00:00:00 IGIHE NETWORK KN KINYARWANDA EN ENGLISH FR FRANCAIS

Senateri Ntawukuriryayo yahishuye uko E.Sc. Byimana yatumye aba uwo ariwe

Yanditswe na Uwiduhaye Theos
Kuya 1 Mata 2019 saa 04:23
Yasuwe :

Senateri Ntawukuriryayo Jean-Damascène uri mu bize muri ‘Ecole des Sciences de Byimana’ akahasoreza amasomo ye mu 1980, yagaragaje ko ubumenyi n’imyitwarire yahakuye ari ko kabando katumye agera ku rwego ariho uyu munsi, n’ubwo hari ahandi acyifuza kugera.

Yabivugiye mu birori byabareye i Kigali kuri iki Cyumweru byahuje abize muri E.Sc. Byimana, abahiga n’abarezi baho. Yashimangiye ko akenshi igituma yirata ko yize muri iri shuri ari ukubera uburere n’ubumenyi yahakuye.

Yagize ati “Njye wagize amahirwe yo kwiga mu Byimana nkaniga i Ruhande muri kaminuza y’u Rwanda, nkiga no mu Bubiligi muri Kaminuza ya Ghent nkakurayo impamyabumenyi y’ikirenga, njye nibwira ko nitutagira gutsinda ku kigero cyo hejuru, gutera imbere bizaturushya[…] Njye ishuri ryo mu Byimana ndivuga kuko hari aho nageze nsanga igituma ngenda ari uburere n’ubumenyi narikuyemo.”

Yasabye Frère Karerangabo Crescent uyobora iri shuri rya Byimana gukomeza gutoza abanyeshuri kwiga cyane kandi bagatsinda ku kigero cyo hejuru kuko ari ikintu cy’ingenzi.

Abitabiriye iki gikorwa bamurikiwe filime mbarankuru yakozwe kuri iki kigo, urubuga rwa interinet rwacyo n’ikinyamakuru kizajya cyandika amakuru avuga kuri iki kigo.

Kagame Geoffrey uhagarariye umuryango w’abanyeshuri bize muri iri shuri yavuze ko ari intambwe ikomeye bakomeje gutera nyuma yo kumurika ibi bikorwa bitatu icyarimwe, yemeza ko bigoye ku ishuri ryisumbuye kubikora kuko na kaminuza zabashije kubigeraho ari mbarwa.

Frère Karerangabo uyobora ishuri yavuze ko bakomeje kwesa imihigo ndetse umwaka ushize batsindishije neza cyane ari nabyo byabahaye kuza mu bigo bya mbere ku rwego rw’igihugu haba mucyiro rusange no mu cyiro gisoza amashuri yisumbuye mu mashami anyuranye.

Ati “Ni ya ntego yacu; umutimanama, ubumenyi no guhora ku isonga.”

Ishuri ryo mu Byimana ryashinzwe mu 1952, ni kimwe mu bigo bikomeye byizemo abayobozi batandukanye mu nzego za leta, abaganga n’abandi bakora imirimo inyuranye.

Ni rimwe mu mashuri aza imbere mu gutsindisha abanyeshuri benshi kandi bikagararira mu ntiti zitandukanye zarinyuzemo, ubu zikaba zifite uruhare rukomeye mu iterambere ry’Igihugu.

Muri iki gikorwa cyahuje abantu batandukanye bize muri iki kigo, hanatanzwe ikiganiro cyari kiyobowe na Uwihoreye Chaste waharangirije mu 1997, kigamije kureberahamwe uko habaho ubufatanye burambye hagati y’ikigo n’abakirerewemo.

Umuryango w’abanyeshuri bize muri Ecole des Sciences Byimana [E Sc Byimana Alumni Association] niwo wateguye iki gikorwa cyo guhuza abize muri iri shuri ku bufatanye n’ubuyobozi bw’ikigo.

Abanyeshuri ba Ecole des Sciences de Byimana bitabiriye iki gikorwa
Banamurikiwe ikinyamakuru ku bikorwa bitandukanye by'iri shuri
Frère Karerangabo yavuze ko Ecole des Sciences de Byimana yiyemeje guhora ku isonga
Habayeho ikiganiro ku cyakomeza guteza imbere iri shuri n'abaryizemo
Kagame Geoffrey uyobora Umuryango w’abanyeshuri bize muri Ecole des Sciences Byimana [Byimana Alumni Association]
Umunyamabanga Uhoraho muri Minisiteri y'Ibikorwa remezo, Patricie M. Uwase, nawe yize muri E.Sc. Byimana ndetse ari mu batanze ikiganiro
Iki gikorwa cyitabiriwe n'abantu benshi kuri iki Cyumweru
Senateri Jean-Damascène Ntawukuriryayo uri mu bize muri E. Sc. Byimana yavuze ko aterwa ishema no kuvuga aho yize kubera ubumenyi n'uburere yahakuye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .