Perezida Kagame ntiyemeranya n’abasaba ko abana b’imyaka 15 bemererwa kuboneza urubyaro

Yanditswe na Rabbi Malo Umucunguzi
Kuya 8 Ugushyingo 2019 saa 06:01
Yasuwe :
0 0

Perezida Paul Kagame yatangaje ko atemeranya n’abakomeje gusaba ko abana b’imyaka 15 bakwemererwa kuboneza urubyaro, nk’uko bikomeje kugarukwaho mu ngamba zishobora gufasha abana kwirinda gutwara inda imburagihe.

Mu kwezi gushize nibwo byatangajwe ko Guverinoma y’u Rwanda iri kuvugurura itegeko rishobora kugena imyaka umuntu ashobora kwemererwa gukoresha uburyo bwo kuboneza urubyaro, ikaba yava ku myaka 18 ikagera kuri 15.

Mu bitekerezo binyuranye kuri iyi ngingo, Umuyobozi w’Umuryango Nyarwanda wita ku Buzima, HDI, Aphrodis Kagaba, we yavuze ko hari ibiganiro biri gukorwa, nubwo bo bifuza ko imyaka yagabanywa ikagera kuri 12.

Ati ‘‘Nk’umuntu ukorana n’abana nakwifuza ko imyaka y’abahabwa serivisi zo kuboneza urubyaro yagezwa kuri 12 kuko byarushaho kuba byiza. Ntekereza ko n’imyaka 15 ari intambwe nziza kandi mu cyerekezo gikwiye.’’

Mu kiganiro n’abanyamakuru kuri uyu wa Gatanu, Perezida Kagame yavuze ko mbere na mbere abantu bakwiye kumva ko gusambanya abana ari ikibazo kidakwiriye.

Yavuze ko aho gikomerera ari uko nubwo abana baterwa inda bataziterwa n’abo bangana, ahubwo bikorwa n’abantu bari mu myaka 30 ndetse ngo hari n’abagera muri 50.

Yakomeje ati “Kuvuga ngo ugiye kubigira ihame noneho ugiye guha abana b’imyaka 15 uburyo bwo kuboneza urubyaro, mu buryo bw’imitekerereze ni nk’aho umubwiye uti ehh… birimo imyumvire nk’iyo kuboshya, usa nk’uwabyoroheje nk’aho umubwiye uti ‘komeza wikorere ibyo ukora uzarindwa n’uburyo bwo kuboneza urubyaro’, bifite ubwo butumwa bitanga kandi ntabwo ntekereza ko ari ubutumwa bwiza.”

“Ariko reka Abanyarwanda bazabiganire turebe, ariko ndumva njye kuvuga ngo dushyigikire ngo abana b’imyaka 15 bajye bahabwa uburyo bwo kuboneza urubyaro kubera ko hari abo bicika bagatwara inda, ndatekereza ko byateza ikibazo.”

Ubwo yatangizaga umwaka w’ubucamanza muri iki cyumweru, Perezida Kagame yavuze ko abashinzwe gutora amategeko bareba niba ibyaha byo gusambanya abana bidatizwa umurindi n’ibihano bidakomeye.

Hari nyuma yo kubona ko imibare y’abakurikiranweho ibyaha byo gusambanya abana ikomeje kwiyongera, aho Ubushinjacyaha buvuga ko bwakiriye amadosiye 2996 mu mwaka wa 2017/18, akagera ku 3363 mu mwaka 2018/19.

Inkuru wasoma: Abafite imyaka 15 bashobora kwemererwa gutangira gukoresha serivisi zo kuboneza urubyaro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .