U Rwanda rwahaye icyemezo cy’ubuhunzi impunzi z’Abarundi zisaga ibihumbi 11

Yanditswe na

Cyprien Niyomwungeri

Kuya 24 Mata 2015 saa 02:40
Yasuwe :
0 0

Guverinoma y’u Rwanda yamaze guha icyemezo cy’ubuhunzi (refugee status) impunzi z’Abarundi zisaga ibihumbi 11 zimaze kuhahungira kuva mu mpera za Werurwe.

Mu kiganiro n’abanyamakuru, Minisiteri ishinzwe Imicungire y’ibiza n’Impunzi (MIDIMAR), kuri uyu wa Gatanu tariki 24 Mata, yatangaje ko izi mpunzi zahawe icyemezo cy’ubuhunzi gihabwa impunzi zaje mu kivunge cyitwa ‘’PRIMA FACIE’’.

Seraphine Mukantabana, Minisitiri ushinzwe imicungire y’ibiza n’impunzi, yavuze ko u Rwanda rwafashe iki cyemezo rushingiye ku mubare w’impunzi z’Abarundi zikomeje guhungira mu Rwanda ku bwinshi, aho ku munsi bakira nibura impunzi 800.

Yagize ati’’Iki cyemezo cyo guha status impunzi z’Abarundi giteganywa n’ingingo ya 13 y’amategeko arebana n’ubuhunzi yasinywe mu 1951, aho abantu bahunga mu kivunge bahabwa iki cyemezo utabajije buri umwe impamvu yamuteye guhunga.’’
Iki cyemezo cyemerera impunzi guhabwa uburenganzira bwose nk’impunzi, burimo kuvuzwa, kugaburirwa, kwiga no kumurinda icyahungabanya ubuzima bwe cyose kandi ntiwemererwe kumwirukana.

Mukantabana yasobanuye ko Abarundi nibakomeza guhunga ruzakira gusa ibihumbi 50, ariko ku bufatanye n’imiryango mpuzamahanga rwiteguye gukomeza gukora ibishoboka mu gufasha abahunga bose.

Yavuze ko batemeranya n’ibivugwa n’u Burundi ko hari uburyo u Rwanda rwaba rukururisha Abarundi guhunga babashuka mu buryo bw’imibereho, kuko iwabo nta kibazo gihari.

Yagize ati’’Nta nyungu u Rwanda rufite mu guhunga kw’Abarundi, urebye imibereho bafite mu nkambi, ndibwira ko nta wakwifuza kuyibamo ntacyo ahunze, icyakora tubakuruza umutekano kuko niwo bahunga bashaka kuko iwabo bawubuze.’’

Impunzi z’Abarundi zivuga ko zihunze umutekano muke n’urugomo bakorerwa n’urubyiruko rw’imbonerakure rushyigikiwe n’ishyaka riri ku butegetsi rya CNDD-FDD. Abayoboke b’iri shyaka bifuza ko Perezida Nkurunziza yakwiyamamariza manda ya gatatu nubwo itegeko nshinga ritabimwemerera.

Kugeza ubu impunzi z’Abarundi zimaze kugera mu Rwanda ni 11095. Bacumbikiwe mu nkambi iri mu karere ka Bugesera, Nyanza, Nyagatare na Kirehe. Biteganyijwe ko bose bazubakirwa inkambi mu karere ka Kirehe ahazwi nka Mahama.iyi nkambi izaba ifite ubunini bwa Hegitari 50.

Reba ibyo ubuhamya bw’Abarundi basobanura impamvu bahunga


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .