Perezida Kagame yemereye Abanyarwanda kuzakomeza kubayobora nyuma ya 2017

Yanditswe na

Philbert Girinema

Kuya 1 Mutarama 2016 saa 12:24
Yasuwe :
0 0

Perezida wa Repubulika Paul Kagame yemereye Abanyarwanda nkuko babimusabye mu mvugo no mu ngiro ko yazakomeza kubayobora na nyuma ya 2017, ‘ko adashobora kubyanga’.

Ibi Umukuru w’Igihugu yabitangaje mu ijambo yagejeje ku Banyarwanda abifuriza umwaka mushya wa 2016.

Perezida Kagame yavuze ko umwaka wa 2015 wabayemo ibintu byinshi kandi byagiriye igihugu akamaro, bigaragaza ko ubumwe bw’Abanyarwanda bukomeye ndetse butajegajega kandi umurimo wo kubaka igihugu ukaba wihuta.

Ibi ngo ni yo mpamvu Abanyarwanda basabye ko Itegeko Nshinga rya Repubulika y’u Rwanda ryo mu 2003 rivugururwa, igikorwa cyakozwe bigashimangirwa na referendumu.

Yavuze ko Abanyarwanda bagaragaje mu buryo bwumvikana amahitamo y’ibyo bifuriza ejo hazaza h’igihugu, bityo ko inzira yo kuvugurura Itegeko Nshinga yatanze umwanya wo kureba koko niba ibyo Abanyarwanda bashakaga guhindura bishyira mu gaciro.

Ati “ Mwansabye kuzakomeza kuyobora igihugu nyuma ya 2017, nkurikije uburemere bwabyo n’imyumvikanire mwabihaye nta kuntu ntabyemera ubwo hasigaye inzira zisanzwe bigomba kunyuramo igihe nikigera.”

Yakomeje agira ati “ Ariko ndibwira ko icyo tugamije atari ugushaka umuyobozi w’igihugu uzakomeza ubuziraherezo kandi nanjye siko mbyifuza. Bitari kera cyane, inshingano z’umwanya wa Perezida zizagera ubwo zahererekanywa ku buryo bizagira akamaro n’impamvu birenze kuba urugero byaba ari kuri twebwe twese cyangwa no ku bandi.”

Yasabye Abanyarwanda ko bakomeza inzira batangiye yo guhindura igihugu kuko ‘n’ubundi ibisabwa kugira ngo dushumangire ubuyobozi butekanye ni nabyo bisabwa mu kubaka ubukungu bw’igihugu dutangiye kubona.’

Kuba Abanyarwanda bafite icyizere cy’ejo hazaza asanga bikwiye guha inshuti z’u Rwanda n’Abafatanyabikorwa icyizere ndetse n’abanenga u Rwanda byaba biturutse ‘ku kutatwumva neza cyangwa kudashaka kumva’ bishobora kuba intangiriro y’ibiganiro bituma ‘amaherezo twumvikana, icya ngombwa ni uko abantu bose tugomba kubahana’.

Iyi Yego ya Perezida wa Repubulika ije ikurikira urugendo rw’igihe kirekire rwo kuvugurura Itegeko Nshinga rwasojwe n’amatora ya referendumu yabaye tariki ya 17 Ukuboza 2015 ku Banyarwanda baba mu mahanga na 18 Ukuboza 2015 ku Banyarwanda baba imbere mu gihugu.

Rwarangiye Abanyarwanda bemeje ko Itegeko Nshinga rya Repubulika rivugururwa ku kigero cya 98.3%.

Nyuma yaho Abanyarwanda bakaba bari bakunze kumvikana basaba Perezida Kagame ko na we yabemerera ko azabayobora, gusa agasubiza ko azagira icyo avuga kuri iyo ngingo igihe nyacyo nikigera.

Perezida Kagame yavuze ko adashobora kubyanga kwanga ibyasabwe n’Abanyarwanda

Ijambo rya Perezida wa Repubulika Paul Kagame yifuriza Abanyarwanda umwaka mushya


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .