Perezida Kagame yafunguye Kigali Convention Centre ayita intsinzi y’Abanyarwanda

Yanditswe na Philbert Girinema
Kuya 8 Nyakanga 2016 saa 11:17
Yasuwe :
0 0

Perezida Kagame yavuze ko kuzura kw’inyubako ya Kigali Convention Centre, bisobanuye intsinzi y’Abanyarwanda kuko bananiwe kenshi kuyuzuza kubera ubushobozi buke ariko ntibacike intege bikarangira bayuzuje.

Ibi yabitangaje kuri uyu wa Gatanu tariki 8Nyakanga 2016, ubwo yafunguraga ku mugaragaro inyubako ya Kigali Convention Center, izatangira gukoreshwa kuwa 10-18 Nyakanga 2006, ubwo mu masaha make yakira inama y’Umuryango wa Afurika Yunze Ubumwe.

Perezida Kagame yashimiye buri wese watanze imbaraga ze kugirango inyubako Kigali Convention Center yubakwe ikuzura harimo sosiyete ya Suma, Radisoon Blu n’Abanyarwanda muri rusange na Komisiyo ya Afurika Yunze Ubumwe (AU).

Perezida Kagame yavuze ko iyi nyubako yanyuze mu maboko y’abantu benshi ariko barimo Abashinwa, Abadage, n’Abanya- Turkiya ariko ikuzura neza. Ibi avuga ko ari ikimenyetso cy’intsinzi y’Abanyarwanda cyerekana ko icyo bashatse bakigeraho.

Yagize ati “Twageregeje kubaka iyi nyubako imyaka myinshi ishize, twaratsinzwe, bitari rimwe bitari kabiri, ndetse n’ubwa gatatu ariko kubwa kane turagerageza turatsinda, imitekerereze y’Abanyarwanda isobanuye ko twatsinzwe kenshi ariko twatsinze inshuro nyinshi kuruta izo twatsinzwe.”

Akomeza avuga ko kuba u Rwanda rwaratoranyijwe na Komisiyo ya AU ngo rwakire inama y’uyu muryango , byaruteye rugakorana ubwira kugira ngo rwiheshe ishema n’Afurika muri rusange.

Yagize ati “Dukomeza gutsindwa ariko tugakomeza no kugerageza bikarangira dutsinze, ibi nibyo byabaye kuri iyi nyubako. Ku nshuro ya Kane ubwo twageragezaga, twabitewe n’amahirwe twabonaga, ariko twabitewe nuko AU yaduhaye kwakira inama twitegura vuba mu minsi mike.”

“Yari amahirwe akomeye yadushyiraga ku gitutu gikomeye, ku buryo twagombaga kuzuza iyi nyubako.”

Perezida Kagame yavuze ko iyi hoteli na Convention Center, ari iby’Abanyarwanda mbere na mbere kuko banyuze mu mateka mabi yo kuba ahantu hadashimishije.

Yavuze ko yishimiye kuba inyubako ya Kigali Convention Center yuzuye kandi bikaba ari ibyishimo bizakomeza no kuzirikanwa no mu nama Nyafurika Yunze Ubumwe izahesha ishema u Rwanda na Afurika muri rusange.

Perezida Kagame yasabye Abanyarwanda n’inshuti z’u Rwanda gukoresha neza no kwishimira ibyiza bitangwa n’ibi byiza by’iterambere bagezeho.

Yashimangiye ko iyo hataba ubushake bw’Abanyarwanda n’ubufatanye bitari gushoboka.

Mu gufungura iyi nyubako kandi, Umukuru w’Igihugu yagarutse ku kuba igaragaza u Rwanda kubera uko iteye kuva aho winjirira mu muryango muto umeze nk’inzu za kera mu mateka, ndetse na bimwe mu biyubakishije byakorewe mu Rwanda.

Iyi nyubako yubatse mu birometero bitanu uvuye ku kibuga cy’indege mpuzamahanga cya Kigali i Kanombe, mu Murenge wa Kimihurura ku buso bungana na hegitari 12,6.

Kigali Convention Center igizwe na Hotel y’inyenyeri eshanu ifite ibyumba 292, icyumba cy’inama cyakira abantu basaga 2500, ibiro byo gukoreramo n’ibindi.

Inyubako zirimo zifite agaciro ka miliyoni 300 z’amadolari abarirwa muri miliyari 223 z’amafaranga y’u Rwanda.

Rond Point ya KBC mu 2016
Rond Point ya KBC mu 2016
Bimwe mu bice bigize KCC imbere

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .