Miliyari $5 zizashorwa mu kubaka umujyi utangiza ibidukikije i Kigali

Yanditswe na IGIHE
Kuya 10 Gicurasi 2019 saa 11:33
Yasuwe :
0 0

Kuva muri Mutarama 2020, Kigali iratangira kubakwamo umushinga wagutse w’umujyi w’icyitegererezo utangiza ibidukikije ndetse inyigo n’igishushanyo mbonera byawo bizarangira bitarenze Ukuboza 2019.

Uyu mujyi uzubakwa ku buso bwa hegitari 620 mu Murenge wa Kinyinya mu Karere ka Gasabo. Uzaba ufite ibikorwa remezo bifasha mu kurinda iyangirika ry’ibidukikije n’imyuka ihumanya ikirere.

U Rwanda nirwuzuza uwo mujyi, ruzaba igihugu cya mbere gifite uwo mwihariko muri Afurika.

Uyu mushinga kandi urashimangira icyerekezo cy’u Rwanda mu kwimakaza ikoranabuhanga ritangiza ibidukikije n’ubukungu budahungabanywa n’imihindagurikire y’ibihe mu mijyi yunganira Kigali, ubwikorezi bw’abantu n’ibindi.

Umuyobozi wungirije w’Umushinga ‘Green City Pilot’ uzubaka uwo mujyi, Kayumba Eudes, yabwiye The New Times dukesha inkuru ko ‘abenjeniyeri bawize bateganya ko uzatangwaho ari hagati ya miliyari $4 na miliyari $5 [akabakaba miliyari 4000 Frw].”

Ni umushinga uzaterwa inkunga n’urwego rw’abikorera n’abafatanyabikorwa batandukanye biyemeje gutanga umusanzu wabo ngo ushyirwe mu bikorwa.

Biteganyijwe ko uwo mujyi uzaba ufite ikoranabuhanga rigezweho, imodoka zikoresha amashanyarazi, imihanda yagenewe amagare na moto, ingufu zisubira, uburyo burambye bwo gutunganya imyanda, inganda za biogas n’ibindi.

Kayumba yavuze ko “Uwo mujyi uzaba ufite inganda nto zikoranye ikoranabuhanga, inyubako ziciriritse n’ibigo bikora ibijyanye n’ubugeni.’’

Yakomeje avuga ko “Turi gukora inyigo yo kureba akazi kazahangwa, kakagirira inyungu abaturage bahatuye.’’

Kuri ubu, Ikigega cyo kubungabunga ibidukikije (Fonerwa) ku nkunga y’Umuryango w’Iterambere w’Abadage ubinyujije muri Banki yayo y’Iterambere, KfW, kiri gukora inyigo y’uwo mushinga mu gihe Ikigo cy’Ubwubatsi cya Sweco cyahawe isoko ku ishyirwa mu bikorwa ryawo.

Yatangaje ko “Inyigo nirangira, tuzatangira ishyirwa mu bikorwa ry’umushinga duhereye ku bikorwa remezo by’ibanze birimo amazi, amashanyarazi, n’imihanda.’’

Uyu mushinga uzifashisha ibikoresho by’imbere mu gihugu, nta ngaruka uzagira ku baturage bafite ubushobozi buke kuko watekerejweho mu buryo buzababyarira inyungu birimo no kuborohereza kubona inguzanyo.

Umuyobozi wa Fonerwa, Hubert Ruzibiza, yavuze ko iki kigo cyakusanyije arenga miliyoni $170 mu iterambere ry’imishinga itangiza ibidukikije , aho bamaze gushyigikira igera kuri 40.

Yavuze ko “Mu gihe kizaza, turateganya gukora ubukangurambaga bwo gukusanya inkunga yo gufasha mu mishinga ijyanye no kunoza ubwikorezi bw’abantu n’ibintu, gukoresha ibicanwa bitangiza ibidukikije, ubuhinzi bwifashishije ikoranabuhanga n’ibindi.’’

Imyaka umunani irashize u Rwanda rushyizeho ingamba zo kubaka ubukungu butangiza ibidukikije, butanahungabanywa n’imihindagurikire y’ibihe “Green Growth and Climate Resilience Strategy.”

Ni icyerekezo cyazamuye ubukungu burambye hibandwa ku mutungo kamere, ujyanye no gutera amashyamba, gutunganya amazi, kunoza ubucukuzi bw’amabuye y’agaciro n’ibindi bitangiza ibidukikije.

Umuyobozi wa Fonerwa, Ruzibiza Hubert, yerekana imiterere y'umujyi utangiza ibidukikije uzaba uherereye i Kinyinya mu Mujyi wa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza