Pasiteri Uwinkindi Jean wahamijwe ibyaha bya Jenoside yitabye Urukiko rw’Ubujurire

Yanditswe na Akayezu Jean de Dieu
Kuya 23 Ukwakira 2019 saa 05:41
Yasuwe :
0 0

Urukiko rw’Ubujurire rwasubitse urubanza rwa Pasiteri Jean Uwinkindi warujuririye nyuma yo gukatirwa igifungo cya burundu ubwo yahamishwaga ibyaha bya Jenoside yakorewe Abatutsi mu 1994.

Uwinkindi wahoze ari umushumba mu itorero rya ADEPR mu yahoze ari Komini Kanzenze muri Perefegitura ya Kigali Ngali [ubu ni mu Karere ka Bugesera], yakatiwe n’Urukiko Rukuru igifungo cya burundu mu Ukuboza 2015, ahita ajuririra iki cyemezo.

Kuri uyu wa Gatatu tariki 23 Ukwakira 2019, nibwo uyu mugabo yari yitabye Urukiko rw’Ubujurire ngo rutangire kuburanisha ubujurire bwe.

Umucamanza yavuze ko Uwinkindi na Me Jean Claude Bizimana Shoshi umwunganira batinze gushyikiriza Urukiko imyanzuro isobanura ubujurire bwabo.

Yavuze ko imyanzuro yashyizwe mu ikoranabuhanga ryabugenewe mu cyumweru gishize ari nayo mpamvu habayeho umwanya muto wo kuyisesengura kandi n’Ubushinjacyaha bwari bwandikiye Urukiko rusaba ko urubanza rwasubikwa kuko butarabasha gusesengura imyanzuro y’ubujurire bwa Uwinkindi.

Umucamanza yavuze ko iburanisha rizaba ku wa 19 Ugushyingo 2019.

Urukiko rwamuhamije ibyaha birimo kuyobora ibitero simusiga byahitanye Abatutsi benshi ndetse no kujya kuri bariyeri zabaga zigamije kurobanura abatutsi bari bwicwe, ibyaha yahamijwe ko yabikoranye ubugome bukomeye.

Yitabiriye kandi inama nyinshi zanogerezwagamo imigambi yo kurimbura Abatutsi, bigize icyaha cyo kurimbura nk’icyaha cya Jenoside.

Uwinkindi yafatiwe i Mbarara muri Uganda tariki 30 Kamena 2010,ava muri Repubulika Iharanira Demokarasi ya Congo , ubwo yari yiyoberanyije amazina.

Yaje gushyikirizwa Urukiko Mpuzamahanga Mpanabyaha rwashyiriweho u Rwanda i Arusha muri Tanzania, nyuma rumwohereza mu Rwanda tariki 19 Mata 2012 ubwo rwendaga gusoza imirimo yarwo.

Muri Gicurasi 2014, nibwo yatangiye kuburana mu mizi aza gukatirwa gufungwa burundu mu Ukuboza 2015.

Uyu mugabo w’imyaka 69 yavukiye mu yahoze ari Komini Rwamatamu ku Kibuye ubu ni mu Karere ka Rutsiro, yari Pasiteri mu yahoze ari segiteri Nyamata, Komini Kanzenze muri Perefegitura ya Kigali-Ngali.

Pasiteri Uwinkindi Jean wahamijwe ibyaha bya Jenoside yitabye Urukiko rw'Ubujurire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza