Leta yiyemeje kugabanya imyuka ihumanya ikirere igasigara iri kuri 16% mu 2030, bikazatwara miliyari $11

Yanditswe na IGIHE
Kuya 22 Gicurasi 2020 saa 09:38
Yasuwe :
0 0

U Rwanda rwabaye igihugu cya mbere cya Afurika cyashyikirije Umuryango w’Abibumbye intego zijyanye no kubungabunga ikirere, aho rwiyemeje kugabanya imyuka ihumanya ikirere igasigara nibura ku kigero cya 16% mu 2030.

Gutanga iyi ntego ni ikimenyetso cy’umuhate igihugu gifite wo guhangana n’imihindagurikire y’ikirere. Bizakorwa mu nzego zinyuranye ku buryo ibintu uko imikorere isanzwe izahinduka yaba mu gucukura amabuye y’agaciro, gucunga imyanda, ubuhinzi n’ibindi, bikazagabanya urugero rw’imyuka ihumanya rujya mu kirere rukagabanukaho 38% mu 2030.

Ni intego yo mu gihe cy’imyaka 10, bivuze ko mu 2030, ikigero cy’imyuka ihumanya ikirere kizaba gisigaye kuri 16%. Mu bijyanye na tekiniki n’amafaranga u Rwanda rukazabifashwamo n’inkunga, aho ruzakoresha miliyari 11 z’amadolari muri iyi ntego.

Izi ntego kandi ziyongeraho gukumira imyuka ituruka mu byuma bikonjesha, hydrofluorocarbon, HFCs, hagamijwe kubungabunga akayunguruzo k’izuba no kurengera ibidukikije. Abahanga mu bya siyansi bavuga ko ikurwaho rya HFCs rishobora kugabanya cyane ihindagurika ry’ibihe, hakavaho dogere Celsius 0.5 ku izamuka ry’ubushyuhe.

Mu Rwanda imyuka ihumanya ikirere biteganyijwe ko izikuba kabiri hagati ya 2015 na 2030, aho izava kuri toni miliyoni 5.3 z’umwuka uhumanye (C02), ikagera kuri toni miliyoni 12.1 mu 2030, bitewe n’ikoreshwa ry’ibikomoka kuri Peteroli, gukenera ikoreshwa ry’ingufu zitandukanye ndetse n’ubwikorezi bwo mu mihanda.

U Rwanda ruteganya ko rushobora kuzagabanya imyuka yose ihumanya ikirere nibura igasigara ari toni miliyoni 4.6 bya CO2 mu 2030. Ingamba zirimo gukoresha ingufu zikomoka ku mazi n’izuba, kugeza ingufu mu nganda, gushyiraho ibipimo ntarengwa ku myuka ihumanya isohorwa n’ibinyabiziga, gukoresha ibinyabiziga bikoresha amashanyarazi ndetse no gutekesha gaz na biogaz bizagira uruhare muri iyi ntego.

Minisitiri w’Ibidukikije, Dr Mujawamariya Jeanne d’Arc, avuga ko u Rwanda ari kimwe mu bihugu bigirwaho ingaruka n’ihindagurika ry’ikirere, aho imyuzure ishegesha ibikorwa by’ubuhinzi, igatwara ubuzima bw’abaturage ndetse igasenya n’ibikorwa remezo.

Yagize ati “Igihugu cyacu kirimo guhura n’ingaruka z’imihindagurikire y’ikirere. Mu buryo bubabaje, abaturage barenga 140 batakaje ubuzima, inzu zirenga 3000 zirasenyuka kubera imyuzure n’inkangu”.

Yakomeje avuga ko mu ntego nshya zo kubungabunga ikirere harimo gahunda isobanutse zo kugabanya imyuka ihumanya ikirere kugira ngo ubukungu n’imibereho y’abaturage bidahungabanywa n’imihindagurikire y’ibihe.

U Rwanda ruzakenera nibura miliyari 11 z’amadolari kugira ngo rugere kuri izi ntego zo kugabanya imyuka yangiza ikirere harimo miliyari 5.7 z’amadolari zo gushyira mu bikorwa ingamba zo kuyigabanya n’izindi miliyari 5.3 z’amadolari zo guhangana n’ingaruka z’izo ngamba. Iki kiguzi cyose harimo inkunga ingana na 60%.

Ingamba ziteganyijwe zizibanda mu nzego zirindwi zirimo; amazi, ubuhinzi, ubutaka, amashyamba, imiturire, ubuzima, ubwikorezi n’ubucukuzi bw’amabuye y’agaciro.

Umunyamabanga Nshingwabikorwa w’Ikigega cy’Umuryango w’Abibumbye cyita ku Bidukikije (UNFCCC), Patricia Espinosa, yatangaje ko u Rwanda rwabaye igihugu cya mbere muri Afurika mu gutanga gahunda yacyo yo kugabanya imyuka ihumanya ikirere.

Mu butumwa yanyujije kuri Twitter yagize ati “Turashimira u Rwanda rwatanze gahunda ivuguruye muri UNFCC ku bijyanye no guhangana n’imihindagurikire y’ikirere. Twishimiye ubwitange bwanyu mu guharura inzira y’ahazaza heza.”

Espinosa yavuze ko Coronavirus itahagaritse ikibazo cy’imihindagurikire y’ikirere, bityo ko yizeye ko n’ibindi bihugu bizatanga gahunda bifite yo guhangana n’icyo kibazo mu myaka iri imbere.

Inyigo iheruka gukorwa n’Ishami ry’Umuryango w’Abibumbye ryita ku Buzima, OMS, ku bijyanye n’ubuziranenge bw’umwuka yagaragaje ko abaturage bangana na 92% baba mu duce tubonekamo ihumana ry’ikirere ryo ku rwego rwo hejuru.

Imibare igaragaza ko buri mwaka abantu miliyoni zirindwi bicwa n’indwara zituruka ku guhumana kw’ikirere.

U Rwanda ruri mu bihugu byashyizeho ingamba zikomeye mu kurwanya imyuka ihumanya ikirere, aho REMA ifite sitasiyo zitandukanye zifata ibipimo by’imyuka ihumanya ikirere muri Kigali no mu turere dutandukanye tw’igihugu.

Igihugu kandi cyanatangije ikoreshwa rya moto n’imodoka zifashisha amashanyarazi zidasohora umwuka uhumanye no kunoza ubwikorezi rusange hagabanywa imodoka zishaje ziganje mu zohereza imyuka ihumanya cyane ikirere hifashishijwe igenzurwa ry’ibinyabiziga bisohora imyuka yangiza ikirere.

Gukoresha imodoka zikoresha amashanyarazi ni kimwe mu bizagabanya imyuka bihumanya ikirere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .