Perezida Kagame yitabiriye mu buryo bw’ikoranabuhanga inama ya G20

Yanditswe na IGIHE
Kuya 21 Ugushyingo 2020 saa 06:15
Yasuwe :
0 0

Perezida Kagame yitabiriye mu buryo bw’ikoranabuhanga ndetse ageza ijambo ku nama y’abakuru b’ibihugu bigize Ihuriro ry’Ibihugu 20 bikize ku Isi, G20, mu kiganiro cyari kigamije kwigira hamwe uburyo bwo guhangana n’ingaruka z’icyorezo cya Coronavirus.

Iyi nama ni iya mbere ya G20 ibaye mu buryo bw’ikoranabuhanga, ubusanzwe yagombaga kubera muri Arabie Saoudite mu Murwa Mukuru w’iki gihugu, Riyadh, gusa icyorezo cya Coronavirus cyibasiye Isi cyatumye ibintu byinshi bihinduka ikorwa mu buryo bw’ikoranabuhanga.

Ikiganiro cya Perezida Kagame yagitanze mu izina ry’Ishami ry’Umuryango wa Afurika yunze Ubumwe ushinzwe Iterambere, NEPAD, kigaruka ku ngamba zo guhangana na COVID-19 ndetse no kuzahura ubukungu.

Kimwe mu biri ku isonga mu ngingo z’ibyigwa ni ikijyanye no kugura urukingo rwa COVID-19 n’uko ruzakwirakwizwa ndetse n’uburyo bwakorohera ibihugu bikennye gupima iki cyorezo ku giciro gito.

Ikindi ni uburyo ibihugu bikennye byakorohezwa ku myenda byahawe, bigahabwa igihe kirekire cyo kuyishyura.

Arabie Saoudite iyoboye ibihugu bigize G20 muri uyu mwaka. Ku buyobozi bwayo, miliyari ibihumbi 11 z’amadolari zashowe mu bikorwa bigamije guhangana n’ingaruka z’icyorezo cya Coronavirus ku bukungu bw’Isi ndetse byemera gutanga miliyari 21 z’amadorali agenewe inzego z’ubuzima mu guhangana na COVID-19.

G20 ni ihuriro mpuzamahanga ry’ibihugu 19 n’Umuryango w’Ibihugu by’Ubumwe bw’u Burayi. Ibyo bihugu bindi ni Argentine, Australie, Brésil, Canada, u Bushinwa, u Bufaransa, u Budage, u Buhinde, Indonesie, u Butaliyani, u Buyapani, Mexique, u Burusiya, Arabie Saoudite, Afurika y’Epfo, Koreya y’Epfo , Turikiya, u Bwongereza na Leta Zunze Ubumwe za Amerika.

Perezida Kagame akurikiye ibiganiro byatangwaga n'abandi bakuru b'ibihugu bitabiriye iyi nama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .