Nyarugenge: Ubuyobozi bwavuze ku mwanya wa nyuma mu kwesa imihigo y’ubumwe n’ubwiyunge

Yanditswe na Thamimu Hakizimana
Kuya 5 Ukwakira 2019 saa 11:04
Yasuwe :
0 0

Akarere ka Nyarugenge niko kaje ku mwanya wa nyuma mu kwesa imihigo ijyanye n’ubumwe n’ubwiyunge, aho kagize amanota 48%.

Akarere ka Nyanza, niko kaje ku mwanya wa mbere n’amanota 96 %, gakurikirwa na Gisagara yagize amanota 85 % naho Burera iba iya gatatu n’amanota 84.5 %.

Ubuyobozi bw’Akarere ka Nyarugenge, bwatangarije IGIHE ko icyatumye akarere kaza ku mwanya wa nyuma ari uko nta raporo z’ibyo bikorwa bari barakoze.

Ibi byatangajwe n’Umuyobozi ushinzwe imiyoborere myiza mu Karere ka Nyarugenge, Nkurunziza Idrisa, ubwo hatangizwaga ihuriro ry’ubumwe n’ubwiyunge ku midugudu n’Ukwezi kwahariwe ibikorwa by’ubumwe n’ubwiyunge.

Nkurunziza avuga ati “Nk’iyo ugiye kubaza abaturage uti muracyibona mu moko, ese ubanye ute n’umuvandimwe wawe? ese uwacitse ku cumu abanye ate n’uwakoze jenoside? ibyongibyo nibyo bipimo nyakuri by’ubumwe n’ubwiyunge ibyo nabyo bijya bikorwa, ibyo mu gihugu hose turi 92% .”

Ashimangira ko icyo ubugenzuzi bwakoze ari ukureba ibikorwa byimakaza ubumwe n’ubwiyunge.

Ati “Ni ukuvuga bwa bumwe n’ubwiyunge dufite bugeze kuri 92%, ese n’iki twakora kugira ngo tutazasubira inyuma ahubwo kugira ngo tugere kuri 96% muri iyi myaka itanu iri imbere, ibyo bikorwa mu by’ukuri nibyo byasuzumwe.”

Yakomeje avuga ko ibyo bikorwa byakozwe ku rwego rw’imidugudu hatangwa ibiganiro bya ndi umunyarwanda uretse ko icyabaye ari uko inzego zagize intege nke zo gutanga raporo y’ibyo byakozwe mu gusuzuma babona ko byakozwe ariko ntibabibonera raporo.

Nkurunziza avuga ko ubu hashyizweho ihuriro ku mudugudu hatorwa n’abantu bazajya bakora inama buri gihembwe ndetse bagatanga raporo ku kagari nako kakazigeza ku Murenge n’umurenge nawo ukazohereza ku Karere kugira ngo nako kazoherereze komite y’ubumwe n’ubwiyunge.

Yagize ati “Ibyo nitubikora tuzaba dukemuye cya kibazo cyatumaga ibikorwa twakoze byimakaza ubumwe n’ubwiyunge bitaragaragaye muri raporo.”

Yemeza ko ku bijyanye n’igipimo cy’ubumwe n’ubwiyunge Akarere ka Nyarugenge, kari kuri 92% ndetse bafite intego yo kugera kuri 96% mu myaka itanu ndetse biyemeje gushyiramo imbaraga kugira ngo batazasubira inyuma.

Nkurunziza avuga ko iyi raporo ari ugutanga aho guhera hagafatwa ingamba hakamenyekana ibitarakozwe kugira ngo bikosorwe.

Muri uku kwezi kwahariwe ibikorwa by’ubumwe n’ubwiyunge aka karere gateganya kuganira n’abafatanyabikorwa, amadini n’amatorero nayo ateganya igikorwa yise “Gusengera ubumwe n’ubwiyunge” mu rwego rwo kwimakaza iyi gahunda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza