Kucukiro: Umumotari yafashwe atwaye ikiryabarezi cyibwe

Yanditswe na IGIHE
Kuya 22 Ukwakira 2019 saa 07:41
Yasuwe :
0 0

Ku Cyumweru tariki ya 20 Ukwakira, Polisi y’u Rwanda yafashe umumotari w’imyaka 22 mu kagari ka Cyimo, mu murenge wa Masaka mu karere ka Kicukiro akekwaho gufatanya n’abajura gutwara ibyo bibaga ahantu hatandukanye.

Uyu mumotari usanzwe akora umwuga w’ubumotari mu karere ka Kicukiro, ifatwa rye ryaturutse ku makuru yatanzwe n’abaturage.

Umuvugizi wa Polisi mu mujyi wa Kigali, Chief Inspector of Police (CIP) Marie Gorette Umutesi avuga ko uyu mumotari yafashwe ubwo yari ahetse imashini ishyirwamo ibiceri mu mikino y’amahirwe, (ikiryabarezi) yari yibwe mu kagari ka Gako mu murenge wa Masaka.

Yagize ati “Mu kagari ka Gako hari Abashinwa bahakorera bahafite ziriya mashini, zaje kwibwa batanga ikirego. Nyuma nibwo abaturage baje gutanga amakuru ko babonye umumotari ahetse imwe muri izo mashini kuri moto, nuko polisi ikorera mu murenge wa Masaka iramufata.”

CIP Umutesi avuga ko uyu mumotari akimara gufatwa yavuze ko iyo mashini yibwe koko mu kagari ka Gako hari umuntu wamuhamagaye ngo aze ayimutwarire, yongeraho kandi ko nyiri ubwite yemera ko ibi bintu byo gutwara ibijurano cyangwa banyirabyo babifite atari ubwa mbere abikoze asanzwe abikora.

Abaturage bo mu tugari twa Gako na Cyimo bavuze ko uyu mumotari atari ubwa mbere aketsweho ibyo kuko mu mwaka ushize(2018) higeze kwibwa za televiziyo, nanone uyu motari bikaba bicyekwa ko ariwe wazitwaraga.

Umuvugizi wa Polisi mu mujyi wa Kigali yaboneyeho gukangurira abamotari muri rusange kwirinda gufatanya n’abakora ibyaha ndetse no gutanga amakuru ya bamwe mu babikora kuko bagayisha umurimo bakora.

Yagize ati “Birababaje kubona umumotari wijandika mu bikorwa nk’ibi by’ubujura n’uburyo bakangurirwa buri munsi kwirinda ibyaha bitandukanye no kujya batangira amakuru ku gihe y’ababikora akaba ariwe ubifatirwamo. Niyo mpamvu twongeye gukangurira abamotari kujya batanga amakuru y’abantu nk’abo batukisha umwuga wabo cyane ko baba bakorana umunsi ku wundi. Umuntu ntiyagombye gukora ibintu bibi ngo umwaka urinde ushira bataramumenya.”

CIP Umutesi yanakomoje ku mumotari uherutse gufatirwa nanone mu murenge wa Masaka mu karere ka Kicukiro washikuzaga abagore n’abakobwa amasakoshi yabo nijoro. Hakunze kandi kumvikana amakuru avuga ko hari bamwe mu bamotari bajya mu bikorwa byo gukwirakwiza ibiyobyabwenge.

Umuvugizi wa Polisi mu mujyi wa Kigali yongeye gukangurira abamotari kuba abanyamwuga bakirinda kujya mu byaha, abasaba kujya batanga amakuru no kurwanya aba bagenzi babo bakora ibinyuranyije n’amategeko.

Yashimiye abaturage bagize uruhare mu ifatwa ry’uyu mumotari, abasaba gukomeza kuba ko buri wese aba ijisho rya mugenzi we.

Umumotari ukekwa yashyikirijwe urwego rw’ubugenzacyaha rukorera kuri sitasiyo ya Masaka ngo akurikiranwe ku byaha acyekwaho.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza