RIB yataye muri yombi abantu babiri bakekwaho guhimba ibyangombwa bakagurisha ubutaka bw’undi

Yanditswe na Tuyishimire Raymond
Kuya 30 Ugushyingo 2020 saa 04:06
Yasuwe :
0 0

Urwego rw’Ubugenzacyaha, RIB, rwerekanye abantu babiri bakekwaho icyaha cyo guhimba, guhindura no gukoresha impapuro mpimbano, bafashwe bakurikiranyweho gucura inyandiko bakagerageza kugurisha ubutaka bw’undi muntu buherereye mu Karere ka Gasabo.

Ku wa 26 Ugushyingo 2020 nibwo RIB yafashe umugabo n’umugore bafashwe bigize nk’aho bashakanye, bifashisha inyandiko mpimbano ngo bagurishe umutungo w’undi muntu, uherereye mu Karere ka Gasabo, i Kibagabaga.

RIB yatangaje ko baguwe gitumo bari i Nyarutarama, bamaze gukora amasezerano y’ubugure, bategereje kwishyurwa miliyoni 25 Frw z’umutungo bari bagurishije bifashishije izo mpapuro mpimbano.

Umugore ukurikiranywe muri iki kibazo yavuze ko umugabo bafatiwe mu cyaha kimwe bamenyanye mu mwaka wa 2017, kuva icyo kugeza mu 2020 ngo yari atarongera kumubona. Ngo yongeye kumuhamagara ku wa 25 Ugushyingo amusaba kujya amucururiza ibikwembe.

Ngo yongeye kumuhamagara ku wa 25 Ugushyingo amusaba ko bahurira ahitwa kuri Café i Gikondo bakaganira uburyo yajya amufasha kumugurishiriza ibitenge.

Ati “Yarampamagaye ambaza ngo ndi he? Ndamubwira ngo ahantu hitwa kuri Café Rwampara. Ndagenda mpageze mfata telefoni ndamuhamagara musangana n’abandi bagabo bagera muri bane bicaye mu modoka.’’

Yavuze ko bayinjiyemo maze amutira telefoni ariko agamije kuyifotoresha irangamuntu ku buryo n’ibyo yayikoreragaho atamubonaga kuko yari yicaye inyuma, baraganira aza kumusaba kujya amucururiza.

Ati “Maze kwicara arambaza ngo iyo telefoni yabaye iki? Nanjye nti yaramenetse, ansaba kuyimutiza ndayimuha ubwo na we arakomeza ayinjiramo. Arambwira ngo ese ko mfite ibitenge, ntiwamfasha kubigurisha? Ndamubwira ngo nta kibazo. Arambwira ngo ntacyo ndi bugahamagare mu gitondo.’’

Bwaracyeye ahagana saa Moya z’igitondo amusanga aho bari guhurira gusa bahinduye gahunda bitewe nuko abo bari buhure bataje bimurira saa Kumi n’imwe, bagahurira i Nyarutarama.

Yavuze ko akihagera yasanze uwo mugabo ari kumwe n’abandi afite dosiye zirimo ibyangombwa by’ubutaka n’indangamuntu maze amusaba kubandikira amasezerano y’ubugure ari nabwo baje gufatwa.

Yakomeje ati "Ndamubwira ngo nonese njye ko wampamagaye mu kugurisha ibitenge, ndandika amasezerano y’ubugure mu ruhe rwego? Arambwira ngo nyandikira ntacyo n’ab’ibitenge baraza. Iyo ndangamuntu ni we wari uyifite, icyo cyangombwa cy’ubutaka ni we wari ugifite."

Yavuze ko umwe mu bagabo bari aho yasohotse, ageze hanze arabahamagara maze bisanga RIB yabafashe.

Ku rundi ruhande uwo mugabo we ntiyemera ko ariwe wamuhamagaye kuko ahubwo na we yahamagawe n’uwashakaga kumubera umugabo.

Ati “Njye yarampamagaye ngo bafite ubutaka nze kubafasha kubugurisha, ni cyo kintu tuziranyeho kuko njye simvuka inaha, njye yari yambwiye ngo nze mbe mu bagabo.’’

Umuvugizi w’umusigire wa RIB, Dr Murangira B. Thierry, yavuze ko abakora bene ibyo byaha bagenda bagacurisha indangamuntu n’ibyangombwa by’ubutaka, umwe agahagarara nk’umugore undi nk’umugabo, bagashaka kugurisha umutungo ku buryo umuntu awuguze ayatamo, kuko aba agendeye ku byangombwa by’ibihimbano.

Ati "Umuntu ugerageza gucura ibyangombwa cyangwa kwiyandikaho umutungo utari uwe, azafatwa."

Yasabye abantu kugira ubushishozi mu gihe bagiye kugura imitungo, bakareba niba bagiye kugura umutungo na ba nyirawo koko.

Baramutse bahamijwe iki cyaha bazahanishwa igifungo kitari munsi y’imyaka itanu ariko kitarengeje imyaka irindwi, ndetse n’ihazabu iri hagati ya miliyoni eshatu na miliyoni eshanu z’amafaranga y’u Rwanda.

Batawe muri yombi bakurikiranyweho impapuro mpimbano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .