Rwanda-Qatar: Ibyo wamenya ku mushinga w’ikibuga cy’indege cya Bugesera

Yanditswe na Cyprien Niyomwungeri
Kuya 10 Ukuboza 2019 saa 11:27
Yasuwe :
0 0

Mu masaha y’umugoroba wa joro ryo ku wa 9 Ukuboza 2019, inkuru nziza yatashye mu matwi y’abanyarwanda ko habonetse umufatanyabikorwa ukomeye mu mushinga wo kubaka ikibuga mpuzamahanga cy’indege cya Bugesera.

Nta wundi ni Qatar Airways yaguze imigabane ingana na 60% muri uyu mushinga w’ikibuga cy’indege ‘kitarabonerwa izina ryiza’, mu gihe u Rwanda rwasigaranye imigabane ingana na 40%.

Ugereranyije n’isura y’uyu mushinga mu myaka nk’ibiri ishize ubwo watangiraga, hari impinduka nyinshi n’urugendo rurerure rwakozwe, yaba guhinduka kw’igishushanyo mbonera, ingano, ingengo y’imari n’ubushobozi.

Muri iyi nkuru turibanda ku bintu by’ingenzi kuri uyu mushinga ubumbatiye guteza imbere urwego rw’ubwikorezi bw’indege, ubucuruzi, ubukerarugendo ndetse no guhanga imirimo.

Amasezerano na Mota-Engil

Mu 2016 u Rwanda rwasinyanye amasezerano na Sosiyete y’Ubwubatsi yo muri Portugal yitwa “Mota Engil Engenharia e Construcao Africa”, kugira ngo izubake ikibuga mpuzamahanga cy’indege cya Bugesera.

Ubwubatsi bw’icyo kibuga bwari bwashyizwe mu byiciro. Icya mbere cyagombaga gutwara miliyoni 418 z’Amadorali ya Amerika, byari biteganyijwe ko kizaba cyuzuye mu Ukuboza 2019.

Nyuma y’icyo cyiciro hagombaga gukurikiraho ibikorwa byo kwagura ahamaze gukorwa, byari byaragenewe agera kuri miliyoni 400 z’amadolari; ku buryo cyari gukoreshwa u Rwanda rwakira inama ya Common Wealth muri Kamena 2020.

Ubwo Mota-Engil yasinyanaga amasezerano n'u Rwanda mu 2016

Ibuye ry’ifatizo

Muri Kanama 2017, Perezida Kagame yashyize ibuye ry’ifatizo ahazubakwa ikibuga mpuzamahanga cy’indege cya Bugesera, yizeza ko uyu mushinga nta kabuza uzarangira ugafasha u Rwanda kugera ku ntumbero y’iterambere rwihaye.

Perezida Kagame ahereye ku rugero rw’abaturage bavugaga ko babeshywe amabati ntibayahabwe, yijeje ko iki kibuga atari nk’ayo mabati kuko iri buye ry’ifatizo ari intangiriro y’imirimo yo kucyubaka.

Yakomeje avuga ko nubwo u Rwanda rusanganywe ikibuga mpuzamahanga cy’indege cya Kigali gikora neza, iki cya Bugesera kizatuma rugera ku cyerekezo cy’iterambere ryarwo n’irya Afurika muri rusange.

Ubwo Perezida wa Repubulika Paul Kagame yashyiraga ibuye ry'ifatizo ahazubakwa ikibuga cy'indege

Igishushanyo mbonera

Inyigo ya mbere yari yakozwe yateganyaga ko ikibuga cy’indege cya Bugesera kizafungura gifite ubushobozi bwo kwakira abantu miliyoni 1.7 ku mwaka, cyakuzura hakubakwa ibindi byiciro kugeza kigize ubushobozi bwo kwakira abantu miliyoni eshanu ku mwaka z’abagenzi.

Muri rusange igice cy’inyubako cy’iki kibuga cyanganaga na metero kare 13 000. Cyari cyarateganyirijwe inyubako umunani ari zo; inzu y’abagenzi, ahagurirwa amafunguro n’ibindi, inzu yo kurwanya inkongi, iya Polisi, iy’umutwe ushinzwe kurwanya iterabwoba, umunara, inzu y’imizigo, inzu y’abatunganya ikibuga n’ibindi.

Hari kandi inzu y’abagenzi (Terminal), aho bazajya bahererwa serivisi zose, yaba kugenzura imizigo, umutekano n’ibindi.

Mu mwaka ushize nibwo byatangajwe ko igishushanyo mbonera cy’Ikibuga cy’Indege Mpuzamahanga cya Bugesera, cyavuguruwe hagamijwe kucyagura, kongera ubwiza bwacyo ndetse no kuvugurura imyubakire, hagendewe ku biranga ibibuga mpuzamahanga bigezweho.

Minisitiri w’Ibikorwa Remezo, Amb. Gatete Claver, avuga ko icyiciro cya mbere cy’ikibuga gishya kizahabwa ubushobozi bwo kwakira abagenzi bagera kuri miliyoni zirindwi ku mwaka.

Icyiciro cya mbere kizajya cyakira abagenzi miliyoni zirindwi ku mwaka, kizuzura gitangire no gukoreshwa mu 2022.

Igishushanyo mbonera cy'ikibuga cy'indege cya Bugesera nacyo cyarahinduwe

Qatar mu mushinga w’ikibuga cy’indege

Muri Werurwe uyu mwaka, Itsinda ry’intumwa za Qatar, riyobowe na Minisitiri w’Intebe wungirije akaba na Minisitiri w’Ububanyi n’Amahanga, Sheikh Mohamed bin Abdulrahman Al Thani, bagiranye ibiganiro na Leta y’u Rwanda birimo gutera inkunga umushinga wo kwihutisha kubaka ikibuga mpuzamahanga cy’indege cya Bugesera.

Ni nyuma y’uko u Rwanda rwari rumaze igihe rushakisha amafaranga yo gushora muri uyu mushinga.

Uru ruzinduko rwakurikiwe n’urw’Umuyobozi w’Ikirenga wa Qatar (Emir) Sheikh Tamim bin Hamad al Thani wasuye u Rwanda muri Mata, hagasinywa amasezerano menshi y’ubufatanye.

Umwaka ushize Perezida Kagame yagiriye uruzinduko muri Qatar nabwo hasinywa amasezerano. Nta gushidikanya ko uyu mubano mwiza wasembuye iri shoramari mu kibuga cy’indege cya Bugesera.

U Rwanda na Qatar bisanzwe bifitanye umubano mu ngeri zitandukanye. Abanya-Qatar bakomeje kugaragaza ubushake bwo gukorera mu Rwanda. Mu mpera z’umwaka ushize u Rwanda rwakiriye itsinda ry’abashoramari baturutse muri icyo gihugu barambagiza amahirwe ahari.

Guhera mu 2012, Sosiyete y’indege Qatar Airways yatangiye ingendo zayo za buri munsi zihuza Doha na Kigali.

Kuri uyu wa Mbere ubwo Qatar yasinyaga amasezerano n'u Rwanda
Ubwo Qatar yari imaze gusinya amasezerano y'imigabane ingana na 60% mu mushinga w'ikibuga cy'indege cya Bugesera

Ingengo y’imari

Byari biteganyijwe ko kubaka ikibuga cy’indege cya Bugesera bizatwara miliyoni 820$.

Bitewe n’uko kizaba ari ikibuga kigezweho kandi cyiri mu cyiciro cya mbere ku Isi, ingengo y’imari yo kucyubaka yarazamutse, aho biteganyijwe ko ari miliyari 1.3$.

Minisitiri Gatete avuga ko iki kibuga kizaba cyujuje ibipimo mpuzamahanga by’ibibuga byo ku rwego rwa mbere kandi cyubatse mu buryo burambye.

Ingengo y'imari yavuye kuri miliyoni 820$ igera kuri miliyari 1.3$

Kugura imigabane ya Mota-Engil

Anasezerano ya Mota-Engil n’u Rwanda yavugaga ko Mota-Engil ifite imigabane 75% naho Guverinoma y’u Rwanda, ihagarariwe na ATL ikagira 25%.

Minisitiri Gatete asobanura ko ‘u Rwanda rwaguze imigabane 75% ya Mota-Engil muri uyu mushinga kugira ngo rugire 100%, hanyuma rushaka undi [Qatar], rumugurisha 60%’.

Ati “Twashakaga ikibuga kinini ni nayo mpamvu twashatse umufatanyabikorwa ukomeye”.

Mota-Engil yagurishije imigabane yayo 75% u Rwanda rugira 100% rugurishaho Qatar ingana na 60%

Imicungire y’ikibuga

Mu masezerano ya Mota-Engil, byari biteganyijwe ko izacunga iki kibuga mu myaka 25 ariko yasaba kongezwa bikigwaho ikaba yakongerwa indi myaka 15.

Minisitiri Gatete yavuze ko mu masezerano y’u Rwanda na Qatar, biteganyijwe ko impande zombi zizafatanya mu micungire y’iki kibuga nk’uko n’ubundi zizafatanya umushinga.

Igihe cyo kubaka

Byari biteganyijwe ko iki kibuga kizaba cyarangiye ndetse kiri ku rwego rwo gukoreshwa muri Mata 2020, ku buryo intego yari uko kizakoreshwa n’abashyitsi bazitabira inama y’ibihugu bikoresha ururimi rw’Icyongereza (Commonwealth) izaba muri Kamena umwaka utaha.

Gusa iyi ntego ntabwo ikiriho kuko biteganyijwe ko icyiciro cya mbere kizaba cyarangiye ndetse gikoreshwa mu 2022.

Minisitiri Gatete avuga ko abashyitsi bazitabira CHOGM batazakoresha iki kibuga kuko igikenewe ari ukubaka ibintu biramba atari ibikoreshwa igihe gito.

Ntabwo haramenyekana neza igihe icyiciro cya mbere kizarangirira kuko hakiri ibiganiro ariko kizatwara imyaka itanu uhereye igihe kizatangirira kubakwa.

Umwaka wa 2022 uzasiga ikibuga cy'indege cyakira abantu miliyoni zirindwi

Iterambere rya RwandAir

Ikibuga cy’indege kizafasha mu kwaguka kwa Sosiyete y’u Rwanda ya RwandAir, aho kuri ubu ifite ibyerekezo 28 ariko iteganya gufungura ibindi bine ari byo; Mozambique, Angola, Ethiopie na Leta zunze Ubumwe za Amerika.

Minisitiri Gatete avuga ko hari gahunda yo kongera indege za RwandAir, cyane cyane inini byiyongera ku masezerano yo gufungurirana ikirere u Rwanda rusinya. Ibi byose bizatuma indege nyinshi zikoresha iki kibuga.

Kugeza ubu u Rwanda rumaze gusinyana n’ibindi bihugu amasezerano arenga 110 yo gufungurirana ikirere.

RwandAir ikomeje kwagura indege zayo ndetse hari na gahunda yo kugura indege nini

Inyungu

Iki kibuga cy’indege nikirangira kizatanga akazi kenshi ku banyarwanda, kizateza imbere ibikorerwa mu Rwanda binyuze mu bucuruzi buhakorerwa, ibyoherezwa mu mahanga.

Minisitiri Gatete ati “Turakibona nk’isoko rinini ry’ibikorerwa mu Rwanda. Kizateza imbere ubukerarugendo mu gihugu, uko ufite ikibuga kinini, haza indege nini n’abakerarugendo bakazana amadevize, birafasha mu bucuruzi bikoroshya kujyana ibicuruzwa mu mahanga”.

Mu kubaka naho kandi bakoresha ibikorerwa mu Rwanda cyane kandi bagakoresha abanyarwanda benshi.

Ubwo IGIHE yasuraga imirimo yo kubaka iki kibuga, hari abakozi 950 barimo abanyarwanda 870 bafite akazi mu mirimo itandukanye.

Umukozi wo ku rwego rwo hasi ahembwa hagati ya 80 000 na 100 000 Frw, havuyemo amafaranga yo kurya ndetse n’ay’urugendo kuko hari imodoka zitwara abakozi.

Umubare w'abagenzi kizajya cyakira ku mwaka wariyongereye, nicyuzura kizaba gifite ubushobozi bwo kwakira miliyoni 14 z'abagenzi
Kizaba ari ikibuga kiri ku rwego mpuzamahanga rwa mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza