Uko Nishimwe yazinutswe gusengera muri EPR kandi Se wishwe muri Jenoside yarahoze ari Pasiteri

Yanditswe na Akayezu Jean de Dieu
Kuya 30 Mata 2019 saa 07:26
Yasuwe :
0 0

Jenoside yakorewe Abatutsi mu 1994 igahitana ubuzima bw’abasaga miliyoni mu minsi 100, yateguwe ishyirwa mu bikorwa n’ubutegetsi bwariho bwatewe ingabo mu bitugu n’abarimo Abihayimana.

Mu myaka 25 ishize aya mahano abaye mu gihugu, abarokotse Jenoside baracyafite ibikomere birimo iby’umubiri n’ibyo ku mutima ku buryo hari bamwe bazinutswe gusubira mu nsengero abavandimwe babo basengeragamo ku mpamvu z’abari abakirisitu bagenzi babo n’abayobozi b’amadini bijanditse mu bwicanyi.

Byakorohera kubyumva wumvise ubuhamya bwa Nishimwe Claudia wavutse umubyeyi we ari umupasiteri mu Itorero Église Presbyteriénne au Rwanda [EPR], i Gisenyi aho bari batuye.

Mu kiganiro na IGIHE, Nishimwe yatubwiye uko yazinutswe gusengera muri iri torero nyuma y’uko umubyeyi we yishwe n’Abapasiteri bagenzi mu rusengero.

Mu nsengero nyinshi abatutsi bajyaga gushakamo ubuhungiro gusa hari aho bageraga abapasiteri n’abapadiri bakabasubiza inyuma cyangwa bakabahamagariza ibitero by’interahamwe n’ingabo zari iza leta ya Habyarimana zikaza kubica.

Nishimwe asobanura ko mu gihe cya Jenoside, umubyeyi we n’abandi bapasiteri bagenzi be bahungishirijwe i Remera Rukoma ari amayeri yo kugira ngo babashyire hamwe nibarangiza babice.

Akomeza avuga ko “Mbere ya Jenoside, EPR yari ubuzima bwanjye kuko papa yari umupasiteri, ariko abapasiteri bagenzi be nibo babishe abakirisitu nibo babishe , ntabwo nakongera gusubira muri rwa rusengero nakuriyemo batwigisha gukundana, kwibabaza noneho ngo ba bantu bongere banyigishe ibyo bintu kandi batarashoboye kutubera urugero rwiza.”

Mu gihe cya Jenoside yari afite imyaka 12, ariko avuga ko ibyabaye ku mubyeyi we wari pasiteri abibona nk’ibyabaye ejo ndetse bimugora kubona abapasiteri b’iri torero bambaye amakanzu kuko ahita yibuka Se.

Ati “Kudashobora kujyayo bifite imvano, birangora cyane gusubirayo kuko iyo ngezeyo numva mbabaye cyane ngira agahinda gakomeye, iyo mbabonye hari ukuntu bagenda ku murongo bambaye amakanzu [Abapasiteri], cyera nababonagamo Papa.”

“Papa ntawe urimo kandi ababikoze bamwishe ni abo b’abapasiteri bagenzi be, rero birambabaza nkumva ni igikomere niyo mpamvu nanahinduye nkajya mu rindi dini akaba ariho nsengera ubu.”

Nishimwe avuga ko nk’abacitse ku icumu rya Jenoside bashengurwa n’uko iri torero rya EPR ritarasaba imbabazi z’ibyakozwe n’abakirisitu n’abapasiteri baryo.

Kugeza ubu amadini arimo Kiliziya Gotolika ndetse na ADEPR yamaze gusaba imbabazi ku ruhare abakirisitu n’abayobozi bayo bagize muri Jenoside yakorewe Abatutsi.

Nishimwe Claudia yazinutswe gusubira muri EPR kuko Papa we wari Pasiteri muri iri torero yishwe na bagenzi be b'abapasiteri
Nishimwe aherutse kwitabira umuhango w'imurikwa ry'igitabo 'Ingoma Ntizisa hasa Abiru' kiva imuzi uruhare rwa Leta n'Amadini muri Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza