Sobanukirwa inshingano z’Umugenzuzi Mukuru wa RDF, umwe mu myanya ikomeye mu Gisirikare cy’u Rwanda

Yanditswe na Philbert Girinema
Kuya 12 Ugushyingo 2019 saa 02:58
Yasuwe :
0 0

Umugenzuzi Mukuru wa RDF ni umwe mu myanya ishyirwaho abayobozi bakuru mu ngabo baba bafite inshingano zikomeye kandi z’ingenzi mu gisirikare.

Uyu mwanya uherutse gushyirwaho Lieutenant General Jacques Musemakweli wari usanzwe ari Umugaba Mukuru w’Inkeragutabara.

Perezida wa Repubulika akaba n’Umugaba w’Ikirenga w’Ingabo z’u Rwanda ni we ugena uyobora Ubugenzuzi Bukuru bw’Ingabo z’u Rwanda, aho uwuhawe aba afite manda y’imyaka itanu kimwe n’Umugaba Mukuru w’Ingabo, Abagaba b’Ingabo, Abagaba b’Ingabo bungirije ariko ishobora kongerwa inshuro imwe.

Aba bayobozi bose bava ku myanya yabo kubera impamvu zirimo kuba byemejwe n’Umugaba w’Ikirenga wa RDF cyangwa manda yabo irangiye.

Umugenzuzi Mukuru ni umwe mu myanya itandatu igize Ubuyobozi Bukuru bw’Ingabo z’u Rwanda inyuma y’Umugaba w’Ikirenga w’Ingabo z’u Rwanda; Minisitiri w’Ingabo; Umugaba Mukuru w’Ingabo z’u Rwanda; Abagaba b’Ingabo n’Abagaba b’Ingabo Bungirije.

Ibiro Bikuru by’Igenzura mu Ngabo z’u Rwanda bishinzwe gukora igenzura risesuye rirebana n’iby’abakozi, imyigishirize, ibikoresho n’imari mu Ngabo z’u Rwanda, hamwe n’izindi nshingano byahabwa.

By’umwihariko iteka rya Perezida N° 23/01 ryo ku wa 21/10/2016 rihindura kandi ryuzuza Iteka rya Perezida n°33/01 ryo ku wa 03/09/2012 rigena imiterere n’inshingano zihariye bya buri cyiciro mu bigize Ingabo z’u Rwanda.

Rigaragaza ko Umugenzuzi Mukuru wa RDF ashinzwe kugenzura no gukurikirana ibirebana n’imicungire y’Ingabo, amahugurwa, ibikorwa bya gisirikare, ibikoresho n’imicungire y’umutungo by’Ingabo z’u Rwanda.

Ni we kandi ushinzwe kugira inama Ubuyobozi Bukuru bw’Ingabo z’u Rwanda hagaragazwa politiki zihamye n’amabwiriza aboneye bigamije guteza imbere imicungire inoze y’umutungo n’ibikorwa by’Ingabo z’u Rwanda.

Ashinzwe gukurikirana no gutangira iperereza ku ihohoterwa rikorewe umusirikare cyangwa rikozwe na we. Aba agomba guharanira ko Ubuyobozi Bukuru bw’Ingabo z’u Rwanda bubona amakuru ahagije ku bibazo n’imikorere idahwitse irebana na gahunda zihariye n’ibikorwa bya gisirikare muri rusange hanatangwa n’ingamba z’ibyakorwa kugira ngo amakosa akosorwe.

Uyu ni umwanya utarakunze kugira abantu bawusimburanaho benshi, kuko kuva mu 2013 uwabaye Umugenzuzi Mukuru wa RDF, ni Rtd Gen Jack Nziza.

Lt Gen Musemakweli uri kuri uyu mwanya, yabaye kandi Umugaba Mukuru w’Ingabo zirwanira ku Butaka, umwanya yashyizweho avuye ku buyobozi bw’Ingabo zishinzwe kurinda Umukuru w’Igihugu mu 2016.

Lt Gen Jacques Musemakweli niwe Mugenzuzi Mukuru wa RDF muri iki gihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza