U Rwanda rwakiriye icyiciro cya kane cy’impunzi 79 zavuye muri Libya (Amafoto)

Yanditswe na Ishimwe Israel
Kuya 19 Ugushyingo 2020 saa 11:18
Yasuwe :
0 0

Guverinoma y’u Rwanda ku mugoroba wo kuri uyu wa Kane, yakiriye icyiciro cya kane cy’impunzi n’abandi bashaka ubuhungiro 79 baturutse muri Libya aho bari bamaze igihe.

Icyiciro cya kane cy’impunzi zaturutse muri Libya, cyageze mu Rwanda gisanga abandi bahageze mbere barimo 66 bo mu cyiciro cya mbere, 123 bo mu cya kabiri na 117 bo mu cya gatatu.

Minisiteri y’Ibikorwa by’Ubutabazi yatangaje ko izi mpunzi zibanza gupimwa COVID-19 mbere yo kujyanwa gucumbikirwa mu Nkambi ya Gashora, ahashyizwe bagenzi babo bageze mu Rwanda mu byiciro byabanje.

Ibinyujije ku rukuta rwa Twitter, yagize iti “Nyuma yo kwakirwa, barajyanwa kuri hoteli zakirirwamo abasuzumwa ibizamini bya COVID19. Nyuma yo kubona ibisubizo, bazaherekezwa mu Nkambi y’Agateganyo ya Gashora iherereye mu Karere ka Bugesera aho bazacumbikirwa.’’

Impunzi zageze mu Rwanda, zakandagiye ku butaka bwarwo zitwawe n’indege yo muri Libya. Mu rugendo rwazo hubahirijwe amabwiriza yo kwirinda Coronavirus arimo kwambara neza udupfukamunwa ndetse no guhana intera hagati y’abantu.

I Kigali zakiriwe n’abakozi muri Minisiteri y’Ibikorwa by’Ubutabazi n’abo mu Ishami ry’Umuryango w’Abibumbye rishinzwe Impunzi (UNHCR).

Igikorwa cyo kwakira izi mpunzi kiri mu rwego rwo kubahiriza amasezerano u Rwanda rwasinyanye n’Ishami ry’Umuryango w’Abibumbye ryita ku Mpunzi ndetse n’Umuryango wa Afurika Yunze Ubumwe.

U Rwanda rwaherukaga kwakira icyiciro cya gatatu cy’impunzi zaturutse muri Libya mu Ugushyingo 2019, ni icyiciro cyari kigizwe n’abantu 117 bageze mu Rwanda basanga abari baraje mu cyiciro cya mbere 66 na 123 bo mu cya kabiri.

Kugeza ubu nk’uko byatangajwe na UNHCR, impunzi zirenga 80 mu zo u Rwanda rwari rwakiriye zivuye muri Libya zamaze koherezwa mu bihugu bitandukanye by’amahanga byemeye kuzakira birimo Danemark, Norvège na Canada ndetse hateganyijwe ko hari n’abandi bashobora kujyanwa mbere y’uko uyu mwaka urangira.

Ku wa 10 Nzeri 2019 nibwo Guverinoma y’u Rwanda, Umuryango wa Afurika Yunze Ubumwe (AU) na UNHCR, bashyize umukono ku masezerano y’ubufatanye, azatuma iki gihugu cyakira impunzi zizaturuka muri Libya, aho zageze zishakisha inzira yazambutsa izijyana muri Méditerranée zikagera i Burayi.

Aya masezerano azatuma u Rwanda rwakira impunzi zigera kuri 500 yasinyiwe i Addis Ababa ku cyicaro cya AU, nyuma y’ubushake Perezida Kagame yagaragaje bw’uko u Rwanda rwakwakira izi mpunzi z’Abanyafurika.

Izi mpunzi zageze muri Libya zishakisha uko zakwerekeza ku Mugabane w’u Burayi aho zizeraga kubaho neza, kwambuka inyanja ya Méditerranée byaranze ziguma muri Libya ndetse zitangira kugirirwa nabi kugeza ubwo u Rwanda rwamenye ubuzima zibayemo rukiyemeza kuzitabara.

Izi mpunzi zageze i Kigali zitwawe mu ndege yazihagurukanye muri Libya
Mu mpunzi zageze i Kigali harimo abana bato ndetse n'urubyiruko
Icyiciro cya kane cy'impunzi n'abasaba ubuhunzi 79 bavuye muri Libya bageze mu Rwanda
Ingamba zo kwirinda Coronavirus zirimo kwambara agapfukamunwa zubahirijwe
U Rwanda rwakiriye icyiciro cya kane cy’impunzi 79 zavuye muri Libya
Biteganyijwe ko izi mpunzi zibanza gupimwa COVID 19 mbere yo kujyanwa mu Nkambi y'agateganyo ya Gashora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .