Kiliziya Gatolika yitandukanyije n’itsinda rikora nk’abihayimana rishingiye ku biyise Intwarane

Yanditswe na Rabbi Malo Umucunguzi
Kuya 30 Gicurasi 2020 saa 12:04
Yasuwe :
0 0

Kiliziya Gatolika mu Rwanda yatangaje ko yitandukanyije n’itsinda rishingiye ku biyise ‘Intwarane’, bashinze umuryango w’abamonaki ukora nk’uw’abihayimana ariko utemera amabwiriza yayo, ku buryo ngo wakomeje guteza imvururu.

Mu itangazo ryashyizweho umukono n’umushumba wa Arkidiyosezi ya Kigali, Musenyeri Antoine Kambanda kuri uyu wa Gatandatu, yavuze ko iryo tsinda ry’abasore n’inkumi ridasahaka kumvira amabwiriza ya Kiliziya Gatolika, ndetse mu nama bagiranye “byagaragaye ko batiteguye kugira icyo bubahiriza ngo bakurikize intambwe ngombwa z’imiryango y’abihayimana ikivuka nk’iyo”.

Yakomeje ati “Dutangaje ku mugaragaro ko iryo tsinda ritenewe muri Kiliziya Gatolika. Duhamagariye abarigize n’abateganyaga kuryinjiramo gukurikiza amabwiriza ya Kiliziya n’ay’igihugu cyacu, bakareka umwambaro w’Abihayimana.”

Ni itsinda rimaze iminsi

Musenyeri Kambanda yagaragaje ko ari itsinda rishingiye ku biyise Intwarane za Yezu na Mariya ryavuzwe cyane mu myaka ishize.

Mu mwaka wa 2013 itsinda ry’Intwarane 11 ryatawe muri yombi rishaka kwinjira mu rugo rwa Perezida Kagame, rikurikiranwaho ibyaha birimo gushaka kubangamira umudendezo w’igihugu no gukora imyigaragambyo mu buryo bunyuranyije n’amategeko. Mu 2015 Urukiko rw’Ikirenga rwabahanaguyeho ibyaha.

Uretse ibyaha babajijwe mu buryo bw’inkiko, Musenyeri Kambanda avuga ko bakomeje kuvangira Kiliziya Gatolika, yagerageza kubegera bakavuga ko “ibyo bakora byose bitagibwaho impaka.”

Ngo bajyaga kuri Paruwasi za St Michel na Sainte Famille bakavuga amagambo mabi kuri Kiliziya, ku bakirisitu, ku biyeguriye Imana, ku buryo byarangiraga abapadiri biyambaje polisi kugira ngo ibafashe.

Ubu ngo bashinze umuryango i Kabuga ukora nk’uw’abihayimana, banadodesha imyenda ibaranga isa n’iy’ababikira bo mu muryango nk’uw’Abakarumerita b’i Nyamirambo. Wiyise umuryango w’abamonaki ugamije gusana umutima mutagatifu wa Yezu na Mariya, Monastic Sisters and Brothers/Monks of Reparation and Consolation of the Sacred Heart of Jesus and Mary.

Musenyeri Kambanda avuga ko ari itsinda ry’abakobwa bageze kuri 20, hakaba n’abahungu babajemo. Ngo batangiye bakorera muri Diyosezi ya Gikongoro muri Nyaruguru, Musenyeri waho arabirukana kuko batemeraga gukurikiza amabwiriza n’umurongo wa Kiliziya.

Ni itsinda ngo ryiganjemo abakomoka mu duce twinshi tw’igihugu n’abakomoka i Kisoro muri Uganda.

Kambanda ati “Baza hano rero nabwo ntawe babisabye, ariko bose umuzi ushamikiya ku bitwa Intwarane […] Buri umwe afite paruwasi akomokamo, yabatirijwemo, yakomerejwemo, hari n’abavuye mu miryango y’abiyeguriye Imana, tubasaba ko buri umwe ajya muri paruwasi ye, akagirwa inama zo gusengana n’abandi no gukorana n’abandi, hakurikijwe uko Kiliziya yemera kandi yigisha.”

Mu Ntwarane ngo harimo umuntu uvuga ko abonekerwa [Chantal Mutamba], akababwira ibyo Imana ibasaba gukora ku buryo ibyo Kiliziya Gatolika ibabwira byose batabyitaho kuko bo bivuganira n’Imana.

Kambanda yakomeje ati “Hari uburyo bunyurwamo kugira ngo umuryango w’abiyeguriye Imana ushingwe, wemerwe, uhabwe umwambaro. Ubwo rero bagiye bagirwa inama kugira ngo bakurikize ubwo buryo, ariko bo bakavuga ko bavugana n’Imana, ko badakeneye kunyura mu nzira zisanzwe z’amategeko ya Kiliziya ngo bayoborwe n’abayobozi ba Kiliziya.”

“Ubwo rero tukabona ari abantu ejo bashobora no gukora ibintu bishobora guteza abandi ibibazo, kubera ko tutagaragaje ko ibyo bigisha n’imyitwarire yabo bitemewe n’amategeko ya Kiliziya, ibyo bakora bakaba babyitirira Kiliziya Gatolika.”

Umuterankunga wabo nawe ashidikanywaho

Musenyeri Kambanda avuga ko hari impungenge ko iryo tsinda ryayobya abantu benshi, bakaryiyungaho batekereza ko babonye ababafasha gusenga.

Ati “Cyane cyane usanga hari abato bayobya, baza bazi ko baje gusenga no kwiyegurira Imana, cyangwa abakiristu bagira ngo babonye itsinda ribafasha gusenga kandi harimo ubuyobe, mu gihe batari mu murongo w’amategeko ya Kiliziya, ntabwo twabishingira.”

“Ariko cyane cyane ikintu kibi cyane ni ukuvuga ngo twebwe ibyo dukora tubibwirwa n’Imana, ntabwo dukeneye inama no kubwirizwa namwe. Urumva rero umuntu nk’uwo nguwo, ibyo yakora utabigaragaje ko mutari kumwe, ejo ibyo yakora bavuga bati ni Kiliziya Gatolika dore ibyo yavuze, dore ibyo yakoze, mu gihe natwe tutabafiteho ubushobozi.”

Musenyeri Kambanda avuga ko hari n’impungenge zijyanya n’imibereho yabo, kuko bashaka kubaho ahantu hamwe nk’abihayimana, ariko ugasanga amafaranga ababeshaho, inkomoko yayo ntisobanutse.

Yakomeje ati “Ibyo nabyo biri mu bidutera impungenge kuko ubundi kimwe mu bintu bifatika by’umurongo wa Kiliziya, kugira ngo umuryango w’abihayimana ubeho, aho umutungo wabo, ibibatunga n’ibibakoresha, bigaragazwa nta bwiru aho babikomora.”

“Ibyo rero nabyo ni ubwiru mu buryo utamenya kuko barakubwira bati twebwe Imana niyo ibidukorera byose. Urumva rero umuntu uvuga gutyo nabyo biri mu bidutera impungenge kuko umunsi umwe twazasanga wenda n’abo bakorana cyangwa ababatunga bafite indi ntego.”

Mu kwamagana aba bamonaki, Kiliziya Gatolika yanamenyesheje Urwego rw’Igihugu rw’Imiyoborere, RGB, rushinzwe amadini, kugira ngo ibyo bazakora bitazitirirwa Kiliziya Gatolika kubera ko ibyabo byarenze ubushobozi bwayo.

Musenyeri Kambanda yavuze ko Kiliziya Gatolika yitandukanyije n'itsinda rishingiye ku biyise Intwarane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .