Ruhango: Abarenga 50 bafashwe kubera kurenga ku mabwiriza agenga ubucuruzi mu gihe cya COVID-19

Yanditswe na Habimana James
Kuya 25 Werurwe 2020 saa 09:11
Yasuwe :
0 0

Akarere ka Ruhango kamaze guta muri yombi abantu barenga 50 kubera kunyuranya n’amabwiriza yo kwirinda icyorezo cya Coronavirus, aho abenshi muri aba biganjemo abacuruzi.

Hashize iminsi hashyizweho ingamba nshya zijyanye n’ikumirwa ry’icyorezo cya COVID-19, nyuma y’itangazo rya Minisitiri w’Intebe risaba abantu bose kuguma mu ngo, amaduka n’ibindi bikorwa bigafungwa usibye abacuruza ibiribwa na za farumasi.

Nubwo bimeze gutya hari bamwe mu baturage bakomeje kunyuranya n’aya mabwiriza, aho bahitamo gufungura amaduka cyangwa bakihisha mu bikari ngo inzego z’ubuyobozi zitabatahura.

Imibare ya Minisiteri y’Ubuzima iragaragaza ko icyorezo cya Coronavirus gikomeje kwiyongera mu gihugu, kuko hari abarwayi 40, bityo igasaba abaturage kwitwararika no kubahiriza amabwiriza yashyizweho.

Umuyobozi w’Akarere ka Ruhango, Habarurema Valens, yabwiye IGIHE ko mu turere tw’icyaro hakunze kuba abacuruzi bagira butike zivanze n’ibintu byinshi, ariko ubu hatangiye kugaragara abashyiramo amanyanga.

Yavuze ko mu minsi itatu abantu 74 bahanwe, 67 bacibwa amande arenga miliyoni imwe y’amafaranga y’u Rwanda, abandi barindwi barafungwa.

Yavuze ko aho ubuyobozi bubwiriye abacuruzi ko hakenewe abacuruza ibiribwa gusa, bamwe muri aba bahisemo kujijisha, aho usanga bavanzemo imineke n’ibindi biribwa mu maduka, kugira ngo berekane ko n’ibiribwa birimo.

Yagize ati “Uwo muntu ujijisha muri ubwo buryo ni wawundi uba ushaka guteza akavuyo mu bantu, hari ahandi turimo gusanga utubari aho usanga umucuruzi yakinze ariko wajya mu gikari, ugasanga arimo kotsa inyama abantu barimo kunywa, gusa dushima ko abenshi mu baturage bamaze kumva no kumvira amabwiriza.”

Aba ni bo ubuyobozi bwataye muri yombi, ndetse abandi bashyirirwaho amande kugira ngo bubahirize amabwiriza yashyizweho.

Yavuze ko abaturage bakwiye kumva ko ingamba leta yashyizeho zitagamije kubabangamira, ahubwo zigamije kubakingira ko icyorezo cya Coronavirus cyabambura ubuzima.

Polisi y’u Rwanda nayo mu bice bitandukanye by’igihugu yakajije ingamba zo kureba ko amabwiriza yashyizweho yubahirizwa mu kwirinda ikwirakwira rya Coronavirus.

Mu bice bitandukanye by'igihugu hari gutangwa ubutumwa bugamije gukangurira abaturage kwirinda Coronavirus baguma mu ngo zabo
Umuyobozi w’Akarere ka Ruhango, Habarurema Valens, yavuze ko mu turere tw’icyaro hakunze kuba abacuruzi bagira butike zirimo ibintu byinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza