Perezida Kagame yaburiye abajya ku buyobozi bagamije indonke

Yanditswe na

Rabbi Malo Umucunguzi

Kuya 31 Werurwe 2016 saa 04:10
Yasuwe :
0 0

Perezida Paul Kagame yasabye abayozi kwirinda kwikubira ibigenewe abaturage no guhishirana mu gihe hari ukora nabi, bagenzi be bakabimenyesha inzego zindi agakurikiranwa.

Yabigarutseho kuri uyu wa 31 Werurwe 2016, ubwo yasozaga Itorero ry’ Imbonezamihigo ryatangijwe kuwa 19 Werurwe 2016 rikitabirwa n’ abagize Inama Njyanama z’Uturere n’Umujyi wa Kigali bagera kuri 834.

Umukuru w’Igihugu yavuze ko abayobozi bagomba guhitamo neza, kuko hari aho usanga bemeranya ibikorwa runaka ariko ntibishyirwe mu bikorwa, akibaza impamvu bahora mu birarane.

Yakomeje abwira abayobozi bashya ati “Niba hari uwaje avuga ati ariko hariya mu buyobozi barahakirira, bahabonera amaramuko, wongere ho uti ‘amaramuko bahabonera bayavana he? Bayavana ku kuri cyangwa bayana kuri porogaramu bagafata ibigenewe abaturage bakabigira ibyabo? Ayo maramuko, ubwo bukire ntabwo aribwo.”

Perezida Kagame yavuze ko iyo umuyobozi akoze ibyo agomba gukora atera imbere kandi n’abaturage bakahagera.

Yakomeje agira ati “Binavuze ko imbaraga za buri umwe zunguka kubera imbaraga za buri wese zashyizwe hamwe. Miliyoni z’abantu iyo zungutse zigatera imbere na wa wundi umwe wigwizagaho ibigenewe abandi, arunguka kandi bigatanga umutekano.”

Abitabiriye Itorero bize kutikubira inshingano

Umujyanama mu Karere ka Rutsiro, Pascal Nzasabimana, yavuze ko ryatumye bamenya kureba kure no gukorera hamwe.

Yagize ati “Turashaka ko muri manda y’imyaka itanu, uzinjira mu karere uyu munsi azayoberwa aho yari ari aho ariho.”

Umuyobozi w’Akarere ka Rusizi, Harelimana Frederic, nawe uri mu itorero, yabwiye IGIHE ko mu bindi bungukiye mu itorero ari kuvuga bike bagakora byinshi.

Yakomeje agira ati “Ibyo bizatuma umenya ngo ndashaka gukora iki, ndakorana na nde, turakorana dute kugira ngo dukemure ikibazo gihari, dutandukanye n’uko buri wese yaba mu nshingano ze gusa akibwira ko agomba kwihererana ibibazo, akihererana gahunda yaba afite.”

Harelimana yavuze ko abayobozi bagomba kumenya ibyihutirwa n’ibishobora kubimburira ibindi mu gushyirwa mu bikorwa, kugira ngo hakorwe byinshi n’ubwo uturere dukunze kugira ikibazo cy’ubushobozi.

Hari ibyo abitabiriye itorero bahigiye Umukuru w’Igihugu

Aba bayobozi bahize ko ko Inama Njyanama na Nyobozi zizuzuzanya hagamijwe iterambere ry’umuturage w’abatoye, harimo kunoza igenamigambi no kurinda ibyo ryabagejejeho.

Ntaganira Josue Michel wavuze mu izina ry’abatojwe yagize ati “tuzaharanira ko abana bataga ishuri, abana bazereraga basangwa mu mihanda hirya no hino bitazongera kugaragara ukundi, bizaba umugani.”

Iri ni itorero rya mbere abayobozi b’Inama Njyanama, abayobozi b’uturere n’Umujyi wa Kigali bahuriyemo kuva batorwa muri Gashyantare, aho batojwe indangagaciro, igenamigambi rishyiramo uruhare rw’umuturage, kubaza buri wese utabashije kurangiza inshinganono ze no kunoza imikorere n’imikoranire.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .