Urubyiruko rw’u Rwanda mu mugambi wo kugeza Umuganda ku rwego rwa Commonwealth

Yanditswe na Cyprien Niyomwungeri
Kuya 10 Ukwakira 2019 saa 04:26
Yasuwe :
0 0

Urubyiruko rwo mu muryango w’ibihugu bikoresha ururimi rw’Icyongereza, Commonwealth, rwatangije inama yarwo ku rwego rw’uyu muryango, izabera i Kigali umwaka utaha ku ruhande rw’iy’abakuru b’ibihugu na za guverinoma.

Biteganyijwe ko abakuru b’ibihugu na za guverinoma bagera kuri 53 bazitabira inama y’Umuryango w’ibihugu bikoresha Icyongereza, Commonwealth, izwi nka CHOGM, izaba kuwa 22 Kamena 2020.

Kuri uyu wa Kane ubwo hatangizwaga iyi nama y’urubyiruko ‘Commonwealth Youth Forum’, abagize itsinda ry’abantu 19 riyitegura bagaragaje ko hari ingingo bamaze gutegura zizaganirwaho zirimo; ubucuruzi, guhanga imirimo, kwita ku bidukikije, guhangana n’ingaruka z’imihindagurikire y’ibihe n’ibindi.

Umwe mu itsinda ritegura iyi nama, Fiona Kamikazi Rutagengwa, avuga ko uretse gutegura ibizaganirwaho, nk’urubyiruko rungana na miliyari 1.2 muri Commonwealth barimo kureba icyo bakora ngo gishobora guteza imbere umuryango.

Avuga ko muri iyi nama izaba kuwa 21-23 Kamena 2020, u Rwanda ikintu cya mbere ruzasangiza urundi rubyiruko ari gahunda zo kwishakamo ibisubizo nk’abanyarwanda.

Ati “Dufite byinshi batwigiraho nk’Umuganda, ni igikorwa dushaka kugira ku rwego rwa Commonwealth. Mu myiteguro y’ibyo turimo gukora turashaka gukora umuganda, uzaba mu bihugu byose bya Commonwealth, ku buryo uwo munsi umuntu uzaba uri mu Rwanda azaba arimo gukora umuganda, uri muri Samoa arimo kuwukora, uri muri Nouvelle Zelande, Afurika y’Epfo, ahantu hose muri Commonwealth uwo munsi hazabe hari ibikorwa by’umuganda”.

Kamikazi akomeza avuga ko hari ibindi birimo Umushyikirano, intego z’iterambere rirambye (SDGs), bazabaganirizaho kuko nubwo u Rwanda rutarazigeraho zose ariko hari urwego rwiza rugezeho.

Ati “Tuzazana ibyacu nk’u Rwanda kandi tuzaba dufite byinshi byo kubereka kuko bazaba bari iwacu, hanyuma nabo batuzanire iby’iwabo babitwereke”.

Urubyiruko ruzitabira inama yarwo ya Commonwealth ruzasangizanya ibintu ndangamuco biri mu bihugu byarwo, habeho imurikabikorwa rya Made in Rwanda ariko n’urundi rubyiruko rwerekane ibiri iwabo.

Perezida Kagame aherutse gutangaza ko ari iby’agaciro gakomeye kwakira abakuru b’ibihugu na za guverinoma bazaba baturutse mu bihugu byo muri Commonwealth.

Yavuze ko u Rwanda ruzakora uko rushoboye ngo abayijemo bose bagubwe neza kandi bumve ko bari iwabo.

Insanganyamatsiko izaba ari ‘Uguharanira ahazaza haberereye buri wese binyuze mu ikoranabuhanga, guhanga udushya n’iterambere.’

Perezida Kagame yagize ati “Uyu ni umwanya mwiza wo kureba icyo urubyiruko rwakora hifashishijwe ikoranabuhanga mu guteza imbere ubukungu bw’ibihugu byabo.”

Yavuze ko uyu uzaba umwanya wo gushaka uko abakiri bato bakongererwa ubushobozi.

Hatangijwe ku mugaragaro imyiteguro y'inama y'urubyiruko rwa Commonwealth
Urubyiruko rwiteze byinshi ku nama izaruhuza
Fiona Kamikazi avuga ko bazaganiriza urundi rubyiruko kuri gahunda zirimo Umuganda

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza