U Rwanda rugiye guhagarika gutumiza mu mahanga imbuto y’ibigori

Yanditswe na Nkurunziza Ferdinand
Kuya 15 Ukuboza 2019 saa 05:49
Yasuwe :
0 0

Minisiteri y’ubuhinzi n’ubworozi (MINAGRI) yatangaje ko nta mbuto y’ibigori izongera gutumizwa mu mahanga guhera mu mwaka utaha wa 2020.

Iki cyemezo kije nyuma y’uko mu Rwanda hashyizweho uburyo bwo gutunganya imbuto z’ibihingwa bitandukanye, byitezwe ko buzaganya ku rugero runini ingano ya zimwe muri zo zatumizwaga mu mahanga.

Ibi byatangajwe ku mugoroba wo kuri uyu wa Gatanu, mu munsi mukuru wo gusoza umwaka wateguwe n’umushinga uterwa inkunga n’ikigega cy’abanyamerika cy’iterambere (USAID), ‘Feed the Future HingaWeze project’.

Umunyabanga uhoraho muri minisiteri y’ubuhinzi n’ubworozi, Jean-Claude Musabyimana, yavuze ko mu Rwanda hari uburyo bwo kwikorera imbuto z’ibihigwa, bwibanda ku mbuto z’amoko umunani, zirimo ibigori, ingano, soya, ibishyimbo, ibirayi, n’ibijumba.

Yongeye ko leta yatangaga akayabo kabarirwa hafi muri miliyari enye buri mwaka, mu gutumiza imbuto z’ibigori, ingano na soya; imbuto z’ibigori zo zikaba zanganaga na toni 3 000.

Yagize ati “twahoraga dutumiza, niyo mpamvu twaniyubakiye ubushobozi, ngo abantu bacu bajye bategurira izo mbuto hano. Ubu turi gushishikariza abahinzi gutera iyo mbuto y’ibigori.”

Musabyimana yongeyeho ko usibye gukuraho ikiguzi cyo kuzitumiza mu mahanga, gutunganyiriza imbuto mu Rwanda bizakemura ikibazo cyo kuzisaranganya cyagaragajwe n’abahinzi.

Ubushakashatsi bwakozwe n’ikigo ‘Alliance for a Green Revolution in Africa’, bwashyizwe ahagaragara muri Kanama 2019, bugaragaza ko kubona imbuto y’ibigori ku buryo buhagije biri ku rugero rwa 73%, ibishyimbo ni kuri 69%, ingano ni 73% naho soya bikaba 78%.

Muri gahunda yo kongera ibihingwa, gukoresha imbuto ivuguruye byarazamutse biva kuri 3% bigera kuri 12.5% mu buhinzi bukorerwa ku butaka buto, mu gihe mu buhinzi bukorerwa ku butaka bunini byageze kuri 53.1%.

Musabyimana yavuze ko imbaraga zashyizwe mu gutunganya imbuto ihingwa ku butaka buri ku butumburuke buto n’uburinganiye; ubu hatahiwe gukora imbuto izahigwa ku butaka buri ku butumburuke bwo hejuru.

Yagize ati “Ndatekereza ko mu bihembwe by’ihinga bibiri biri imbere, tuzaba tutagitumiza mu mahanga imbuto y’ibigori; gusa ibi ntibisobanuye ko umuhinzi runaka atatumiza mu mahanga imbuto mu gihe yaba abyifuza.”

Yongeyeho ko misiteri y’ubuhinzi n’ubworozi iri kuvugurura inzego zirebwa no gutegura no gusaranganya imbuto, bakorana n’inzego z’abikorera n’indi miryango, ngo hanozwe uruhare n’inshingano bya buri wese.

Yagize ati “Uru rwego rugomba kugira abashinzwe ubushakashatsi, kugirango tugire imbuto z’ibanze kandi zijyanye n’ikirere cyacu. Ikigo cy’igihugu gishinzwe ubuhinzi (RAB) kiri mu barebwa n’ibi, ariko cyo kizibanda gusa ku bushakashatsi n’igenzura, ibindi bisigaye bikorwe n’abikorera.”

Umuyobozi w’umushinga ‘USAID-HingaWeze’, Daniel Gies, yavuze ko uyu mushinga w’imyaka itanu ugamije gufasha abahizi bato bagera ku 530 000 kongera umusaruro w’ibyo bakura mu buhinzi, guteza imbere imirire iboneye ku bagore n’abana, no guteza imbere ubuhinzi n’ibiribwa bikajyana n’ihindagurika ry’ibihe.

Yagize ati “Kugeza ubu, uyu mushiga wongereye umusaruro uva mu buhinzi ku rugero rwa 50% ku bahinzi bato 26 488, hegitari 818.9 zicibwaho amaterasi y’indinganire, ndetse na hegitari 50 z’ibishanga zitunganywa neza.”

Raporo igaragaza iterambere ry’uyu mushinga, igaragaza ko abagenerwabikorwa bawo 238 480 bashyize mu bikorwa uburyo bugezweho ndetse n’ikoranabuhanga, aho hegitari 60 113 ziri gukorerwaho ibikorwa by’ubuhinzi mu buryo bugezweho, ndetse 1 102 689 y’amadorari ya Amerika yashowe mu bikorwa bijyanye n’ubuhinzi.

Iyi raporo kandi igaragaza ko abagenerwabikorwa 36 718 bari mu matsinda yo kwizigama, imiryango 8 775 ikaba yarongereye ubushobozi bwo kwigurira ibiribwa birimo intungamubiri ku bagore n’abana, mu gihe abana 22 271 bari munsi y’imyaka ibiri bafashijwe kubona indyo irimo intungamubiri muri rusange.

Ibigori ni kimwe mu bihingwa bikoreshwa na benshi mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza