Umuganga SACCO: Perezida Kagame yatanze umukoro wo gutekereza kuri Koperative y’abaganga

Yanditswe na Cyprien Niyomwungeri
Kuya 8 Ugushyingo 2019 saa 11:14
Yasuwe :
0 0

Perezida Kagame yatanze umukoro wo gutekereza kuri Koperative yo kubitsa no kugurizanya y’Abaganga ‘Umuganga SACCO’, ku buryo yabafasha mu bibazo bafite by’amacumbi, ingendo bakora bajya cyangwa bava mu kazi ndetse n’abifuza gukora imishinga bikaborohera.

Ni nyuma y’uko kuri uyu wa Kane Umukuru w’Igihugu agaragarijwe ibibazo bitandukanye abakora umwuga w’ubuvuzi bafite birimo imishahara n’uduhimbazamusyi duto, kutagira amacumbi n’imodoka bifashisha mu ngendo ndende bakora.

Uhagarariye Ishyirahamwe ry’Abaganga, Dr Ntirushwa David, yagize ati “Bishobotse ko hazamurwa agahimbazamusyi n’umushahara w’abaganga ndetse bakoroherezwa kubona uko bakora ingendo no kubona amacumbi byadufasha cyane.”

Mu gusubiza iki kibazo Perezida Kagame yifashishije urugero rw’uko Koperative Umwalimu Sacco, yavutse avuga ko byagenderwaho mu kureba ikindi cyakorwa kugira ngo n’abaganga bahindure imibereho nk’uko abarimu byagenze, aho kuri ubu bafata inguzanyo bakagura amagare, moto, bakubaka n’inzu.

Yavuze ko mu gutekereza Umwalimu Sacco harebwe ku kongera 10 000 Frw ku mushahara bagasanga bitari bugire ingaruka nziza ifatika ku mwalimu ngo ubone ko ubuzima bwe bwahindutse kandi mu ngengo y’imari wareba ugasanga bidashoboka.

Ati “Twaravuze ngo ushobora no gufata igice cyayo ni 5000FRW, kuri buri mwalimu ukayashyira hamwe akajya muri koperative. Icyo byari bivuze ni uko buri mwalimu ashobora kubona amafaranga ayakuye kuri yayandi yashyizemo”.

Koperative Umwalimu Sacco yashinzwe ku gitekerezo cya Perezida Paul Kagame, hagamijwe gufasha abarimu kwivana mu bukene no guteza imbere imibereho yabo muri rusange. Muri Nzeri 2018 yari ifite abanyamuryango ibihumbi 73.

Icyo gihe yabaruraga miliyari zigera muri 200 Frw y’inguzanyo zahawe abarimu, mu gihe amafaranga y’ubwizigame ari muri miliyari zigera kuri 23 z’amafaranga y’u Rwanda, na ho inguzanyo ziri hanze ni miliyari 58 Frw.

Perezida Kagame yavuze ko no mu baganga hatekerezwa uko hashyirwaho ikigega nka kiriya aho kuzamura umushahara utari bugire icyo uhindura ku buzima bw’umuganga ariko bigahindura ingengo y’imari cyane ku buryo itanaboneka.

Ati “No mu baganga rero sinzi niba ibigega bimwe nabyo abantu bagenda bashakisha aho kugira ngo abantu bakomeze bavuga imishahara, uzibeshya ko wazamuye ariko wazamuye ubusa nta ngaruka nziza byagize.”

Abaganga basanzwe bafite ikigega (MAG) cyo kuzigama no kugurizanya aho umuganga ahabwa inguzanyo ku nyungu yo hasi cyane ingana na 3%. Gusa iki kigega kukijyamo ni ubushake.

Icyo kigega kimaze gukusanya amafaranga y’u Rwanda angana na 2,047,266,854, kandi kimaze gutanga inguzanyo ku bakozi bagera ku 1,057.

Bamwe mu baganga bavuga ko gushyiraho koperative yo kuzigama no kugurizanya buri wese yibonamo byagira akamaro gakomeye nubwo bishobora kuzamura inyungu ku nguzanyo ugereranyije n’uko bayihabwaga muri MAG.

Umwe mu baganga yagize ati “Ni igitekerezo cyiza urebye uko Umwalimu Sacco wafashije abarimu cyane. Tugorwa no kubona amacumbi, gukemura ibindi bibazo ndetse no gukora umushinga waduteza imbere tutarebye ku mushahara gusa”.

Kugeza ubu umubare wabo mu bitaro bya Leta n’ibyigenga ni 1,464. Abaganga basanzwe (General Practitioners) ni 751 n’abaganga b’inzobere 504. Hari kandi abaganga bari mu Cyiciro cya Gatatu cya Kaminuza bimenyereza umwuga mu bitaro bagera kuri 209. Ibyo bigaragaza ko mu gihugu cyose hari umuganga umwe ku baturage 8,197.

Umubare w’abaforomo wavuye kuri 1 ku baturage 1,291 mu 2010 ugera ku muforomo umwe ku baturage 1,094 mu 2017. Umubare w’ababyaza wavuye ku mubyaza 1 ku baturage 66,749 ugera ku mubyaza umwe ku baturage 4064 mu 2017.

Abaganga bagera kuri 800 bitabiriye ibiganiro na Perezida Kagame
Ibiganiro byabereye mu Intare Conference Arena i Rusororo
Perezida Kagame yatanze umukoro wo gutekereza ku kigega cyafasha abaganga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza