U Bufaransa n’u Rwanda byasinyanye amasezerano asigasira ururimi rw’Igifaransa

Yanditswe na

Noel Turikumwe

Kuya 25 Ugushyingo 2014 saa 01:32
Yasuwe :
0 0

Minisiteri y’Umuco na Siporo na Ambasade y’u Bufaransa mu Rwanda byashyize umukono ku masezerano yemeza ku mugaragaro gushyiraho ahasomerwa ibitabo by’Igifaransa mu Isomero Rikuru ry’Igihugu riherereye ku Kacyiru mu Mujyi wa Kigali.
Aya masezerano yashyizweho umukono na Minisitiri w’Umuco na Siporo Joseph Habineza na Ambasaderi w’u Bufaransa mu Rwanda Michel Flesch, anatangiza izindi gahunda ziteza imbere uru rurimi rw’Igifaransa n’umuco w’Abafaransa mu bikorwa by’Isomero ry’igihugu. Ni (...)

Minisiteri y’Umuco na Siporo na Ambasade y’u Bufaransa mu Rwanda byashyize umukono ku masezerano yemeza ku mugaragaro gushyiraho ahasomerwa ibitabo by’Igifaransa mu Isomero Rikuru ry’Igihugu riherereye ku Kacyiru mu Mujyi wa Kigali.

Aya masezerano yashyizweho umukono na Minisitiri w’Umuco na Siporo Joseph Habineza na Ambasaderi w’u Bufaransa mu Rwanda Michel Flesch, anatangiza izindi gahunda ziteza imbere uru rurimi rw’Igifaransa n’umuco w’Abafaransa mu bikorwa by’Isomero ry’igihugu.

Siporo Joseph Habineza na Ambasaderi w’u Bufaransa mu Rwanda Michel Flesch basinya amasezerano

Ni amasezerano atangiza ku mugaragaro ahasomerwa ibitabo by’Igifaransa, ubundi hari haratangijwe mu Isomero ry’Igihugu muri Mutarama 2013, ngo hashyirwe inyandiko z’umuco n’izindi z’ubumenyi butandukanye mu rurimi rw’Igifaransa.

Minisitiri Amb.Habineza aganira n’abanyamakuru yavuze ko aya masezerano aje kongera gukomeza ibijyanye n’ubumenyi bw’Igifaransa, rumwe mu ndimi eshatu zivugwa mu Rwanda, kandi igihugu cyifuza ko rutera imbere mu Banyarwanda.

Yagize ati “Igifaransa nk’uko mubizi ruri mu ndimi eshatu zikoreshwa hano mu gihugu, arizo Ikinyarwanda, Icyongereza n’Igifaransa, nkaba numva rero niba turwemera nk’ ururimi rugomba gukoreshwa, tugomba kuruvuga neza, kandi turatembera iyo umuntu ageze aho bavuga Igifaransa ukivuga biguha amahirwe kurusha uko wakumvikana nabo bagusemurira.”

Uru rurimi rw’Igifaransa u Bufaransa bushaka kugeza mu bakiri bato rubinyujije mu isomer rugenda rucika intege mu Rwanda. Rwahoze rukoreshwa mu burezi bw’u Rwanda, ariko ruza gusimburwa n’Icyongereza.

Uretse mu Mashuri, uru rurimi rw’Igifaaransa no ku noti z’amafaranga y’u Rwanda ruri kugenda rukurwaho.

Ambasaderi w’u Bufaransa mu Rwanda, Michel Fresh, we ntiyemeranya n’abavuga ko Igifaransa kitakiri mu ndimi z’u Rwanda. Avuga ko abagereranya imikoreshereze yacyo mu gihugu n’izindi ndimi zihakoreshwa baba bashaka kwinjira mu makimbirane adafite inyungu.

Amb.Flesch avuga ko atari itegeko kumenya Igifaransa ariko ko kukimenya ari andi mahirwe mu gukorana n’ibice byinshi by’Isi.

Amb. Flesch yagize ati“Njyewe sinemeranya n’ibyo biganiro bigereranya Igifaransa n’izindi ndimi, icyo nzi ni uko Igifaransa kikigaragara mu ndimi mpuzamahanga zikomeye. Icyo nabwira Abanyarwanda ni uko uko bavuga indimi nyinshi, Igifaransa, Icyongereza n’izindi bifuza kumenya, barushaho gufungukira Isi, imikoranire ikaba myiza kurusho.”

Aya masezerano yashyizweho umukono, anatangiza indi mishinga iteza imbere umuco w’Igifaransa binyuze mu gusoma ubuvanganzo no guteza imbere ubundi bumenyi rusange buhishe mu nyandiko z’Igifaransa.

Uyu mwanya wahawe Igifaransa mu Isomere ry’Igihugu, urimo inyandiko z’Igifaransa kandi ngo hazashyirwa n’ibindi bikoresho bishobora gufasha urubyiruko rw’u Rwanda kumenya amakuru ku bashaka gukomereza amashuri makuru na kaminuza mu Bufaransa.

Ikindi aya masezerano azashyira mu bikorwa ni ugufasha Abanyarwanda kwiyungura no kongera ubumenyi mu rurimi rw’Igifaransa bafashijwe n’Ikigo cy’Abafaransa mu Rwanda (IFR).

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .