Umuntu wa mbere mu Rwanda yishwe na Coronavirus

Yanditswe na Rabbi Malo Umucunguzi
Kuya 30 Gicurasi 2020 saa 09:27
Yasuwe :
0 0

Minisiteri y’Ubuzima yatangaje ko umuntu wa mbere mu Rwanda yishwe na Coronavirus, mu gihe mu masaha 24 ashize habonetse abarwayi bane bashya na batatu bayikize.

- Abamaze kwandura biyongereyeho bane bagera kuri 359

- Abamaze gukira biyongereyeho batatu bagera kuri 250

- Umuntu wa mbere yitabye Imana

- Abakirwaye ni 108

Minisiteri y’Ubuzima yatangaje ko umurwayi witabye Imana ari umushoferi w’imyaka 65 wari utuye mu gihugu cy’abaturanyi, wahisemo gutaha mu Rwanda nyuma yo kuremba.

Yakomeje iti "Yitaweho n’abaganga mu kigo cyagenewe kuvura Coronavirus. Ariko yaje gupfa azize kwangirika imyanya y’ubuhumekero."

Uyu ni umuntu wa mbere mu Rwanda witabye Imana azize Coronavirus kuva iki cyorezo cyagera mu gihugu ku wa 14 Werurwe 2020. Kuba abantu bari bataricwa n’iyi ndwara mu gihugu byatewe n’uburyo cyashyize imbaraga mu gupima, abanduye bagatahurwa hakiri kare, batararemba, bigatuma kubitaho byoroha.

Kugeza ubu nta muti n’urukingo bya Coronavirus biraboneka, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.

Abarwayi bashya bane basanzwemo Coronavirus mu masaha 24 ashize babonetse mu bipimo 1368 byafashwe. Uko ari bane bari baturutse mu mahanga, "bahise bashyirwa mu kato bakihagera". Ibipimo byose bimaze gufatwa ari 66.976.

Mu bantu bose hamwe bamaze kwandura Coronavirus mu Rwanda, 258 bayiturukanye hanze mu gihe 101 bandujwe n’abo bahuye bamaze kwandura. Muri bo abagabo ni 290 (80.78%) naho abagore ni 69 (19.22%).

Kugeza ubu Coronavirus ntirabonerwa umuti cyangwa urukingo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .