Mineduc yavuze ku gusimbuzwa kwa Dr Muvunyi ku buyobozi bwa HEC

Yanditswe na Habimana James
Kuya 16 Ukwakira 2019 saa 08:04
Yasuwe :
0 0

Minisiteri y’Uburezi yatangaje ko nta gikuba cyacitse kuba uwari Umuyobozi w’Inama y’Igihugu y’Amashuri Makuru na Kaminuza (HEC), Dr Muvunyi Emmanuel, yavanwe ku buyobozi kuko ngo bisanzwe ko umuntu ajya mu mwanya akazageza igihe akavanwaho.

Kuri uyu wa Mbere tariki 14 Ukwakira 2019 nibwo Minisitiri w’Uburezi Dr Eugène Mutimura, yasohoye itangazo rivuga ko Muhizi Kageruka Benjamin ariwe wagizwe umuyobozi w’agateganyo wa HEC, asimbuye Dr Muvunyi Emmanuel.

Icyo gihe IGIHE yashatse kubaza Minisitiri w’Uburezi iby’izi mpinduka, gusa ntibyakunda kuko yavuze ko ari mu nama.

Muri Mata 2017 nibwo Dr Muvunyi yari yagizwe Umuyobozi Mukuru wa HEC asimbuye Dr Mugisha Sebasaza Innocent, na we wakuwe kuri uyu mwanya n’Inama y’Abaminisitiri yateranye ku wa Gatatu, tariki 5 Mata 2017.

Hari nyuma gato ya raporo ijyanye n’imikorere ya kaminuza zitandukanye zo mu Rwanda yatumye inyinshi zifungwa.

Ku buyobozi bwa Dr Muvunyi, hakunze kumvikana ibibazo HEC yagiye igirana n’amwe mu mashuri Makuru na Kaminuza, hibukwa cyane ikibazo cya Kaminuza ya Gitwe.

Iki kibazo cyumvikanye cyane muri Mutarama 2019 ubwo ubuyobozi bwa Kaminuza ya Gitwe iherereye mu Karere ka Ruhango, bwatangazaga ko bwarenganyijwe na Dr Muvunyi Emmanuel, ikavuga ko ibi byatumye igwa mu gihombo cya miliyari 1.5 Frw.

Kaminuza ya Gitwe yari imwe mu zafungiwe amwe mu mashami na HEC muri Mata 2017 kubera kutuzuza ibisabwa.

Ishami ry’ubuvuzi muri iyo kaminuza ni rimwe mu yahagaritswe, nyuma yo gusanga ritujuje ibisabwa nk’ibikoresho bidahagije, abarimu n’ibindi.

Muri Nzeri uwo mwaka, HEC yaje gukomorera iyo Kaminuza ariko mu ishami ry’ubuvuzi itegeka ko rimara imyaka ibiri ritakira abanyeshuri bo mu mwaka wa mbere kugira ngo abo mu myaka yo hejuru babone ubwisanzure ku bikoresho bishya byari byaguzwe, babashe kwiga ibyo batize mu myaka ya mbere.

Iyi kaminuza yavuze ko kubuzwa kwakira abanyeshuri bashya byakozwe na Dr Muvunyi, ariko akayitegeka gukomeza guhemba abarimu bagomba kwigisha muri uwo mwaka kandi badakora.

Dr Muvunyi Emmanuel we icyo gihe yabwiye IGIHE ko ibyo ubuyobozi bwa Kaminuza ya Gitwe bwamushinjaga ari urwitwazo. Yavuze ko bajya guhagarika ishami ry’ubuvuzi muri iyo Kaminuza byaturutse kuri raporo y’inzobere zakoze igenzura.

Dr Muvunyi yavuze ko iyo raporo yemejwe na Minisiteri y’Uburezi ari nayo yabandikiye ibasaba kuba bahagaritse kwakira abanyeshuri, ku buryo icyemezo cyafashwe na Mineduc kitakwitirirwa Muvunyi ku gite cye.

Ati “Byumvikane ko icyo atari ikintu gishya kije ejo bundi, bakimenyeshejwe tariki 22 Nzeri 2017. Bari babizi ko iyo myaka bazayimara batakira abanyeshuri. Si ibintu Muvunyi yababwiye, ni Minisiteri yabibabwiye biturutse mu buryo isuzuma ryai ryakozwe.”

Nyuma y’aho Minisiteri y’Uburezi itangaje ko Dr Muvunyi avanwe kuri uyu mwanya, hirya no hino ku mbuga nkoranyambaga hacicikanye amakuru ko byaba bifitanye isano n’ibibazo bya Kaminuza ya Gitwe.

Gusa Minisiteri y’Uburezi yo yavuze ko ibyo byose abantu barimo kuvuga itigeze ibyongera mu itangazo ryayo, kandi ko nta gikuba cyacitse kuba umuyobozi yavanwa mu mwanya runaka.

Umuvugizi wa Minisiteri y’Uburezi, Serafina Flavia yabwiye IGIHE ati “Abayobozi iyo bari mu myanya nkiriya bahabwa n’inshingano, nibaza ko nta muntu uba mu mwanya ubuzima bwe bwose, igihe yari amaze mu kazi hari ibyo yakoze kandi nk’uko mwabonye ririya tangazo, ryavugaga umuyobozi mushya w’agateganyo wa HEC, ntabwo nakubwira ngo impamvu ni iyi ariko nk’uko bisanzwe ko umuntu akora igihe kikagera akaba yahagarara mu nshingano yari afite.”

Yakomeje agira ati “Ibyo abantu bavuga ni ibyo bivugira, uko yagiye ku kazi ni nako yahagaritswe naho ibyo abantu bavuga ni ibyabo, itangazo minisiteri yashyize ahagaragara rirumvikana neza, ibyo byose barimo kuvuga ntabwo yigeze ibyongeraho, mutegereze minisiteri ibyo izatangaza nibona ko ari ngombwa ariko nta gikuba cyacitse.”

Minisiteri y’Uburezi ivuga ko ibi ari ibisanzwe kandi bimenyereye haba mu gihugu cyangwa ahandi, ko umuntu akora igihe kikagera agahagarikwa ku nshingano.

Igihe Dr Muvunyi yamaze ku buyobozi bwa HEC cyaranzwe n’inkubiri yo gufungwa kwa kaminuza zitandukanye ku mpamvu zo gusigasira ireme ry’uburezi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza