Polisi yashimye abaturage bo mu Kinigi bifatiye bamwe mu bishe abaturanyi babo (Amafoto)

Yanditswe na Rabbi Malo Umucunguzi
Kuya 6 Ukwakira 2019 saa 09:12
Yasuwe :
0 0

Umuvugizi wa Polisi y’u Rwanda, CP John Bosco Kabera, yashimiye abaturage bo mu Kinigi mu Karere ka Musanze, ku bushake bagaragaje mu gufatanya n’inzego z’umutekano mu gukurikirana abagizi ba nabi bishe abagera kuri 14 bagakomeretsa n’abandi benshi.

Kuri iki Cyumweru Polisi y’u Rwanda yatangaje ko abantu 19 mu bagabye igitero ku baturage mu ijoro ryo ku wa Kane bitwaje intwaro gakondo bishwe, ndetse batanu bafashwe mpiri.

Nyuma y’uko abafashwe beretswe itangazamakuru kuri iki Cyumweru, Umuvugizi wa Polisi y’u Rwanda, CP John Bosco Kabera, yavuze ko ubwo bwicanyi bwakoranywe ubugome bukabije, kuko bakoresheje ibyuma abandi bakicaza abaturage bagafata amakoro bakabakubita mu mutwe.

Yagize ati “Abafashwe bari butange amakuru nyayo kuko ubwo gahunda zatangiye, tumaze kubereka itangazamakuru, ariko ikibazo si ukumenya ngo ni bande cyangwa baturutse he, kuko birazwi ko mu Rwanda nta bantu bitwaje ziriya ntwaro za gakondo bakoresheje mu kwica, bari ku butaka bw’u Rwanda.”

Yavuze ko abarwanyi 19 bamaze kwicwa ari ukubera ubufatanye n’abaturage, kandi gushaka undi wese wabigizemo uruhare mu buryo buziguye cyangwa butaziguye bikomeje, bidateze kurangirira ku kuvuga ko hari abapfuye cyangwa bafashwe.

Yakomeje ati “Ikigaragara dushima cyane ni inzego z’ibanze ndetse n’abaturage dushimira uburyo batanga amakuru, ngira ngo mwagiye mubona ibintu byagiye bica ku mashusho, bigaragaza abaturage abantu bafataga, hari abo bafataga ejo, hari abo bavuga bafatiye mu isoko barimo kugurisha ibitoki, uwari wihishe. Hari abo bafataga bakiruka bagahuruza ingabo, ni ikintu gikomeye cyane ku buryo twagira ngo tubashimire abaturage, dushimire inzego z’ibanze, ubufatanye n’inzego z’umutekano.”

CP Kabera yavuze ko umutekano mu Kinigi uhari, ku buryo imirimo yose yakomeje nk’ibisanzwe.

Abantu 14 baguye muri iki gitero bashyinguwe kuri iki Cyumweru, tariki ya 6 Ukwakira 2019.

Abagizi ba nabi batanu batawe muri yombi ku bufatanye n'abaturage
Bamwe mu baturage bo mu Kinigi baguye gitumo umwe mu bagizi ba nabi
Abagizi ba nabi 19 bishwe nyuma yo kugaba igitero ku baturage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza