00:00:00 IGIHE NETWORK KN KINYARWANDA EN ENGLISH FR FRANCAIS

MTN Mobile Money igiye gushimira abakiliya bayo ifasha abababaye

Yanditswe na Mukahirwa Diane
Kuya 19 January 2022 saa 04:01
Yasuwe :

Ikigo cya MTN Mobile Money Ltd cyatangije ubukangurambaga buzamara amezi atatu bugamije gukorera abakiliya bayo ibikorwa by’urukundo, mu kubashimira imikoranire myiza bagiranye.

Ubu bukangurambaga bwiswe ‘Biva MoMotima’ buzakorerwa mu turere twose tw’igihugu, aho iyi Sosiyete izazenguraka ikora ibikorwa by’urukundo birimo gufasha abatishoboye cyane abana, gutanga impano n’ibindi bigamije kwereka abakiliya babo ko bari kumwe.

Ubu buryo bwo kohererezanya amafaranga binyuze kuri telefoni hamwe na Sosiyete y’itumanaho ya MTN Rwanda bwatangiye mu 2010, iyi yabaye intabwe ikomeye mu iterambere ry’Abanyarwanda kuko baciye ukubiri no kugendana amafaranga adafite umutekano wizewe.

Muri Mata 2021 nibwo MTN Mobile Money Ltd, yabaye ikigo ukwacyo kizajya gitanga serivisi z’imari zitandukanye binyuze mu ikoranabuhanga rikoresha telefoni.

Nyuma yo gufata izo nshingano, MTN Mobile Money Ltd yakoze ibikorwa byose mu kwitegura ngo izabashe gukomeza guha abakiliya bayo serivisi nziza.

Ibi biri mu byatumye bategura ubukangurambaga bwa ‘Biva MoMotima’ kugira ngo batangire ibikorwa ariko banereka abakiliya babo ko biteguye gukorana nabo.

Umuyobozi wa MTN Mobile Money Ltd, Chantal Umutoni Kagame, yavuze ko iki ari igihe cyiza cyo gushimira abakiliya babo uburyo batahwemye kubana nabo mu gihe bamaze bakora.

Ati “Twabanje kwitegura nka MTN Mobile Money Ltd ariko twasanze tutagomba kujya ku isoko tutabanje gushimira abafatabuguzi bacu babanye natwe kuva ku munsi wa mbere dutangira.”

Yakomeje ati “Ubu tugiye kuboherereza urukundo, ruva kuri twe rujya ku bakiliya bacu bose ndetse tubafasha ko nabo bohereza urukundo kuri bagenzi babo. Tuzakora ibikorwa bitandukanye bireba cyane abana bafite ubumuga tubafasha kugira ngo bagire icyo bageraho.”

Kuri uyu wa 19 Mutarama 2022, MTN Mobile Money Ltd yatangiye gukora ibi bikorwa by’urukundo, aho bagiye basanga abantu ahantu hatandukanye bakababaza ibibazo abatsinze bakagenerwa impano zirimo mudasobwa, inite zo guhamagara n’ibindi.

Kuva mu 2010 MTN Mobile Money yatangira kugeza ubu ifite abakiliya barenga miliyoni enye bakoresha serivisi zo guhererekanya amafaranga kuri telefoni mu buryo buhoraho.

Umuyobozi Mukuru wa MTN Rwanda, Mitwa Ng'ambi yavuze ko abakiliya babo bakwiye ibyiza gusa
Umuyobozi wa MTN Mobile Money Ltd, Chantal Umutoni Kagame, yavuze ko iki ari igihe cyiza cyo gushimira abakiliya babo uburyo batahwemye kubana nabo mu gihe bamaze bakora
Zimwe mu mpano MTN Mobile Money Ltd yageneye abitabiriye imurikwa ry'ubukangurambaga bushya
MTN Mobile Money Ltd yatangiye ibikorwa byo kwereka abakiliya bayo urukundo
Ubukangurambaga bwa MTN Mobile Money Ltd buzamara amezi atatu
Uyu muhango witabiriwe n'abakozi batandukanye ba MTN Mobile Money Ltd
Alain Numa, umukozi muri MTN Rwanda niwe wayoboye umuhango wo gutangiza ubu bukangurambaga
Abakoresha ururimi rw'amarenga ntibibagiranye muri MTN Rwanda

Amafoto: Shumbusho Djasiri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .