Uko ibihano byatanzwe mu Mujyi wa Kigali ku batubahirije ingamba zo kurwanya COVID-19

Yanditswe na Habimana James
Kuya 24 Werurwe 2020 saa 08:48
Yasuwe :
0 0

Mu gihe kuri uyu wa Kabiri hakajijwe ingamba zigamije kugenzura abatubahiriza amabwiriza ya Minisitiri w’Intebe yo guhangana n’icyorezo cya COVID-19, mu turere dutandukanye tw’Umujyi wa Kigali habaye ibikorwa byo guta muri yombi abayarenzeho.

Muri Kicukiro, Umuyobozi Nshingwabikorwa w’Akarere, Umutesi Solange, yabwiye IGIHE ko ubuyobozi bwagiye bwigisha abaturage uko bakwiye kwitwara muri ibi bihe, harimo kwirinda guhurira hamwe hagamijwe gukomeza kurwanya iki cyorezo.

Yavuze ko hari bamwe bimye amatwi amabwiriza yashyizweho, byatumye hafatwa ingamba zirimo no gucibwa ibihano.

Yavuze ko uyu munsi abantu 11 batawe muri yombi kubera kwigomeka ku mabwiriza ya leta, ndetse abandi bacibwa amande.

Yagize ati “Abantu 11 batawe muri yombi kubera kwigomeka ku mabwiriza ya leta, abandi bacibwa amafaranga agera kuri miliyoni imwe n’ibihumbi mirongo irindwi. Mu by’ukuri icyo dushyize imbere si uguhana kuko abayobozi barimo gusobanurira abaturage icyo bakwiye gukora, ariko hari aho ubona ko biba ari ngombwa ko bahanwa kandi gahunda irakomeje.”

Yavuze ko abica amategeko bagaragara cyane mu byaha birimo gucuruza inzoga, gutwara abagenzi ku magare n’ibindi.

Muri Gasabo, ubuyobozi bw’aka karere bwabwiye IGIHE ko kuva tariki 23-24 uku kwezi, mu mirenge ikagize, abayobozi b’inzego z’ibanze n’iz’umutekano, batangiye igikorwa cyo kugenzura uko abaturage bashyira mu bikorwa amabwiriza ya Minisitiri w’Intebe.

Buvuga ko “Mu Murenge wa Nduba bafashe abagabo babiri bacuruzaga mu tubari kandi bitemewe, aba bakaba bashyikirizwe Polisi Sitasiyo ya Nduba.”

Mu Murenge wa Kinyinya, abafashwe barimo umucuruzi w’imyaka 31, wacuruzaga inzoga zitujuje ubuziranenge (urwagwa). Izi nzoga zamenewe mu ruhame naho nyirazo afungirwa kuri Sitasiyo ya Polisi ya Kinyinya mu gihe ategereje gufatirwa indi myanzuro.

Hanafashwe kandi abagore babiri n’umugabo umwe bacuruzaga bifungiranye mu kabari.

Muri aka karere hafatiwe imashini z’imikino y’amahirwe eshatu zihita zijyanwa kuri Sitasiyo ya Polisi ya Kinyinya.

Mu Murenge wa Gikomero, ho hatahuwe akabari karimo umucuruzi w’imyaka 39, wari wahaye inzoga umukiliya w’imyaka 41 ngo wari wasinze, gusa abandi bahanyweraga birukanse. Uwacuruzaga n’uwanywaga bashyikirizwe Sitasiyo ya Polisi ya Gikomero.

Umuyobozi Nshingwabikorwa w’Akarere ka Nyarugenge, Ngabonziza Emmy, we yabwiye IGIHE ko aka karere gafite urubyiruko rwinshi, ibi birimo gusaba ingufu nyinshi kugira ngo barwumvishe ko rukwiye kubahiriza gahunda zashyizweho.

Yavuze ko kuva izi ngamba zashyirwaho, wasangaga abaturage batazumva ku buryo bamwe bashakaga gukomeza ubucuruzi. Kugeza ubu hamaze gufatwa 83 barenze ku mabwiriza yatanzwe.

Ngabonziza yavuze ko ubwo hatangazwaga ingamba zikomeye zo kubuza abantu kujya mu ntara ngo iki cyorezo kidakomeza gukwirakwira, hari urubyiruko rwatangiye gusaba ubuyobozi ko rwakwemerwa kuva mu Mujyi wa Kigali.

Yagize ati “Aka ni agace usanga gafite urubyiruko rwinshi harimo abafundi, abayede n’abandi, abo bose rero imirimo yabo yarahagaze, bigitangira bashakaga gusubira mu ntara. Twafashe umwanzuro wo kubapima, 13 baje gushyirwa ahantu kugira ngo bakurikiranwe.”

Polisi y’u Rwanda yaburiye abaturage ko abatubahiriza amabwiriza yashyizweho agamije kurwanya ikwirakwira rya COVID-19, bashobora kwisanga bahawe ibihano bishobora no kugeza ku gufungwa.

Umujyi wa Kigali wafashe ingamba zikomeye zo gukurikirana no guhana abatubahiriza amabwiriza yashyizweho mu kwirinda icyorezo cya COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza