Nyarugenge: Abafite amacumbi basabwe kuyashyiramo Camera z’umutekano n’ibyuma bisaka

Yanditswe na Thamimu Hakizimana
Kuya 2 Ugushyingo 2019 saa 04:24
Yasuwe :
0 0

Abacuruzi batandukanye bafite amacumbi yo kuraramo (Lodge) bo mu Karere ka Nyarugenge, basabwe kuyashyiramo Camera z’umutekano n’ibyuma bisaka mu rwego rwo kurwanya abayinjizamo abana bari munsi y’imyaka 18 y’amavuko.

Ibi aba bacuruzi babisabwe ku wa Kane tariki ya 31 Ukwakira, ubwo ubuyobozi bw’Umurenge wa Muhima bwatangizaga imihigo y’isuku n’umutekano bwagiranye abafite amacumbi, abashinzwe abakarani, abahagarariye abafite restaurant, amakoperative y’ibijyanye n’ubuzima n’abandi.

Umunyamabanga Nshingwabikorwa w’umurenge wa Muhima Mukandoli Grace, yabwiye IGIHE ko basabye abafite amacumbi gushyiramo Camera n’ibikoresho bisaka mu rwego rwo kugira ngo bajye babasha kugenzura umutekano w’ibihabera.

Avuga ko bahisemo gusaba abafite amacumbi gushyira Camera n’ibyuma bisaka ndetse n’abashinzwe umutekano babihuguriwe kuko biri mu byo bari biyemeje kugeraho mu mwaka ushize.

Ati “Ni mu rwego rwo kwikosora kuko twabibasabye nyuma yo kubona aho twaguye dufata ingamba kuko twari twariyemeje ko amacumbi yose agira camera akanagira ibyuma bisaka n’abacunga umutekano babihuguriwe kugira ngo ibiyaberamo bijye bibasha kumenyekana”.

Yongeyeho ko yizeye ko mu mezi atatu gusa ari imbere bizeye ko amacumbi yose uko ari 17 abarizwa mu Murenge wa Muhima azaba arimo Camera cyane ko ayo bazasanga atujuje ibyo yasabwe bazasaba ba nyirayo gushakisha ubundi bucuruzi bakora.

Tuyisingize Virginia ufite amacumbi n’akabari mu Murenge wa Muhima, yemeza ko amacumbi yose nashyirwamo Camera ikibazo cy’abayazanagamo abana kizakemuka burundu.

Ati “Badusabye gushaka abashinzwe umutekano, ibyuma bisaka abakiriya na Camera ariko twabyakiriye neza kuko twasanze nta kigoye kirimo cyane cyane ko nka Camera zizakemura bya bibazo by’abantu wasangaga bateza umutekano muke mu tubari no mu maduka cyangwa abahazanaga abana b’abakobwa bari munsi y’imyaka 18.”

Meya w’Akarere ka Nyarugenge, Kayisime Nzaramba, yavuze ko bafite icyifuzo cy’uko amacumbi yo mu karere hose ashyirwamo Camera mu rwego rwo kubungabunga umutekano w’abaturage.

Ati “Ni uburyo bwiza umurenge wa Muhima watangije aho buri cumbi rikwiye kugiramo camera kuko ntizihenda. Icyo dusaba n’uko iki gikorwa cyagera mu Karere hose buri macumbi akagira camera n’ibyuma bisaka abantu mu rwego rw’umutekano no kurwanya babandi bahungaga amahoteli bakajya mu macumbi kuko aba atujuje byose.”

Yasabye abafite amacumbi kugira igitabo cyo kwandikamo abayarayemo bose mu rwego rwo kubungabunga umutekano w’abayinjiyemo.

Umunyamabanga Nshingwabikorwa w’Umurenge wa Muhima Mukandoli Grace yemeza ko uwo bazasanga icumbi rye ritarimo Camera basamusaba gushaka ubundi bucuruzi akora
Tuyisingize Virginia ufite amacumbi n’akabari mu Murenge we Muhima, ahamya ko amacumbi yose nashyirwamo Camera ikibazo cy’abayazanagamo abana kizakemuka burundu
Abafite amacumbi biyemeje kuyashyiramo Camera z'umutekano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza