YouthConnekt: Minisitiri w’Intebe yasabye ko ubushomeri mu rubyiruko buvugutirwa umuti (Amafoto)

Yanditswe na Cyprien Niyomwungeri
Kuya 12 Ukwakira 2019 saa 09:18
Yasuwe :
0 0

Minisitiri w’Intebe Dr Edouard Ngirente yakiriye ku meza abitabiriye inama Nyafurika y’Urubyiruko izwi nka ‘YouthConnekt Africa Summit 2019, asaba ko inzego zose zifatanya mu gukemura ikibazo cy’ubushomeri mu rubyiruko.

Umuryango mpuzamaanga wita ku murimo (ILO), utangaza ko igipimo cy’urubyiruko rwa Afurika rudafite akazi kizarenga 30% muri uyu mwaka, kandi ruzakomeza kwikuba 3.5 ugereranyije n’abantu bakuru badafite akazi.

Mu isangira ryasoje inama ya YouthConnekt Africa 2019, yari iminsi itatu ibera i Kigali, Minisitiri w’Intebe yavuze ko mu 2055 abaturage ba Afurika bazaba bikubye kabiri, bikaba bisaba ko ishoramari rigomba gukorwa mu rubyiruko kugira ngo ruzabashe guhangana ku isoko ry’umurimo kuko ruzaba rufite ubumenyi bukenewe.

Yavuze kandi ko icyibazo cy’ubushomeri bukomeje kwiyongera ku mugabane no ku Isi, hakaba hakenewe ko iki kibazo gikemurwa n’imbaraga nyinshi.

Ati “Iki kibazo gikeneye gukemurwa mu buryo bufatika kandi burambye ku bufatanye bwa leta n’abikorera”.

Yakomeje asaba inzego zose gushyigikira urubyiruko zigaharanira ko rugira imibereho myiza n’ubumenyi bukenewe kandi bigahera mu gushyiraho icyerekezo na gahunda zirufasha.

Ati “Urubyiruko rwa Afurika mu minsi itari myinshi rwagaragaje ubushobozi bwarwo bwo kuzana ibisubizo bishya bisubiza zimwe mu mbogamizi zacu zikomeye. Batumye kandi ijwi ryabo ryumvikana ubwo bahamagariraga abayobozi ba Afurika kugira icyo bakora”.

Umuyobozi w’Ishami ry’Umuryango w’Abibumbye ryita ku iterambere (UNDP) mu karere Ahunna Eziakonwa, yavuze ko urubyiruko rushonje gukorera ibihugu byarwo, asaba ko ruherekezwa muri ibyo bitekerezo.

Ati “Urubyiruko rwatweretse ko rufite inzara atari iy’ibiryo ahubwo yo gukorera sosiyete, gukorera igihugu n’umugabane, inzara yo guhanga ibishya. Inama nka YouthConnekt ni umwanya mwiza wo kubamara iyo nzara.”

Yashimiye u Rwanda uko rwateguye neza rukanakira inama ya YouthConnekt Africa 2019, avuga ko bishimangira intego igihugu cyihaye yo kwakira inama n’ibikorwa binini hagamijwe iterambere ry’ubukerarugendo.

Minisitiri w’urubyiruko Rosemary Mbabazi, yavuze ko iyi nama yagenze neza kandi igaragaje ubushake bwa politiki, ubw’abafatanyabikorwa n’umuhate wo kwishakamo ibisubizo.

Yavuze ko ibihugu umunani byasabye kujya muri gahunda ya YouthConnekt, bine bikaba byaremerewe ibindi bikaba bigisuzumwa. Hari kandi ibihugu bine byasabye kwakira inama itaha, ari byo; Liberia, Uganda, Ethiopia na Ghana.

Gahunda ya YouthConnekt yatangijwe na Perezida wa Repubulika y’u Rwanda, Paul Kagame mu 2012 imaze kwaguka mu buryo bugaragara, kuko kugeza ubu ibihugu 11 bimaze gutangira kuyishyira mu bikorwa naho ibindi umunani bimaze gutanga ubusabwe bwo kuyimakaza.

Inama ya YouthConnekt ihuriza hamwe urubyiruko ruturutse mu bihugu bitandukanye muri Afurika, hakaganirwa ku nsanganyamatsiko zinyuranye. Ni ku nshuro ya gatatu ibaye kuva yajya ku rwego rwa Afurika.

Muri uyu mwaka, Umuryango wa Afurika yunze Ubumwe wemeje inama ya YouthConnekt, nka gahunda y’umugabane ishobora kwihutisha ishyirwa mu bikorwa ry’icyerekezo 2063 ndetse n’amasezerano ya Afurika ku rubyiruko.

Gahunda ya YouthConnekt imaze gushyirwa mu bikorwa n’ibihugu 12 ndetse ibindi byinshi birateganya kuyitangiza. Ibihugu bimaze gutangiza YouthConnekt ni Zambia, Congo Brazzaville, RDC, Uganda, Sierra Leone, Liberia, Gambia, Cape Vert, Ghana, Cameroon na Zimbabwe byiyongera ku Rwanda.

Kugeza ubu binyuze muri gahunda ya YouthConnekt ba rwiyemezamirimo barenga 600 banyuze mu mwiherero wo kubafasha gutegura no gucunga imishinga, abahembwe ni 210. Kugeza ubu kandi iyi gahunda imaze guhangira imirimo urubyiruko rurenga 8309.

Minisitiri w'Intebe yitabiriye isangira ryahuje abitabiriye inama ya YouthConnekt Africa 2019
Umuyobozi w’Ishami ry’Umuryango w’Abibumbye ryita ku iterambere (UNDP) mu karere Ahunna Eziakonwa na Minisitiri w'urubyiruko Rosemary Mbabazi
Umunyamabanga wa Leta muri Minisiteri y'Ubuzima, Dr Ndimubanzi Patrick na Minisitiri w'uburinganire n'iterambere ry'umuryango Amb. Solina Nyirahabimana
Lamin Manneh, uyobora Ikigo cy’Ishami ry’Umuryango w’Abibumbye ryita ku iterambere (UNDP) muri Afurika yo munsi y’ubutayu bwa Sahara
Minisitiri w'ubuhinzi n'ubworozi Dr Geraldine Mukeshimana na Minisitiri ushinzwe imirimo y'inama y'abaminisitiri Solange Kayisire
Iri sangira ryabereye muri Kigali Convention Centre nyuma y'inama ya YouthConnekt Africa 2019
Uyu we yifatiye agafoto azahora yibukiraho Kigali
Minisitiri w'ikoranabuhanga no guhanga udushya Ingabire Paula yitabiriye uyu muhango
Umuyobozi wa JCI Rwanda, Nishimwe Luce Gloria
Abafatanyabikorwa bo muri KOICA bari bahari
Umuyobozi Mukuru wa (UNFPA) mu Rwanda, Mark Bryan Schreiner yitabiriye iri sangira
Minisitiri Mbabazi yavuze ko ibihugu bikomeje kwinjira muri YouthConnekt
Umuyobozi w’Ishami ry’Umuryango w’Abibumbye ryita ku iterambere (UNDP) mu karere Ahunna Eziakonwa yavuze ko urubyiruko rufite inzara yo guhanga udushya
Abakaraza b'itorero Inganzo Ngari bashimishije benshi mu murishyo mwiza wa Kinyarwanda
Minisitiri w'Intebe Dr Ngirente yasabye abafatanyabikorwa bose guhagurukira ikibazo cy'ubushomeri mu rubyiruko
Ababyinnyi b'Inganzo Ngari babyinnye Kinyarwanda binyura benshi
Aba basore bakaraze umubyimba koko
Amafunguro yari yateguriwe abitabiriye iri sangira

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza