Akanyaru, hari ikindi kiraro kizubakwa iruhande rw’ikihasanzwe kuri Nyabarongo kizaba gifite inzira enye, ibi nabyo bikazagabanya ikibazo cyo kurengerwa n’amazi kuko kizaba kiri hejuru.

Iki gice cyo hakurya ya Nyabarongo kigiye kwigizwa hejuru
Mininfra ivuga ko amateme aca munsi y'uyu muhanda atagikora
Iyo imvura ibaye nyinshi, uyu muhanda uhagarika ingendo
Uyu muhanda uzuzura utwaye miliyari 2.5 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza