Rusesabagina yahishuye uko yatunguwe yisanze i Kigali mu gihe yari azi ko agiye i Burundi

Yanditswe na Philbert Girinema
Kuya 18 Nzeri 2020 saa 07:31
Yasuwe :
0 0

Paul Rusesabagina uri mu maboko y’inzego z’umutekano aho akurikiranyweho ibyaha bitandukanye birimo iby’iterabwoba, yahishuye ko yatunguwe no kwibona mu Rwanda mu gihe muri gahunda harimo ko yerekeje mu Burundi mu bikorwa byo kuganira n’amadini atandukanye.

Rusesabagina yeretswe itangazamakuru ku wa 31 Kanama 2020, RIB isobanura ko yatawe muri yombi afatiwe ku Kibuga Mpuzamahanga cy’Indege cya Kigali ndetse ko yageze mu Rwanda ku bushake.

Ifatwa rye ryakuruye impaka ku Isi hose, bamwe bavuga ko yashimuswe, abandi ko indege yarimo yayobejwe akisanga i Kigali. Hari amakuru yavugaga kandi ko ku wa 27 Kanama 2020, Rusesabagina yageze i Dubai saa moya n’iminota icumi z’ijoro.

Muri iryo joro ahagana saa Saba z’urukerera, ngo yavuye ku Kibuga cy’Indege cya Al Maktoum i Dubai ari mu ndege bwite yo mu bwoko bwa Bombardier Challenger 605 y’isosiyete yitwa GainJet, yamugejeje i Kigali mu rukerera rwo ku wa Gatanu.

Mu kiganiro cyihariye yagiranye na New York Times, uyu mugabo w’imyaka 66 yavuze ko yafashe indege atekereza ko agiye mu Burundi. Iki kiganiro yagitanze ku wa Kane w’iki Cyumweru kuri Station ya Polisi ya Remera aho afungiwe, yari kumwe n’abunganizi be babiri aribo Me Nyambo Emeline na Me Rugaza David. Ni ikiganiro yavuze ko yatanze ku bushake bwe nta muntu umuhatiye.

Icyo kiganiro cyakorewe mu cyumba Rusesabagina afungiwemo, inkuru ivuga ko cyari kirimo isuku, kirimo uburiri butwikirije inzitiramibu. Uyu mugabo ngo yari yambaye ipantalo ya kaki, ikote, inkweto n’isaha ku kuboko iri mu ibara rya zahabu.

Rusesabagina yabariye umunyamakuru inkuru y’uburyo yageze mu Rwanda avuye ku Kibuga cy’indege i Dubai. Gusa ni inkuru igiteye amatsiko menshi.

Yavuze ko yaketse ko indege bwite yinjiyemo ari i Dubai yerekeje i Burundi mu Mujyi wa Bujumbura aho yari afite gahunda yo kuganira n’amadini atandukanye ku butumire bw’umupasiteri waho.

Aho kwisanga i Burundi, ngo yasohotse mu ndege ku wa 29 Kanama asanga akikijwe n’abasirikare b’u Rwanda, ni ko kumenya ko aho ari atari i Burundi ahubwo ari mu gihugu cy’igituranyi, u Rwanda, aho yaherukaga mu myaka 16; ibintu ngo nawe byamutunguye.

Abajijwe uko yumvise ameze nyuma yo kwisanga mu Rwanda, Rusesabagina yarasubije ati“Nawe ibaze uko wakumva umeze wisanze ahantu udakwiriye kuba uri”.

Rusesabagina yatangaje ko yatunguwe no kwisanga ku Kibuga cy'Indege Mpuzamahanga cya Kigali akikijwe n'abasirikare b'u Rwanda mu gihe yari azi ko agiye mu Burundi

Perezida Kagame yari aherutse gutangaza ko Rusesabagina ariwe wizanye mu Rwanda ku bushake, ndetse ko bisa n’umuntu wibeshye nimero ahamagaye. Ati “Ushobora kwizana ubishaka uzi n’icyo ukora icyo ari cyo, ushobora [no] kwizana wabeshywe ukisanga hano [...] Ariko uwanabwira n’abantu ko ari we wanizanye, ubwo urubanza rwaba ruri hehe? Rwaba ruri kuri nde?"

Yakomeje agira ati “Byabaye nko guhamagara nimero ya telefone ukaza gusanga wibeshye nimero wahamagaye. Kandi inzego zabigizemo uruhare zambwiye ko nta nenge yabayemo.”

Rusesabagina aherutse kugera imbere y’urukiko, amenyeshwa ibyaha 13 akekwaho ndetse kuri uyu wa Kane, Urukiko rw’Ibanze rwa Kicukiro rwanzuye ko afungwa muri gereza iminsi 30 y’agateganyo mu gihe iperereza rigikomeje, umwanzuro yahise ajuririra.

Yabwiye New York Times ko ari umwere ku byaha byose ashinjwa. Ku munsi wa mbere w’iburanisha rye, yari yabwiye urukiko ko yicuza ibikorwa byakozwe na FLN yari ayoboye byo kwica abaturage mu turere twa Nyaruguru ndetse ko yabisabiye imbabazi abagizweho ingaruka nabyo n’igihugu muri rusange.

Hari hashize iminsi umuryango we utangaje ko utemera abanyamategeko batoranyijwe n’uyu mugabo w’imyaka 66, kuko ngo babogamiye ku ruhande rw’u Rwanda, ugena abandi barindwi barimo umunyarwanda umwe nk’abagomba kumwunganira.

Rusesabagina yavuze ko ariwe wihitiyemo abamwunganira kandi ko anezerewe kuba akorana nabo. Ati “Ni njye watoranyije abanyunganira kandi nishimiye kuba mbafite. Gusa umuryango wanjye ntabwo wabimenyeshejwe.”

Yavuze ko nubwo afunzwe, afite ikibazo cy’uburwayi bw’umuvuduko w’amaraso, ariko ko inzego z’u Rwanda zimwoherereza buri gihe abaganga bo kumwitaho.

Ati “ Abantu benshi baraza bakamvugisha. Banasukura icyumba cyanjye. Bampa ibiryo. Ni abantu beza. Ikintu cyose kimeze neza kugeza ubu.”

Muri iki kiganiro ntiyigeze asobanura uko byagenze mu gihe cy’iminsi itatu hagati y’urugendo rwe ruva i Dubai no kugaragara kwe i Kigali umunsi yerekwaga itangazamakuru.

Ati “Natwawe ahantu. Ntabwo nibuka ngo nihe. Nari mboshye, amaguru, mu maso, ntabwo nabonaga ikintu icyo aricyo cyose. Ntabwo nari nzi aho ndi.”

Abajijwe niba yari yigeze ahatwa ibibazo, yavuze ko bitabayeho, ati “mu by’ukuri nta byabayeho, nta muntu wampase ibibazo.”

Paul Rusesabagina ubwo yari imbere y'Urukiko rw'Ibanze rwa Kicukiro kuri uyu wa Kane ubwo yasomerwaga umwanzuro ku ifungwa n'ifungurwa ry'agateganyo
Uyu mugabo yamaganye amakuru avugwa n'umuryango we ko yahatiwe abanyamategeko, avuga ko babiri afite ariwe wabitoranyirije kandi anezerewe ku bwo gukorana nabo. Abo banyamategeko ni Me Nyambo Emeline na Me Rugaza David
Rusesabagina yatangaje ko aho afungiwe, yitabwaho neza ndetse ko abonana n'abaganga inshuro nyinshi dore ko afite uburwayi bw'umuvuduko ukabije w'amaraso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .