Umusaruro wavuye mu mavugurura yakozwe mu rwego rw’ubucamanza mu myaka 15 ishize

Yanditswe na Akayezu Jean de Dieu
Kuya 5 Ugushyingo 2019 saa 11:33
Yasuwe :
0 0

Urwego rw’Ubucamanza mu Rwanda rutangaza ko amavugurura yakozwe mu myaka 15, yatanze umusaruro urimo kuba Urukiko rw’Ubucuruzi rumaze kunga abantu mu manza zari zifite agaciro gasaga miliyoni 930 Frw.

Ni ibitangazwa n’uru rwego mu gihe kuri uyu wa Kabiri tariki 5 Ugushyingo 2019, hatangizwa umwaka w’ubucamanza wa 2019/20, ahagaragazwa ibikorwa by’umwaka ushize n’ibiteganyijwe gukorwa mu mwaka utaha.

Bimwe mu byakozwe mu myaka 15 ishize muri uru rwego harimo guha abacamanza ububasha bwo kunga ababuranyi mu gihe mbere abanditsi b’inkiko ari bo bonyine bari babyemerewe.

Umuvugizi w’Inkiko mu Rwanda, Mutabazi Harrisson, yabwiye Radio Rwanda ko ubu buryo bwatanze umusaruro ufatika ku buryo hari abantu benshi biyunze ibibazo byabo bigakemuka binyuze mu nzira z’ubwiyunge.

Ati “Mu mategeko y’ejo bundi yavuguruwe mu mwaka ushize cyane cyane iryerekeye imiburanishirize y’imanza mbonezamubano ubucuruzi umurimo n’ubutegetsi hajemo ingingo iha umucamanza uri kuburanisha urubanza nyuma yo gusuzuma urubanza akabona ko hari ukuntu ababuranyi bashobora kwiyunga.”

Yakomeje agira ati “Ashobora kubasaba ko bakwiyunga, bakajya hanze gushaka uwabunga atari mu rukiko cyangwa bagahitamo ko Umucamanza abunga. Ibi bimaze gutanga umusaruro ufatika cyane cyane mu Rukiko rw’Ubucuruzi natanga ingero aho hari imanza nyinshi zimaze kurangirira mu bwunzi zirimo amafaranga agera kuri miliyoni y’amadorali ya Amerika.”

Ikijyanye n’ubutabera bwunga cyagarutsweho kandi na Perezida Kagame ubwo yatangizaga umwaka w’ubucamanza wa 2018/19, aho yasabye ko ubu buryo bushyirwamo imbaraga kuko aribwo bubanisha abantu nyuma yo gukemura amakimbirane bari bafitanye.

Icyo gihe yagize ati “Niyo byaba ibyo bibazo biremereye, iyo nzira niyo ikwiriye guherwaho. Bikemura ibibazo by’umwihariko iby’ibyaha ariko niyo ibanisha n’abantu iyo bavugana, iyo ibibazo biganirwa bitari ukujya mu nkiko bigakurikiza amategeko uyu agatsinda undi agatsindwa.”

Yakomeje agira ati “Iyo byanyuze mu kubanza kumvikana na ba bandi ari uwatsinze cyangwa uwatsinzwe birarangira bakabana kandi niko bikwiye kuba bimeze.”

Andi mavugurura yakozwe, ni ishyirwaho ry’ingereko zihariye mu nkiko zisumbuye, zirimo uruburanisha imanza z’umuryango n’abana, uruburanisha imanza z’ubutegetsi n’umurimo n’izindi.

Ibi byiyongera ku mikoreshereze y’ikoranabuhanga mu gutanga ibirengo binyuze kuri murandasi, ndetse n’ishyirwaho ry’urukiko rw’ubujurire hagati y’Urukiko rw’Ikirenga n’Urukiko Rukuru kugira ngo rufashe kwihutisha imanza ziburanishwa ku rwego rwa nyuma.

Imibare ya Minisiteri y’Ubutabera igaragaza ko Urukiko rw’Ubujurire kandi rwahawe imanza z’ibirarane 853 zari mu rukiko rw’ikirenga, aho rwaciye izigera kuri 810, ni ukuvuga ko ari 94.8%.

Mutabazi avuga ko hari ibindi bikorwa bigikorwa birimo kwihutisha imanza zicibwa no guca imanza z’icyitegererezo zitanga imirongo ku zindi nkiko zo hanze y’u Rwanda.

Urwego rw'Ubucamanza rukomeje gukora amavugurura agamije kugeza ku barugana serivisi zinoze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza