Rwamagana: Abaturage baracyagorwa no kubona ibiti bivangwa n’imyaka

Yanditswe na Hakizimana Jean Paul
Kuya 21 Ugushyingo 2020 saa 11:00
Yasuwe :
0 0

Abaturage bo mu Karere ka Rwamagana bavuze ko bakigorwa no kubona ibiti bivangwa n’imyaka ndetse n’aho biri bigurishwa amafaranga ari hejuru ku buryo kugura byinshi bigorana.

Ibi babigaragaje kuri uyu wa Gatandatu tariki ya 21 Ugushyingo 2020 mu muganda wari ugamije gutera ibiti 5000 bivangwa n’imyaka mu Murenge wa Gishari.

Ubusanzwe ibiti bivangwa n’imyaka bifatwa nk’inkingi y’ubuhinzi bunoze n’iterambere rirambye, bifasha mu guteza imbere imibereho myiza y’umuturage, birwanya imyuka ihumanya ikirere wakongeraho ibiti by’imbuto bikanifashishwa mu mirire myiza ku muryango.

Semana Evariste yavuze ko mu biti badakunda kubona harimo ibiti bivangwa n’imyaka n’iby’imbuto, asaba leta n’abafatanyabikorwa bayo kujya babibaha.

Ati “Nka avoka n’imyembe ntabwo bipfa kuboneka, ukongeraho ibindi biti bisanzwe bivamo imbaho nabyo usanga nta hantu tugira tubikura kandi no kubigura ku muturage ufite pepiniyeri usanga bihenze cyane.”

Sibomana Daniel we yagize ati “Ibiti bivangwa n’imyaka kubibona biragoye, iyo leta itabiduhaye ntabwo wapfa kubibona bisaba kugira ngo ushake abantu bafite ingemwe ubundi bakabikugurisha ku giciro bishakiye.”

Yakomeje avuga ko kugira ngo ubone ahantu hari abantu bafite ibiti bidapfa koroha ngo naho ubonye kimwe baguca 100 Frw hakaba nubwo ashobora kurenga.

Ati “Nk’igiti cy’umuhumuro ntabwo kigipfa kuboneka ni igiti kivamo imbaho kandi imbaho zitanga amafaranga, usanga kizana umuyaga mu rugo kandi wanatera imyaka mu murima ntikiyone. Ikindi ni amatunda, imyembe ya kijyambere, avoka zerera igihe gito n’ibindi byinshi usanga bigorana kubibona.”

Mukamana Emilienne we yagize ati “ Nk’igiti cya gereveriya usanga kigura 60 Frw, inturusu 50 Frw urumva mu gihe ushaka gutera byinshi n’amafaranga ariyongera bikaduca integer. Nibura twasaba leta ko mu gihe yaje kubiduha yajya inaduha ibiti by’ubwoko bwose ku buryo bitworohera kubibona tutagiye guhenderwa ku ruhande.”

Umuyobozi w’Ishami ry’Ubuhinzi n’umutungo Kamere mu Karere ka Rwamagana, Dr Niyitanga Jean de Dieu, yavuze ko abaturage bashonje bahishiwe kuko ngo muri uyu mwaka biyemeje kubibagezaho.

Yavuze ko muri uyu mwaka hazaterwa ibiti bivangwa n’imyaka kuri hegitari 1446 bitarenze ukwezi kwa mbere.

Ati “Ubu ngubu mu gutera tugeze kuri 60% tukaba twifuza gusozanya n’ukwezi k’Ugushyingo kugira ngo bitazahura n’ikibazo, tuzibanda ku biti birimo ibirumbura ubutaka, ibitanga imbaho n’imbuto.”

Ku kijyanye no kwegereza abaturage ibiti bivangwa n’imyaka yavuze ko bari gukorana n’abafatanyabikorwa batandukanye kugira ngo bashyire pepiniyeri kuri buri kagari kugira ngo abaturage babashe kubikura ahantu habegereye.

Ati “Bizaba ari ibiti biteguriye ndetse banagize uruhare mu kubikora kandi mu gihe bazaba banabitegura leta izajya igira uruhare mu kubaha insimburamubyizi. Ibiti bizahategurirwa harimo avoka, amaronji, imyembe ndetse n’ibindi bivangwa n’imyaka.”

One Acre Fund Tubura isanzwe inunganira leta mu gutera ibiti muri uyu mwaka irateganya gutera ibiti miliyoni 15 mu turere 23 mu rwego rwo gufasha leta kugeza ibiti bivangwa n’imyaka ku muturage. Imaze gutanga ibiti 60 000 byafashije imiryango itandukanye.

Abaturage bo muri Rwamagana baracyagorwa no kubona ibiti bivangwa n’imyaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .