Perezida Kagame yasabye abasirikare kubaka ubushobozi bwo kurinda ubusugire bw’igihugu (Amafoto)

Yanditswe na Ishimwe Israel
Kuya 29 Ukwakira 2020 saa 06:52
Yasuwe :
0 0

Perezida Paul Kagame akaba n’Umugaba w’Ikirenga w’Ingabo z’u Rwanda, yasabye abitegura kuba abofisiye batorezwa mu Ishuri rya Gisirikare riherereye i Gako mu Karere ka Bugesera, kwitegurira urugendo bagiye gutangira rwo kurinda inyungu rusange n’ubusugire by’igihugu.

Umukuru w’Igihugu waserutse yambaye impuzankano ya Gisirikare yasuye aba banyeshuri basaga 1000 bamaze igihe bahabwa amahugurwa n’inyigisho zitandukanye i Gako kuri uyu wa Kane, tariki ya 29 Ukwakira 2020.

Mu mpanuro Perezida Kagame yahaye abitegura kuba abofisiye mu Gisirikare cy’u Rwanda, yabasabye gutangira kuzirikana ko bakwiye guharanira inyungu z’abaturage no kubarinda.

Yagize ati “Umwuga wo kurinda igihugu cyacu cy’u Rwanda bigomba kumvikana ko ari umwuga usanzwe wo kuba mu ngabo zishinzwe kurinda igihugu, mu buryo bwo kukirinda umwanzi cyangwa kumuhashya igihe yagiteye. Akenshi byumvikana ko aria ho bihera n’aho bigarukira.’’

Yavuze ko muri uko kurwana hari ibindi byinshi byiyongeraho bijyanye no guharanira ubusugire bw’igihugu mu cyerekezo cyifuzwa.

Ati “Kurwana nabyo bikubiyemo imyumvire. Igihugu cyawe uragishaka ute? Ushaka ko kimera gute?’’

Perezida Kagame yashimangiye ko u Rwanda rufite umwihariko wo kugira intego nziza kandi zihambaye z’ibyo rushaka kugeraho.

Ati “Mu muco wacu harimo ko dushobora gukora byinshi birenze iby’amikoro dufite.

“Twe turarinda igihugu cyacu, turarinda ubusugire bw’igihugu cyacu, turarinda intego igihugu gishaka kugeraho. Nibigera ku gukoresha intwaro, tugomba kuba twiteguye dufite ubumenyi bw’uko turwana, dufite ibikoresho bituma dushobora guhangana n’umwanzi. Mu byinshi munyuramo muri hano ni ibyo ngibyo.’’

Umukuru w’Igihugu yabibukije ko amahugurwa bahawe yari agamije kubategurira kuzahangana n’ibintu bikomeye.

Yakomeje ati “Ibyo mwiga ni byiza kuko bifasha kubaka umuntu ushingiye ku musingi wo kumva impamvu yo kuba ingabo y’igihugu.’’

Abanyeshuri bitegura kwinjira mu gisirikare na bo bagize umwanya wo kubaza ibibazo bitandukanye no gutanga ibitekerezo.

Perezida Kagame yaganiriye n’aba banyeshuri ari kumwe n’abandi bayobozi bakuru mu Ngabo z’u Rwanda barimo Minisitiri w’Ingabo, Maj. Gen Murasira Albert; Umugaba Mukuru w’Ingabo z’u Rwanda, Gen Jean Bosco Kazura; Umujyanama wa Perezida wa Repubulika mu by’umutekano, Gen James Kabarebe n’Umuyobozi w’Ishuri rya Gisirikare rya Gako, Gen Maj Innocent Kabandana.

Iki gikorwa cyabaye hubahirizwa amabwiriza yo kwirinda icyorezo Coronavirus arimo kwambara agapfukamunwa.

Umukuru w’Igihugu yaherukaga i Gako muri Gicurasi 2020 ubwo yayoboraga Inama Nkuru ya Gisirikare yahuje ba Ofisiye bo mu Ngabo z’u Rwanda.

Ku wa 16 Ugushyingo 2019, nibwo Perezida Kagame yatanze ipeti rya Sous-Lieutenant ku bofisiye 320 barimo abakobwa 29 basoje amasomo i Gako.

Perezida Kagame yabasabye kurushaho gukora cyane no kwitangira abaturage. Ati “Ingabo z’u Rwanda nkuko twese tubizi zifite amateka yihariye, ingabo zacu zifatanyije kandi zafatanyije n’abaturage kugira ngo igihugu cyacu kigere aho kiri uyu munsi, ni nako bizakomeza kugira ngo kigere aho gishaka ejo.”

Ishuri rya Gisirikare rya Gako riri mu Karere ka Bugesera ritanga amahugurwa y’ibyiciro bitatu. Icya mbere ni ababa bararangije Kaminuza bahabwa amahugurwa y’umwaka umwe, abarangije Kaminuza bafite ubumenyi bwihariye bukenewe mu ngabo biga amezi atandatu n’abahabwa amasomo y’igihe kirekire mu mashami y’Ubuvuzi, Ikoranabuhanga n’Ubumenyi bw’Imibanire y’abantu hongewemo n’ubwa Gisirikare bo biga imyaka ine.

Inyubako z’Ishuri rya Gisirikare rya Gako zubatswe mu 1960. Mu mwaka wa 1974 nibwo hatangiye gutangirwa amahugurwa ku binjira mu gisirikare bato.

Iri shuri rifite umwihariko w’uko mu 1994 ariho hahurijwe ingabo za Ex-FAR zije kwinjizwa mu Gisirikare cya RPA. Mu mwaka wa 1999 nibwo hatangiye gutangirwa amahugurwa ku bofisiye bakuru.

Perezida Paul Kagame yasuye abitegura kuba abofisiye batorezwa mu Ishuri rya Gisirikare riri i Gako mu Bugesera
Perezida Kagame n'Umugaba Mukuru w'Ingabo z'u Rwanda, Gen Jean Bosco Kazura, bagera ahabereye ikiganiro
Imvura yari yaguye ari nyinshi
Perezida Kagame yahaye impanuro abitegura kuba abofisiye batorezwa i Gako
Perezida Kagame na Minisitiri w’Ingabo, Maj. Gen Murasira Albert batanga impanuro ku bitegura kuba abofisiye
Bateze amatwi bumva impanuro zitandukanye bahawe n’Umugaba w’Ikirenga w’Ingabo z’u Rwanda, Perezida Paul Kagame

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .