LuNa Smelter n’abafatanyabikorwa bayo biyemeje kunoza ubucuruzi bw’amabuye y’agaciro

Yanditswe na IGIHE
Kuya 21 Ugushyingo 2020 saa 07:27
Yasuwe :
0 0

Uruganda rukumbi rutunganya rukanohereza gasegereti mu bihugu bya Afurika y’Iburasirazuba n’iyo Hagati, LuNa Smelter, rwatangije ubufatanye na Minespider, Google n’Ikigo cy’Igihugu Gishinzwe Mine, Peteroli na Gaz mu Rwanda (RMB) mu rwego rwo gushyiraho uburyo buzafasha kunoza icuruzwa ry’amabuye y’agaciro mu Rwanda.

Ubu buryo bwiswe “OreSource”, byitezwe ko buzafasha mu gutanga amakuru ibihugu byo mu Muryango w’Ubumwe bw’u Burayi bikenera mu rwego rwo kubahiriza amabwiriza mashya y’urwego rushinzwe gukumira amakimbirane mu bijyanye n’ubucukuzi bw’amabuye y’agaciro, azatangira gukurikizwa muri Mutarama 2021.

Hamwe n’ubu buryo bushya, hazajya hashyirwa kode ku mabuye y’agaciro yoherezwa cyangwa ku nyemezabwishyu, ku buryo abayakira bazajya babona amakuru yose bakeneye kugira ngo bizere ko hubahirijwe amabwiriza agenderwaho mu bihugu by’Ubumwe bw’u Burayi, yashyizweho na Minespider ku buryo nta wundi ushobora kubihindura.

Ubu buryo butanga icyemezo hifashishijwe ikorabuhanga, amakuru akagabanywa mu byiciro bitatu hagendewe ku kuba yabonwa na buri wese, yaba yahurirwaho n’abafite aho bahuriye n’ibyoherezwa cyangwa ari ibanga hagati ya kompanyi n’umukiliya wayo.

Bukaba buri gushyirwa mu bikorwa ku nkunga Minespider yatewemo na EIT Raw Materials mu ntangiriro z’uyu mwaka.

Umuyobozi muri LuNa Smelter, Olena Wiaderna, yavuze ko ubu buryo bushya buziye igihe.
Ati “Uru rwego ntiruzi neza uburyo bwo gukurikiza amabwiriza agenga ibijyanye n’amabuye y’agaciro mu Muryango w’Ubumwe bw’u Burayi. OreSource izaduha uburyo butanga amakuru akenewe, azafasha abagura ayo mabuye kubona amakuru bakeneye yose.”

Umuyobozi w’Ikigo cy’Igihugu gishinzwe Mine, Peteroli na Gaz (RMB), Francis Gatare, yavuze ko ubu buryo buje bwiyongera ku ngamba zari zarashyizweho na guverinoma mu kunoza ibijyanye n’ubucukuzi bw’amabuye y’agaciro.

Ati “Ibi bije nko kwemeza ibyo twari tuzi: Mu Rwanda nta bibazo by’amakimbirane ashingiye ku mabuye y’agaciro biharangwa; ndetse bikozwe na LuNa Smelter iri mu ziyoboye ibyo gutunganya amabuye mu Rwanda, turi kugera ku yindi ntambwe ikomeye mu rwego rw’ubucukuzi bw’amabuye y’agaciro mu Rwanda.”

RMB yamaze gushyiraho ingamba zihariye zirimo gushyiraho abashinzwe gukurikirana icukurwa ry’amabuye y’agaciro no gushyira ibimenyetso ku yacukuwe hagamijwe no kugabanya ingaruka ziterwa no gucukura amabuye y’agaciro binyuranyije n’amategeko.

Mu masezerano mashya, Google izagira uruhare mu gutanga ubumenyi bw’inganda kugira ngo hizerwe ko OreSource ihuza ibitumizwa mu mahanga n’ibisabwa abacukura amabuye y’agaciro.

Minespider na Google biherutse gushyiraho umushinga wo gushyira ibimenyetso kuri gasegereti kuva ikiva mu kirombe kugeza ikoreshejwe, aho byakoranye n’ibigo birimo Volkswagen na kompanyi yo muri Peru ya Minsur nayo ikora mu bucukuzi.

Ubucukuzi bw’amabuye y’agaciro mu Rwanda buri mu byiciro byagizweho ingaruka na COVID-19 ndetse buri mu nzego z’ibanze guverinoma ishaka kuzahura muri gahunda yayo yo kuzahura ubukungu yo muri Gicurasi 2020 kugeza mu Ukuboza 2021.

Muri iyi gahunda, guverinoma irateganya guhuriza hamwe abacukuzi bo ku rwego ruto n’uruciriritse, bakajya mu matsinda y’ishoramari.

Uhereye ibumoso: Olena Wiadena uri mu bagize Inama y'Ubutegetsi ya LuNa Smelter Ltd; Umuyobozi mukuru wa LuNa Smelter, Robert Nowak na Joseph Butera, uyobora ibikorwa byo mu ruganda rwa LuNa Smelter Ltd ubwo bagiranaga ikiganiro n'itangazamakuru muri Nzeri 2020
Uruganda rwa LuNa Smelter rwatangiye gutunganya gasegereti amasaha 24/24 aho rushongesha toni zigera kuri 12 ku munsi, zikaba zagera kuri 300 mu kwezi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .