Polisi na Ferwafa binjiye mu bufatanye bwo kubungabunga umutekano wo mu muhanda

Yanditswe na IGIHE
Kuya 5 Ukwakira 2019 saa 04:32
Yasuwe :
0 0

Polisi y’u Rwanda n’Ishyirahamwe ry’umupira w’amaguru mu Rwanda (Ferwafa), batangije ubufatanye bugamije gukwirakwiza ubutumwa bwo kubungabunga umutekano wo mu muhanda.

Binyuze muri ubu bufatanye, abakunzi b’umupira w’amaguru kuri stade zitandukanye bazajya bagezwaho ubutumwa bwo kwirinda impanuka zo mu muhanda.

Gutangiza ubu bufatanye byabereye kuri Stade Amahoro, mu mukino wahuje Gasogi United na Rayon Sports, akaba ari nawo mukino wa mbere wa shampiyona kuri aya makipe.

Polisi y’u Rwanda n’abafatanyabikorwa bayo bari mu bukangurambaga bwiswe ‘Gerayo Amahoro’. Ubu bukangurambaga bugamije gukangurira abakoresha umuhanda bose kurwanya impanuka ziwuberamo.

Gerayo Amahoro ni ubukangurambaga bwatangijwe na Polisi y’u Rwanda ku wa 13 Gicurasi 2019; mu byumweru 52 buzamara, bwitezweho kugabanya impanuka zikorerwa hirya no hino mu mihanda ndetse bukanasobanurira abaturage n’abatwara ibinyabiziga amategeko bakwiye gukurikiza hagamijwe kurwanya izo mpanuka.

Mu Rwanda mu mwaka ushize wa 2018, impanuka zahitanye abantu 465 zikomerekeramo abagera kuri 654.

Perezida Kagame aherutse kuvuga ko na byo ari ibintu bimaze gukabya ku buryo hakwiriye imbaraga zirenze izisanzwe.

Yavuze ko nubwo impanuka zidashobora gucika burundu, hari uburyo bwo kuzigabanya kuko ubuzima bw’umunyarwanda umwe bugiye ari igihombo gikomeye.

Ati “Impanuka zo zizahoraho haba mu Rwanda n’ahandi ariko njye iyo nkurikiye uko ziba hari izishobora kwirindwa, dukwiriye kuba tugabanya. Niyo yaba umuntu umwe ni umuntu. Abantu ntabwo ubabara gutyo nk’ibyatsi. Icya mbere kibitera ni ukutagira umuco wo kwifata, umuvuduko ukabije. Kwiruka cyane mu gihugu cyacu n’aya makoni, uba ushaka urupfu.”

Yagarutse ku bashoferi batumva inama bagirwa, bagatwara ibinyabiziga basinze kandi batwaye abantu.

Ati “Bakavuga ngo basanze umuntu yiruka atumva kuko yari yasinze kandi ubwo ahetse abantu barimo n’abana, ariruka nk’umusazi ntazi aho ava n’aho ajya. Ejo bundi hari uwo bambwiye saa tanu z’amanywa hano mu mujyi yakoze impanuka kubera urwagwa rwinshi.”

Perezida Kagame yavuze ko hakenewe imbaraga nyinshi mu gutanga no gusuzuma ibyangombwa byo gutwara imodoka ndetse n’imodoka zigasuzumwa cyane kugira ngo impanuka zigabanyuke.

Perezida wa Ferwafa (Rtd) Brig Gen Sekamana (ibumoso), Umuyobozi wa Rayon Sports Munyakazi Sadate, Umuyobozi wa Gasogi United KNC n' Umuyobozi Mukuru wa Polisi wungirije ushinzwe abakozi n'imiyoborere, Juvenal Marizamunda
Ubu bufatanye bwatangirijwe ku mukino wa Gasogi United na Rayon Sports
Kazindu Bahati Guy, Kapiteni wa Gasogi United
Rutanga Eric, Kapiteni wa Rayon Sports

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza