Leta iri kwishyuza abantu 2416 umwenda bayifitiye wa miliyari 11,7 Frw

Yanditswe na Philbert Girinema
Kuya 27 Ugushyingo 2020 saa 10:00
Yasuwe :
0 0

Leta iberewemo n’abantu 2416 umwenda ungana na miliyari 11,7 Frw waturutse ku mafaranga yagiye itsindira mu manza zitandukanye. Aba ntibarimo 41 babashije kwishyura mu mezi atatu ashize umwenda bari bayifitiye wose.

Imibare ya Minisiteri y’Ubutabera igaragaza ko mu mezi atatu ashize, abantu bishyuye leta umwenda bayibereyemo waturutse ku manza batsinzwe ari 41 bishyuye yose n’abandi 16 bishyuye igice. Aba bose bishyuye amafaranga angana na 494.412.886 Frw.

Urutonde rw’abishyuzwa na leta rukorwa buri mezi atatu, urwashyizwe hanze na Minisiteri y’Ubutabera mu Ugushyingo uyu mwaka, rugaragaza ko abantu 2416 bayibereyemo 11.719.858.881 Frw.

Abishyuzwa na leta bari mu byiciro bitandukanye nk’abahamwe n’icyaha cya ruswa. Icyo cyiciro kirimo abashoferi bafashwe bari guha abapolisi ruswa kugira ngo batabahanira amakosa bakoze mu muhanda.

Iki cyiciro kirimo abantu 365, bose hamwe bishyuzwa na leta angana na 1.282.536.757 Frw. Harimo abishyuzwa ibihumbi 10 Frw ariko hari n’abishyuzwa menshi nk’umugabo witwa Habyarimana Emmanuel wakurikiranyweho icyaha cyo kwigwizaho umutungo acibwa indishyi za 470.600.000 Frw.

Uyu yasabwe gutanga iyo hazabu ya 470.600.000 Frw n’amagarama angana n’ibihumbi 50 Frw. Muri ayo yose, Minijust itangaza ko yishyuye miliyoni 77 Frw.

Undi waciwe amafaranga menshi nawe yari yarigwijeho umutungo. Urugero ni nka Kabarisa Richard, waciwe ihazabu ya miliyoni 42,2 Frw, muri ayo mafaranga amaze kwishyura miliyoni 19,4 Frw.

Ikindi cyiciro ni icy’abahaniwe kunyereza umutungo wa leta; bose hamwe ni 620. Leta iri kubishyuza 8.205.240.678 Frw. Biganjemo abakozi ba leta, abayobora za koperative zitandukanye bakanyereza umutungo wazo n’abandi.

Harimo nk’uwitwa Gafaranga Léopold warigishije amafaranga ya Banki y’Abaturage mu gashami ka Murunda agera kuri miliyoni 38 Frw nk’inguzanyo ya baringa itagira dosiye yari yitiriye undi muntu. Ayo mafaranga amaze kubikuzwa, yashyizwe kuri konti z’abandi bantu.

Ubu arishyuzwa miliyoni 76,4 Frw, gusa imwe mu mitungo ye yatejwe cyamunara haboneka asaga gato miliyoni ebyiri.

Harimo kandi undi witwa Izabiriza Bernadette washinjwe ko we na Dr Nsabimana Damien banyereje umutungo w’ibitaro bya Kibogora. Baciwe ihazabu ingana na miliyoni 147,7 Frw no gusubiza miliyoni 73,8 Frw yarigishijwe. Umutungo wa Izabiriza wavuyemo miliyoni 18,9 Frw.

Undi witwa Kabano Sam Minja we yahamijwe kurigisa umutungo wa Banki ya Kigali ishami rya Remera ungana na 10.638$ acibwa ihazabu ingana na 221.276$, hafi miliyoni 220 Frw.

Hari undi witwa Kabuye Joël Joseph wahamijwe kunyereza umutungo wa East Africa Exchange Ltd acibwa ihazabu ya miliyoni 375 Frw.

Ikindi cyiciro ni icy’abaciwe amafaranga mu manza z’ubucuruzi kirimo abantu 10 baciwe 163.736.520 Frw.

Hari n’icy’abaciwe amafaranga mu manza z’ubutegetsi kirimo abantu 37 bari kwishyuzwa na leta 31.897.969 Frw.

Icy’abaciwe amafaranga mu zindi manza zihariye cyo kirimo abantu 23 baciwe 147.361.677 Frw. Abaciwe amafaranga mu manza z’ibiyobyabwenge ni bo benshi kuko ari 1360‬ baciwe amafaranga 1.889.085.280 Frw.

KANDA HANO UREBE URUTONDE RWOSE RW’ABISHYUZWA NA LETA

Minisitiri w’Ubutabera akaba n’Intumwa Nkuru ya Leta, Johnston Busingye, aherutse gutangaza ko hari kuvugururwa uburyo abantu batsinzwe na leta mu manza bazajya bayishyura amafaranga baba bayigomba, nyuma y’igihe bigaragara ko hari abumva ko bakwishyuza ayo batsindiye ariko ntibishyure ayo bategetswe n’Urukiko.

Mu kiganiro aheruka kugirana n’abanyamakuru, Busingye yavuze ko mu myaka itanu ishize, umuco wo kwishyura leta amafaranga yatsindiye mu nkiko, utari wagahamye, ku buryo abantu bumvaga ko iyo hari utsinzwe mu rukiko agategekwa kwishyura leta amafaranga runaka, nta nkurikizi mu gihe atabikoze.

Ati “Byadutwaye igihe kinini kugira ngo tubone ko ari umuco ku bantu. Twashyizeho ishami muri Minisiteri rishinzwe kugaruza amafaranga leta yatsindiye, dushyiraho umurongo, dutangira kwandikira abantu bagomba leta amafaranga, twatangiriye kuri zeru, nta mafaranga yinjiraga.”

Busingye yavuze ko nk’uko abantu bibwiriza kwishyura imisoro, ari nako bikwiye kugenda ku muntu ufitiye leta amafaranga leta. Ati “Iyo ari igihe cyo kwishyura imisoro, abantu barazinduka mu gitondo bakajya kwishyura. Nta muntu ubahagamagara kuri telefoni. Turashaka kubaka uburyo nk’ubwo.”

Busingye yavuze ko iyo nk’imitungo y’umuntu ifatiriwe, konti ze za banki nazo bikaba uko, yarangiza agakurikiranwa n’inkiko, birangira umuntu yibutse ko agomba kwishyura.

Imiterere y’imanza leta itsinda n’izo itsindwa

Minisitiri Busingye yavuze ko mu myaka ine cyangwa itanu, umubare w’imanza leta itsinda wazamutse ariko usanga n’imanza nke itsindwa, isabwa kwishyura amafaranga menshi kurusha ayo itsindira.

Avuga ko wasangaga leta itsinda imanza 70% ariko 30% yatsinzwe ikishyura amafaranga menshi cyane.

Ati “Izo manza 30% dutsindwa, rimwe na rimwe, usanga ari ikintu cyabaye mu nzego za leta, kitari gikwiriye na mbere hose [...] iyo tubibonye hakiri kare, dutanga inama ko iki kidakwiriye kuba urubanza.”

Yavuze ko usanga imanza zimwe na zimwe zigoye kuzitsinda kubera ibimenyetso, cyangwa se amakosa runaka yakozwe n’umukozi wa leta. Yavuze ko inshuro nyinshi usanga umuturage ariwe watanze ikirego arega leta, yaba ari ikijyanye n’ingurane, ikijyanye n’amasezerano atarubahirijwe n’ibindi.

Ati “Inshuro nyinshi, uwo muntu niwe uba watureze, kandi aba ashaka miliyoni 10 Frw, 20 Frw, yavunitse ukuguru kuko yakoreraga wenda REG, ntazongera guhaguruka ukundi, arashaka amafaranga menshi, yari mu modoka ya leta ikora impanuka avunika umugongo, wenda yirukanwe mu kazi afite imyaka 30 akavuga ati ’ndashaka umushahara wanjye kugeza ngize imyaka 65 kuko baranyirukanye, sinzabona akandi kazi. Rero ndashaka umushahara wanjye kugeza ku myaka y’izabukuru.”

Busingye yavuze ko iyo leta itsinze muri bene izo manza, iba itumye ya mafaranga wa muntu yashakaga adatangwa, ariko iyo izitsinzwe ahabwa za miliyoni 20 Frw, leta ari aho itangirira gutanga amafaranga.

Ati “Iyo atsinze, atsindira amafaranga, twe iyo dutsinze dutuma leta idatanga amafararanga. Ni yo mpamvu umuntu ushinzwe imari iyo ari kureba mu bitabo avuga ati, dore mwatsinze imanza 70% ariko mwinjije miliyoni icumi kuko rimwe na rimwe baduha amafaranga y’abavoka n’ibindi. Ugasanga watsinzwe imanza 30%, ugatanga miliyoni 500 Frw, ni icyo gisobanuro gihari."

"Kuko 100% ntabwo ari leta ijya kurega abaturage, nibo bayirega, kuko twe ntitubona impamvu yo kujya kurega abaturage, bo iyo baje barega baba bashaka ingurane, ariko twe si zo tuba tubashakamo, turaburana kugira ngo ayo mafaranga adatangwa.”

Minisitiri Busingye yaburiye ababereyemo leta amafaranga banze kuyishyura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .