Yatewe inda afite imyaka 12, mu myaka itatu aterwa indi, abamusambanyije bamutera ubwoba

Yanditswe na Ferdinand Maniraguha
Kuya 28 Ukwakira 2019 saa 11:14
Yasuwe :
0 0

Mama Boy (ni izina twamuhimbye ku bw’umutekano we) ni umwana w’imyaka 16, ufite abana babiri bose yabyaye nyuma yo gusambanywa n’abagabo bamuruta, barangije baramutererana banamutera ubwoba, byanamuviriyemo kubaho ubuzima bubishye no guhorana agahinda.

Mu 2015 ubwo yigaga mu mashuri abanza afite imyaka 12, Mama Boy uvuka mu Gatenga muri Kicukiro, wabuze ababyeyi be bombi akiri muto yabaga mu muryango wari waremeye kumufasha, ukamwitaho nk’umwana wabo bamumenyera ibyo akeneye.

Yaje gusambanywa n’umwe mu bagabo bari baturanye, amutera inda ayibyara afite imyaka 13.

Ku bw’amahirwe make, wa muryango yabagamo umugabo n’umugore baratandukanye biba ngombwa ko na we ahava, ajya gushakisha ubuzima bwe bwite.

Mu kiganiro Mama Boy yagiranye na IGIHE, yavuze ko kuva ubwo yatangiye kubaho nabi we n’umwana we, agenda ashakisha akazi hirya no hino.

Uwamuteye inda, yaramwegereye ngo amufashe arabyanga, bajya no mu nzego z’ibanze arabyemera ariko yanga kubikora.

Ati “Papa w’umwana wa mbere narabimusabye cyane, ngera no mu mudugudu w’iwabo ndabivuga, umuyobozi waho atwandikisha ikayi abyemera ko azajya amfasha buri kwezi, kuva bayinyandikira, nta bufasha arampa. Arabyanga burundu akambwira ngo nta kazi kandi akora mbizi afite n’umuryango w’inzu imwe iwabo.”

Yatewe inda ya kabiri, aragambanirwa ngo akubitwe ivemo

Amaze kuva mu muryango wamureraga, Mama Boy n’umwana we batangiye kuzenguruka barara aho bwije, ku bw’amahirwe aza kubona akazi ko mu rugo.

Hari umukobwa w’inshuti we ngo wajyaga amubwira ko azamunywera (inzoga) undi akagira ngo ni ugukina. Rimwe aza kumwoshya aramuherekeza bagiye gusura abahungu b’inshuti z’uwo mukobwa.

Ngo bagezeyo asanga yagambaniwe, yisanga asigaye mu nzu y’uwo muhungu wenyine, wa mukobwa wamuzanye yagiye, uwo na we aramusambanya amutera inda ya kabiri.

Ati “Nagezeyo nsanga anjyanye ahantu hari abasore turicara, turaganira barangije barambwira ngo nininjire mu nzu, bantuma ibiryo mu cyumba ndabibazanira bararya, barangije ndandurura ninjiye wa mukobwa twazanye ahita agenda, umusore [aramfata] mpita nsama inda y’umwana wa kabiri.”

Abamuteye inda bose baramwirengagije, ahubwo bakamutera ubwoba

Mama Boy iyo muganira aba afite ikiniga ndetse bigaragara ko afite igikomere ku mutima kuko hari aho agera kuvuga bikabanza kwanga.

Yabwiye umunyamakuru wa IGIHE ko umugabo wa kabiri wamuteye inda, atwara imodoka zivana ibicuruzwa hanze.

Akimara kumenya ko yamuteye inda, ngo yamwimye ubufasha ahubwo akamutoteza amubwira ko ntacyo azamufasha kuko ntacyo yamutwara.

Ati “Papa w’uwa kabiri we yarambwiye ngo imfubyi nta jambo ziba zifite. Yumvise ko nta kintu nakwigezaho kuko nta mama nta na data ngira.Yambwiye ko ntaho narega.”

Uwo mugabo ngo ubwo yari amaze kumenya ko Mama Boy atwite inda ye, yamutereje abantu ngo bamukubite ivemo atabarwa n’abaturage bari hafi aho.

Kubera kutamenya amategeko, kubura kivugira n’ubuzima bubi, Mama Boy ntiyigeze ajya mu byo gutanga ikirego akimara gusambanywa ngo ababigizemo uruhare bahanwe.

Yaje kumenywa n’Umuryango urengera Uburenganzira bw’Abana CLADHO, muri Werurwe uyu mwaka umushyikiriza ikigo cyita ku bakobwa bahuye n’ibibazo bakiri bato, Centre Marembo.

Yabanje guhabwa ubufasha bwo guhumurizwa n’abana be, afashwa kwiga imyuga ubu harigwa uko hatangwa ikirego ngo abamusambanyije bahanwe.

Mama Boy avuga ko nta kizamushimisha nko kubona abamusambanyije bahanwa, kuko kuri we yumva nta gaciro afite mu gihe abamusambanije bakidegembya.

Ati “Nshaka ko babanza bagahanwa bakamenya umuntu icyo ari cyo, bakajya baha umuntu wese agaciro. Burya iyo ufashe umuntu ukamuhana akabona ko icyo yahaniwe ari ikosa n’ubutaha bagenzi be bose barabibona, bakajya batinya kubikora.”

Mama Boy ni umwe mu bangavu ibihumbi 17 babyaye mu mwaka wa 2016 nkuko imibare ya Minisiteri y’Ubuzima ibigaragaza.

Ni umubare ukomeje kwiyongera kuko umwaka ushize, abangavu nk’abo bageze ku bihumbi bisaga 19.

Ingingo ya 133, y’Igitabo cy’amategeko ahana ibyaha mu Rwanda ivuga ko iyo gusambanya umwana byakorewe ku mwana uri munsi y’imyaka cumi n’ine, igihano ku wabikoze kiba igifungo cya burundu kidashobora kugabanywa kubera impamvu nyoroshyacyaha.

Yifuza ko abamusambanyije bahanwa, bikabera abandi urugero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza