Perezida Kagame yakiriye David Luiz muri Village Urugwiro

Yanditswe na Rabbi Malo Umucunguzi
Kuya 11 Ukwakira 2019 saa 02:16
Yasuwe :
0 0

Perezida Paul Kagame yakiriye myugariro wa Arsenal FC David Luiz, uri mu Rwanda mu bikorwa bitandukanye bigamije kumenyekanisha ubukerarugendo bw’u Rwanda.

Perezida Kagame ni n’umufana wa Arsenal FC, yanakunze gutanga ibitekerezo ku buryo iyi kipe yakomeje kwitwara mu myaka ishize itegukana ibikombe.

Luiz wambara nimero 23 muri Arsenal FC yageze mu Rwanda kuri uyu wa Kane ahagana saa mbili z’ijoro, aherekejwe n’umukunzi we ndetse na mama we, mu ruzinduko rw’iminsi ibiri rugamije gusura u Rwanda.

Uyu myugariro wa Arsenal ni we mukinnyi w’iyi kipe yo mu Majyaruguru ya Londres mu Bwongereza watoranyijwe ngo asure u Rwanda, mu bikorwa bijyanye n’amasezerano ikipe ye yagiranye narwo yo kwamamaza ubukerarugendo.

Yakiriwe na bamwe mu bakozi b’Ikigo cy’Igihugu cy’Iterambere, RDB, nyuma yerekeza muri Marriot Hotel aho acumbikiwe.

Kuri uyu wa Gatanu Davis Luiz yasuye urwibutso rwa Jenoside rwa Kigali, yunamira abasaga ibihumbi 250 bahashyinguwe.

Mbere y’uko agera mu Rwanda, Luiz yatangaje ko anejejwe no guhagararira Arsenal mu Rwanda nka hamwe mu hantu nyaburanga.

Ati “Numvise ibintu byinshi byiza bijyanye n’ubwiza bw’u Rwanda n’Abanyarwanda, ntegerezanyije amatsiko gusura iki gihugu n’ibyo gifite byose.”

Luiz aje mu Rwanda mu gihe Shampiyona zo ku mugabane w’u Burayi zahagaze kubera imikino y’amakipe y’ibihugu, uyu we akaba atarahamagawe n’Umutoza wa Brésil, Tite, mu mikino ya gicuti igihugu cye kiri gukinira muri Singapore irimo n’uwo cyanganyije na Sénégal igitego 1-1 kuri uyu wa 10 Ukwakira 2019.

Azava mu Rwanda agiranye ikiganiro n’abanyamakuru kizaba ku munsi ubanziriza uwo azasubiriraho mu Bwongereza.

Muri Gicurasi 2018 nibwo u Rwanda rwinjiye mu bufatanye bw’imyaka itatu na Arsenal FC, bugamije kurumenyekanisha u Rwanda nk’icyerekezo gikomeye cy’ubukerarugendo n’ishoramari, binyuze mu gushyira ikirango ‘Visit Rwanda’ ku kuboko kw’ibumoso ku myenda yayo.

Luiz wambara nimero 23 muri Arsenal FC yageze mu Rwanda kuri uyu wa Kane ahagana saa mbili z’ijoro
Perezida Paul Kagame yakiriye myugariro wa Arsenal FC David Luiz, uri mu Rwanda mu bikorwa bitandukanye bigamije kumenyekanisha ubukerarugendo bw’u Rwanda
Uyu myugariro wa Arsenal ni we mukinnyi w’iyi kipe yo mu Majyaruguru ya Londres mu Bwongereza watoranyijwe ngo asure u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza